“O iinei sa ‘ou nofo ai i lo’u olaga atoa, ma o iinei e tanu ai a’u. O lenei eleele o lo matou tuugamau lea.” Tala Le

By Faaliliu e Seagaitumua Tupuola 20 May 2016, 12:00AM

O se tala faanoanoa lenei. O le aso 5 o Me 2016-o tagata o Sogi-o se nuu to’afilemu lea e lata i le sami i le Penisula o Mulinuu-na latou maua se tusi tau faamata’u mai le Faalapotopotoga o Eleele a Samoa (S.L.C.). 

Fai mai lea tusi: “O le Asō-o le aso mulimuli lea o le faasilasilaga e 30 aso-na tuuina atu ia te outou –tou te o ese ai. “O le a matou tausisi i le tulafono e pei ona faaalia i totonu o la matou Tusi Tou te tuua ai lena nofoaga. Ona pau lena o mea e mafai ona matou faailoa atu mo le taimi nei se’ia toe tuuina atu se isi faasilasilaga.”

Ona soso’o ai lea ma le peiseai ua manino mai –o le faatula’ieseina o loo talanoaina e mafai ona faatinoina i soo se taimi mai le taimi na maua ai lea tusi. Ma o le mea lea-mo i latou e le o silafia lea tulaga, o le nuu o Sogi o loo talanoaina iinei-e aofia ai ni aiga e tolusefulu.

O i latou ia e tupuga mai Tagata Solomona ia na aumai iinei e Tagata Siamani i le faagasologa o le Taua Muamua o le Lalolagi, o se vaitaimi amata lea o le ivasefulu. Sa avea Samoa ma atunuu e pulea e Siamani i lea taimi, ma ona o lea mafuaga-e ese ai mai isi lava mafuaga-ou te manatu-sa faaigoaina -o Siamani Samoa.

O lona uiga e faapea o tagata uma lava e tupuga mai Tagata Solomona-ia o loo nonofo i Sogi i aso nei-poo nisi lava nofoaga i totonu o Samoa e tusa ai ma lea mataupu-o tagatanuu o Samoa e ala i lo latou fanau mai.

I le taimi nei la pe a tatou toe fo’i atu i le tusi a le malo, o lē fea tulafono lea latou te ta’ua e ala i lo latou fai mai: “Matou te tausisi i le tulafono e pei ona ta’ua i totonu o la matou Tusi e Aveese ai Outou?

E pau lava le mea matou te iloa e faapea o le Tulafono Sili a lenei atunuu –e matua manino lelei lava i le itu i aia tatau a ona tagatanuu, i le itu i le sa’olotoga e tautala ai, potopoto ai, mafuta ai, feoaiga ma mea e nonofo ai.

E tusa ai ma le mataupu ua i o tatou luma, o le Fuaiupu 13 (d) e manino lelei lava. Fai mai: O le a tatau i tagata-nuu uma lava o Samoa ona i ai le aia tatau e fegasoloa’i ai sa’oloto i le salafa o Samoa ma nofoina soo se vaega o lea nofoaga.

E le mafai ona faamalamalamaina i se isi faiga e sili atu i lo lena. Ma e tusa ai ma le mea matou te iloa, o lea vaega o le Tulafono Sili a le atunuu- e le o suia lava? Poo atonu ua uma ona sui ae matou te le o iloa, ma e tusa ai la ma lea tulaga-faamolemole faamalamalama mai ia i matou e se tasi.

O le fesili la e faapea: Aisea lava ua faananau ai le malo ina ia faatula’iese tagata o Sogi mai lea nofoaga i le Penisula i Mulinuu? O i ai ni ana fuafuaga mo le laufanua lea o loo i ai Sogi o fuafuaina ae na te le o faailoa maia i tagata lautele i le taimi nei? 

O le mea moni, O i ai se faiga i totonu o lou faavalevalea*

Tuilaepa, ma afai o i ai, aisea ua e le faailoa mai ai i tagata lautele lea tulaga?  E pau lava le mea ua matou iloa e faapea ua faaalia e lo tatou Palemia lona popole ia Sogi ina ne’i aafia i se tsunami poo se si’isi’i o galu i le lumana’i, ma o le pogai lea ua faatopelau ai e lana faigamalo le aveeseina o tagata o Sogi ma se’e atu i se isi nofoaga. 

I lenei taimi, o lea faiga ua atagia ai lona alofa.  Mai le poto masani i se tasi itu, e leai se taimi na afaina ai Sogi i soo se tsunami poo le si’isi’i o galu e pei ona i ai i taimi ua te’a, ma o le mafuaga e faigofie lava.

O le itu i le sami o Sogi o loo taoto i totonu o se vaega o le sami o loo matua malupuipuia e se filifili o a’au-ia o loo si’omia ai le itu i matu o Upolu, ma i se taimi vave-o se mea o loo totoe ai, o se vaega lelei lea o le sami e lē galuā-lea na te le mafai ona faao’o se leaga i se tasi-ae taatia ia le eleele tele i le itu i tai e igoa o Sogi-pe soo se leaga. 

O lona uiga e faapea ua leva ona matou iloa lenei nofoaga i o matou olaga atoa ma o lena tulga e tatau ona tatou iloa. O le pogai foi lea sa le faate’ia ai matou ina ua teena e tagata lautele mafuaga a le malo e aveese ai tagata o Sogi, ona ua matua fenumia’i atoa.

Sa latou fia iloa foi pe aisea e talafeagai ai le aveeseina o i latou. Ma i le taimi nei ma ua le ma taofia le loto masalosalo, o le fesili la e faapea: O le a tonu lava le mea lena o loo fuafua i totonu o aupa o le paoa i totonu o lenei atunuu e faavae i le Atua, e faapea o isi lava mea uma e lei faailoa maia lava?

Ma o lea la ua saunoa mai tagata o Sogi, o loo filo ia i latou se alii matua –o ia lea na talosaga mai ina ia ‘aua ne’i ta’ua lona suafa, ae fai mai a ia: “Poo le a lava le faaiuga e tuuina mai e le malo, matou te le o lava i se isi nofoaga.

“O iinei lava e faasino i ai matou ma o le nofoaga lenei o le a matou nonofo ai.” Fai mai lea alii ua uma ona ta’u atu ia te ia le Tusi a le Malo e Faatula’iese ai latou, ae poo le aveeseina pe leai, e le afaina lea, “e le mafai ona suia ai soo se mea.

“Ua matou iloa taunuuga ae o le a matou nonofo pea iinei se’ia o’o ina latou o mai e aveese i matou,” o lana faaaliga lea. Ma-ona soso’o ai lea ma Tala Lei’ataua, o se tina matua lea fai mai ua leva ona nofo i Sogi i lona olaga atoa, ma e tusa ai ma lona matua, e le fia alu ese i soo se isi nofoaga.

Ma i le taimi nei e tusa ai ma lana faaupuga i le Palemia,  o  Tuilapea Sailele Malielegaoi, o lana talosaga ia te ia fai mai:  “Faamolemole-tuu pea i matou e nonofo i lenei eleele.  O iinei e faasino i ai matou. O matou matua sa galulue malosi e faa-laugatasi lenei taufusi i le faagasolo o taimi faa-kolone a Siamani-mo i matou.

Faamolemole-matou te fia nonofo iinei.” Ae ui o lea, afai lava tumau lava le mana’o o le malo e aveese o ia ma lona aiga, fai mai Tala-e le taitai lava ona alu ese. Ua tonu ia te ia e nonofo ai pea i le fanua o lona aiga, ma o lana talosaga mulimuli lava lenei: “Ou te talosagaina le malo ina ia ‘eli se lua ma togi uma i matou i totonu. “E sili ia te a’u ona ‘ou oti ma tanu a’u i le eleele na tuuina mai e o’u matua ia i matou. “Ua matou nofo sauni e tali taunuuga Tuilaepa, ae matou te manana’o e tanu i matou i lenei eleele. 

. “O iinei lava na ‘ou nofo ai lo’u olaga atoa, ma o iinei foi e tanu ai a’u.

 “O lenei eleele o lo matou tuugamau lea.”

*O i ai se faiga i totonu o lou faavalevalea.

Mai le tala na tusia eShakespeare’s  o le ‘Hamlet’.

Afai na te filifili le itu ona ‘ou manatu lea masalo e faavalevalea ae peitai, a fua i le latou faatinoga o tiute i lenei vaitau, e manino mai lava o loo i ai se faiga i totonu o lona faavalevalea.

By Faaliliu e Seagaitumua Tupuola 20 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>