Fa’atino ta’utinoga a Sinapati ma Laina

Tusia Pai Mulitalo Ale ma Fa’aliliu e Maiava ,

534 Hits

O le to’atele e le talitonu i se mafutaga ae va-va-mamao, peita’i o le tala ia Sinapati Reupena ma Laina Joe Laulala, e matua tulaga-‘ese.

O Sinapati ua 17 tausaga o aumau ma faigaluega ai i Amerika, ae na fetaui ma Laina i le Ekalesia o le ‘Au Pa’ia o Aso E Gata Ai, ma amata loa ona uo i le tausaga ua mavae.   

O le Aso To’ona’i talu ai, na lele-sa’o mai ai i Samoa nei, ma fa’aipoipo i le ua alofa fa’amaoni iai, ma fa’atino ai loa a la ta’utinoga i se sauniga na faia i le fale’aiga o le Sails i Mulinu’u. 

O Sinapati – e 42 tausaga o le soifua,  o le alo matua o Isa’ako Reupena ma Vaileta Seupule o Toamua ma Utah i Amerika.  

E faigaluega i se fale-‘aiga i se kamupani i Utah i Amerika.

O Laina – e 28 tausaga, o alo-tama’ita’i e to’atasi o le Susuga a Joe Laulala (ua maliu) ma Onopene Moe o Si’umu ma Sapapali’i.

O lo’o galue o se Tama’ita’i Ofisa i le Vaega o Ta’aloga a le Matagaluega o A’oga, Ta’aloga ma Aganu’u.

O lo’o fuafua le ulugali’i-fou e malaga i Amerika e nonofo ai ma amata atia’e fa’atasi ai lo la aiga. 

Sa fa’atasi atu le loaloa o o la aiga ma uo i se taumafataga sa faia i le falekalapu o le Williams Bay. 

O le Susuga a Kaisa Gafo sa uo-sili i le fa’atoa-fai-ava a’o Nancy Papali’i le uo-sili a Laina. 

O isi  sa ‘auai i le solo e aofia ai Suasa’a’ataiti, Easter Tofaeono, Mercy Wilson ma Joanne Silipa.

O ‘aumea-mamae a le tama-fa’aipoipo e aofia ai La’ala’ai Sia’a, Revive Gafo, Nick Gafo ma Mathew Seupule. 

O teine ‘ave-teu-fuagala’au, o Fa’aolataga Fagalei ma Fa’atoa So’olefai. 

© Samoa Observer 2016

Developed by Samoa Observer in Apia