E le’o toe faigofie i suiga ua iai Samoa

By Fetalai Tuilulu’u 20 April 2017, 12:00AM

O le tinā ia  Limala’u Laulu o Saleimoa o ia o se tinā   e  68  le matua o lona soifua ma o lo’o faia nei nai ana pisinisi laiti pei o le fa’atauina o koko Samoa mo le tausia o le aiga ma le fanau.

“Ia o si o matou aiga e fai lava sina to’a laiti.” O lana saunoaga lea i le Fofoga o Samoa.

“O la’u ia mau i ai le taimi lenei ia o le taugata o le tau o le soifuaga o lo’o ua tatou i ai nei o se itu mautinoa lea.

 “I a te a’u lava ia,e tusa ma le 99 pasene o le tele o aiga i Samoa o lo’o ua  ‘a’afia i lea tulaga, ma o lo’u aiga ou te ta’utino lava a’u ia o lo’o i ai totonu le li’o lenei.

“Ua sau totogi ia ua tau le gafatia i le taimi lenei.

Na ia le mana’o e fa’alautele lona finagalo i lea tulaga.

 “Ia o le itu masani lava na’o le taimi lava e totogi ai e u’u ai le tupe o le upu i se isi  aso e aulia atu e le totogi ia e matua’i leai se tulaga fa’apena ua iai  lenei vaitau i tagata faigaluega. 

“Ia afai la ae tu’u mai ai ma le mau fa’alavelave, o mea fai totonu o nu’u ma isi tulaga fo’i ia ia na talanoa loa lea i le fa’atinoina o nonogatupe.

 “E le fa’apea la a fai nonogatupe nei ona fa’apea lea e totogi le vaiaso lea uma ai lava, e leai se mea fa’apena.

 “Aua o le tala moni lava e na’o le pau lea o le sulufaiga o lo’o i ai le taimi lenei i lo’u ia iloa i ai.

 “Ae o le mea moni e matua’i le lelei tele lea tulaga pe a va’ava’ai atu ai le lumana’i.

“O le tele lava o suiga e mo le lelei o si o tatou atunu’u ae o lo’u maitau ma lo’u iloa ai, ua fa’asolo lava i tua le  tamaoaiga o aiga ae o lo’o fa’asolo pea i luga le taugata le soifuaga. 

 “Ia ua tatau lava i le palemia ona silasila toto’a i nei vaega uma ina ia mafai ai lea ona i ai sina suiga lemu.

“Tainane faia ni atina’e i nu’u taitasi mo aiga ina ia ola lelei ma sa’oloto mai le taugata le soifuaga.

 “E manaia fo’i ae susu’e tasi mai si ona fa’amalama ia ma va’ava’ai mai fafo le tigaina o lo’o galulue ai aso uma.

“Ae pei o le itu lea e va’ai atu ai e pei e titilo tele i le tulaga fo’i lele na’o e faipine ma aiga mauoa ae galo ai i matou.

“E silasila na’o e lelei le tulaga ta’u a’oa’oina ma ave ai avanoa faigaluega ae fa’atuatuana’i lava le tele o nai isi tagata.

By Fetalai Tuilulu’u 20 April 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>