Mana’omia e Akenese se fesoasoani mo lona tina

Tusia Aruna Lolani ma Fetalai Tuilulu’u ,

73 Hits

Akenese Su’a ma lana fanau mai Faleasi’u.

Akenese Su’a ma lana fanau mai Faleasi’u.

O le fa’atalatalanoaga a le Fofoga o Samoa ma se tina e suafa ia Akenese Su’a sa ia fa’alia ai lona naunau e maua se fesoasoani mo lona tina o lo’o gasegase i le fale.

O le manatu fa’alia o Akenese sa fa’apea e tatau ona iai ni foma’i e asiasi atu i nu’u tua mo tama ma tina matutua aua lo latou soifua maloloina.

“Sa matou nonofo ma la’u fanau i Malie i le aiga a lo’u to’alua, ae ina ua fa’afuase’i le gasegase o lo’u tina, lea sa viliina atu ai a’u e lo’u tuagane, e mana’omia lo’u fesoasoani i le tulaga o lo’u tina, ma matou omai ai loa

“O lo’u tina e ma’i suka ma ua iai fo’i se fa’afitauli i ona mata.

“O lo’o mafai a ona savali o ia ae peita’i o lana va’ai ua fa’afaigataina ai.

 “Ou te lagonaina le vaivai o lo’u tina, ma ou te mana’omia lava se fesoasoani mo ia.

“Pe le mafai a i le malo ona latou tilotilo ini polokalame fo’i lea e mafai ai ona asiasi atu foma’i i nu’u tua mo tagata matutua pei o lo’u tina.

“Ou te le’o aioi mo a’u aua ou te iloa a e lava a lo’u malosi e ave ai lo’u tina, ae le fa’apea la e malosi ai a lo’u tina.

 “E le faigofie se alu atu mamao i se falema’i e va’ai pea fa’apea ua e matua aua o le tele o taimi, e lagona lava e tatou matua ia ua matutua, se lagona vaivai ma le mana’o e maua se malologa.

 “O se itu a lea ta te talosaga atu ai i le malo e va’ai ai fo’i pe iai se fuafuaga e fai ai.

“Mana’omia a le asiasi mai o foma’i e fa’afaigofie ai fo’i mo latou ia ua matutua. 

 Sa ta’ua e Akenese o lo’o sauni o ia e toe o atu ma lona tina e siaki pea o’o i le taimi e maua mai ai le seleni mai ona uso ma tuagane mai atunu’u i fafo.

“E le mafai a la ona matou o ese ma lo’u tina ae le i malosi. Tele a o taimi matou te fia o atu ai e vaai le tama o le aiga ae peitai e fua a i le malosi o le tina po’o le taimi fo’i e taunu’u mai ai lesi o’u uso matua e va’aia o ia.”

© Samoa Observer 2016

Developed by Samoa Observer in Apia