Fa’aleaoga e le Fa’amasinoga moliaga fa’asaga i Toea’i’ina o le Ekalesia

Tusia Lanuola Tusani Tupufia ma Fa’aliliu e Maiava ,

239 Hits

 Ua fa’aleaogaina e le Fa’amasinoga Maualuga se moliaga sa fa’asaga i sui o le Komiti a le ‘Au-Toea’i’ina a le Ekalesia Fa’apotopotoga Kerisiano Samoa, le EFKS.

O ananafi, na fofogaina ai e le Afioga a le Fa’amasino Sili, o Patu Tiava’asu’e Falefatu Sapolu le fa’ai’uga o lea mata’upu, lea na talia fiafia e le ‘Au-Toea’i’ina ma sui o le ekalesia sa tumutumu i le Maota Fa’amasino i Mulinu’u.  

Sa taofia mo sina taimi le-tumau le Fono Tele o lo’o fa’agasolo nei a le Ekalesia i Malua, ina ia ‘auai atu le ‘Au-Toea’i’ina ma sui o le Ekalesia i le Fa’amasinoga. 

O lea fa’ai’uga e afua ona o se talosaga a le Faife’au o Kerita Reupena e fa’asaga i le Komiti a le ‘Au-Toea’i’ina, ona o se finauga i le va’aiga o le ekalesia i Ipswich, i Kuiniselani Ausetalia. 

O le talosaga a Kerita ona ua ‘ave’esea e le Komiti a le ‘Au-Toea’i’ina ona tofi o le Faife’au-Toea’ina o le Ekalesia fa’apea le tofiga o le Toea’ina Fa’atonu o le Matagaluega a Kuiniselani. 

O le talosaga a Kerita sa fa’asaga i le Ta’ita’ifono o le EFKS, le Toea’ina o Tavita Roma, le Sui-Ta’ita’i o Tauti’aga Senara, le Ta’ita’ifono o le Komiti a le ‘Au-Toea’i’ina o Kerisiano Soti ma le Toea’ina Fa’atonu o Peleti To’ailoa.  

Sa tu’uina atu e le Fa’amasinoga se poloa’iga le-tumau i le tausaga talu ai, e taofia ai le Komiti a le ‘Au-Toea’i’ina mai le tofia o se tasi i tofi sa umia e le Faife’au o Kerita.

I lana fa’ai’uga na tu’uina mai, na saunoa ai Patu, o tu’ua’iga uma sa tu’uina atu e le sa talosaga, ua fa’aleaogaina.

“O le poloa’iga le-tumau fo’i sa tu’uina atu fa’asaga i e na molia i le Aso 15 o Me 2015, ua fa’aleaogaina fo’i,” o lana saunoaga lea. 

“Ua tu’uina atu i Loia mo fa’atinoga o tupe totogi i totonu o le 14 aso pe a le-maua se maliega ‘autasi.” 

Na ta’ua e le Fa’amasino Sili, o le a maua le fa’ai’uga tusitusia i le Aso 31 o Me, 2016, ma fa’aopopo mai fo’i, e le’i mautu lona finagalo e vave tu’uina mai lana fa’ai’uga i le mata’upu lea, talu ai le tele o isi galuega mo’omia.  

O Loia o Semi Leung Wai ma Leota Tima Leavai sa tula’i mo le Komiti a le ‘Au-Toea’I’ina, a’o Leulua’iali’i Olinda Woodroffe sa tula’i mo le Susuga a Kerita i lenei mata’upu. O Loia o Iopu Tanielu ma Unasa Iuni Sapolu sa ‘auai e fai ma sui o Leulua’iali’i i le fa’amasinoga ananafi. 

Sa fa’afiafiaina le Loia o Semi ona o le fa’ai’uga, na saunoa ai, ua fa’amaonia e le fa’ai’uga, le fa’atinoga ma faiga-fa’avae a le ekalesia o lo’o mulimuli lava i ala o le tulafono. 

Na matua fa’atumulia le Fale Fa’amasino, ui sa toe fa’aopoopo atu isi nofoa, ma i’u ai ina talosagaina sui o le ekalesia, e talimau atu ma tapua’i i fafo ona ua leai se avanoa i totonu. 

Na momoli le fa’afetai i Le Atua e le Ta’ita’ifono o le Ekalesia, le Toea’ina o Tavita Roma, ona o Lana fesoasoani ua manuia ai ma filemu lea mata’upu. 

Sa ia fa’afetaia fo’i sui o le ekalesia ona o le lava papale ae maise le lagolago sa tu’uina atu, ae maise fo’i le sao-ogaoga o loia i a latou tapenaga.

E fa’apena fo’i le agaga fa’afetai na saunoa iai le Susuga a le Toea’ina Fa’atonu o Tauti’aga. 

“’Ou te fa’afetai tele ona ua matou maua se fa’ai’uga ua ‘aumai ai le to’amalie ma maua le filemu o le mafaufau,” o lana saunoaga lea.

“’Ae le-mafai fo’i ona matou fa’agaloina le isi itu o le fa’amasinoga (le Susuga a Kerita Reupena) aua o latou fo’i o nisi o le ekalesia, e le-‘ese latou ma matou nei. ‘Ou te tatalo, ia avea lenei fa’ai’uga e fai ma fesoasoani tele ia tatou mo le ta’ita’ia o le ekalesia mo mea lelei i le lumana’i.” 

© Samoa Observer 2016

Developed by Samoa Observer in Apia