TALATUU MA TALA O LE VAVAU NA FAAMAUMAU E PAPALAGI

Tusia Fuimaono Na’oia Faasavalu Touli F. Tupua ,

538 Hits

O LE  TALA IA TU’ULEMA’AGA: O Ulusele o le alii tautai ma o le alii o le nu’u o Afuli i Manu’a. Sa faasaga lenei Tautai  o Tu’u e fai le faiva o faifaga ina ia maua ai ni i’a mo le alii o Ulusele; a’o le aiga o Ulusele sa faasaga e fai le umu- e ave ma le Tautai ma lona aiga e taumamafa ai. Sa faapea ona fai i aso uma lava le feagaiga. Ona o’o lea i le tasi aso o le a faae’e le faga i uta- ae ulu loa i ai se i’a tele-o le tanifa. 

Ua fai e le Tautai se mea leaga-ua na nanā le i’a-ua le iloa lea mea e le alii o Ulusele. Ona ia Iloa lea o se una o le i’a o pipi’i ae- ua nana e le tautai. Ona o’o lea i le tasi aso, ona alu ane lea o le alii o Ulusele e tafao i le matafaga-ona alu ane lea tilotilo i le faga o faala. Ona vaai mai lea o Tuu-o tūtū le alii nei  i tafatafa o le faga ma matamata i ai.

Ona matamata, matamata lea o lenei alii o Ulusele. Ona ia iloa atu lea o se una o pipii i totonu o le faga-o le una lei o se tanifa- na mafa’i ese i le taumafaiga a le i’a; ae ina ua va’ili a’e-sa tago Ulusele ma ave i lona fale , ae le iloa e le fanau ma le aiga. 

Ona o’o lea i le taeao, ona fai atu lea o le alii i lana fanau- e o e fai se umu mo le tautai. Ona o lea fai le umu, Ona fai atu lea o le alii- A pusa le umu, ona aami mai lea o a’u, ou te alu atu e fai se lu’au- e ave ai o le umu a le tautai.

Ona alu ane lea o le alii ua fai le lu’au-ua faasalalafa le una i le luau, i totonu o le luau. Ua ofu le una i totonu o le lu’au. Ona fu’e mai lea o le umu-ona fai atu lea o le alii-Fu’e le luau e ave i le umu a le tautai-le lu’au o i ai le una. Ona ave lea o le umu i le Tautai. Ua lilo lava i le Tautai se mea faapea ua fai e le Alii. 

Ona fai atu lea o Tu’u i se tasi o lona aiga: Sau se tasi ina fufu’e le lu’au. Ona alu ane lea o se tasi ua fufu’e le lu’au-ona iloa ai lea o se una o se i’a o loo i totonu o le lu’au. Ona faailoa atu lea ia Tu’u-o loo i ai se una i le lu’au.

Ona fai atu lea o Tu’u e avane ia te ia. E vaai atu Tu’u o le una o le Tanifa. Ona manatua lea e ia-ai ua iloa le i’a na latou faia faanana. 

Ona le fiafia ai lea o ia-ua le ‘ai i le umu ma ua faapea lona manatu-Pe na iloa ia te ai le i’a lea na latou ‘aia faanana? Ona manatu lea o Tu’u-ai se una na maua e le alii i le afiafi sa tafao ai i tai i le matafaga ma matamata i totonu o le faga. 

Ona tupu ai lea o lona maasiasi tele ma faapea lona manatu e le toe fiaola, ae lelei ona oti o ia. Ona oso ai lea i le sami ma ‘a’au ma lona manatu –A oti, oti ai pea i le sami. Ae o lana fanau ma lona aiga ua fetagisi, aua o le po lava na ‘a’au o ia- na latou le iloa ai poo fea ua alu i ai. Ona aau mai lea o ia ma taunuu i Tutuila i Nuuuli i le po. 

O Avatele le igoa o le nofoaga na alu i ai o ia ma tatao ai lana faga.

O iinei o loo i ai se tasi matai failauga o Nuuuli o Lagafua- sa fai ai lona faiva- e seu i tai seu i uta lona vaa ma manatunatu poo ai lea tagata e tofutofu i gauta o le ava. Ona goto lea o le vaa o Lagafua ina ua se’e i le gutu o le ava-ua tafea ane i tafatafafa o Tuu i le mea o tatao ai lana faga. Ona fai atu lea o Lagafua-Alii e, poo ai oe?

Se’i e alofa mai, o le a ou oti. Ona tago lea o Tuu ua sasa’e le ama o le vaa ma fai atu-Oso ia i luga i lou vaa ma tago i lau foe. 

Ona fesili lea o Lagafua-Alii e-poo ai oe? Ona tali atu lea-‘O a’u o Tu’u. O loo i ai pea le loto e igoa  o le ‘Loto o Tu’u-aua o le mea lea na faifaga ai o ia, ma o loo i ai pea lea loto. A’o lei nofo mau o ia i lea mea, sa alu i Savaii-toe fai ai lona faiva lena, aua o loo i Savaii foi Tu’u.

© Samoa Observer 2016

Developed by Samoa Observer in Apia