I-ā fa’atasi Conrad ma Osana, “O lea lava”

Tusia Jordan Kwan ma Fa’aliliu e Maiava ,

318 Hits

Alu le vaiaso o to’ulu pea uaga ma louloua aso ‘ae na fa’atoa manino le lagi ma lalafo savili i le Aso To’ona’i , i-a fa’atasi loa Conrad Ward e 28 tausaga o le soifua, ma lana manamea o Osana Liki e 27, i a la ta’utinoga fa’aleUlugali’i, i le malumalu o le Ekalesia Fa’apotopotoga Kerisiano Samoa i Vaivase-uta. 

Na mae’a le sauniga o le osiga-feagaiga ma le fa’apa’iaga, soso’o ai loa ma le taumafataga mata’utia na faia i le Maota o Manumailagi i Si’usega, sa ‘auai ai le to’atele o aiga ma uo o le ulugali’i-fou. 

O le taualuga lea ma le taunu’uga o le lima tausaga o le mafutaga fa’aleUo a le poe ma le keo.

Na fesiligia le ulugali’i-fou pe na fa’apefea ona feiloa’i i le amataga, ae soisoi le tama’ita’i-fa’aipoipo ma fa’apea mai: “Ae manaia pe a fa’amisi-sa’o a le vaega lena, aua e seki a Digicel!”

O Osana, o le alo o Mulipola ma Julie Kitiona mai Vaivase-uta.

Na fa’au’u mai le Iunivesete o Vitolia i Ueligitone i Niu Sila sa a’oa’oina ai ma maua ai lona fa’ailoga tikeri o le Bachelor of Arts i Faiga-fa’avae Lautele ma So’otaga Fa’ava-o-malo.

O lo’o galue nei i le Ofisa o le Komisi mo le ‘Aufaigaluega a le Malo, o le Pule o le Vaega mo Faiga Fa’avae. 

O le fa’atoa-fai-avā o Conrad e mai le afio’aga o Moata’a, o ia o le alo o Ella Ward ma le tama o John Ward ua maliu.

Sa a’oa’oina i le Iunivesete Aoao o Samoa ma fa’amanuiaina ai i mata’upu tau masini-komepiuta (CISCO) ma o lo’o avea nei ovle Pule, o le Inisinia fo’i o Komepiuta a le Kamupani o le Comptech Ltd.

“Ma te momoli atu le fa’afetai tele i o ma aiga uma ma uo ona o la tou fesoasoani mai e fa’ataunu’u ma fa’amatagofie lo ma aso,” o le fa’aaliga lea a Osana.

 “E fa’afetai lava ona o le avea o latou uma o se vaega o le ma aso-fa’apitoa matou te fa’amanatu fa’atasi ai ma le fiafia,” o le fa’aopopo mai lea a Conrad.

© Samoa Observer 2016

Developed by Samoa Observer in Apia