Sa’ilia se teineititi

Tusia Ilia L Likou ,

134 Hits

Manamea Leaupepe.

Manamea Leaupepe.

O lo’o ua tausailia e leoleo se teineititi e 14 tausaga le matua e igoa i a Manamea Leaupepe, ma e fa’apea ripoti o le Aso Faraile i le 6 i le taeao na vaaia mulimuli ai o ia.

E tusa ai ma ripoti o lenei teneititi na pikiina e se ta’avale pa’epa’e i le Plaza i le taeao o le Aso Faraile. O lea ta’avale na vaaia na foeina e se ali’i ma o lana pasese fo’i o se ali’i ma na agai i Faleolo lea ta’avale.

Fa’amolemole se tasi o silafia se fa’amatalaga e fa’atatau i a Manamea fa’afeso’ota’i se ofisa o leoleo o lata ane po o le telefoni 22222.

O le vaiaso foi ua tuanai na tausaili ai se teineititi e 15 tausaga o Solosolo, e igoa i a Iunita Sautupe ma o lea ua toe maua.

E fa’apea fa’atamatalaga o le taimi mulimuli na va’aia ai lona tino o le taeao o le Aso Lulu, 14 Mati 2018 i le Kolisi o Anoama’a ma o lo’o ia ofuina foi le toniga a le aoga.

I se toe tepa ai tua i ripoti a leoleo i le vaiaso ua tuana’i o lo’o ua fa’ailoa mai ai e fa’apea o le aso Sa 11 o Mati 2018 na molia mai ai foi e leoleo se pule aoga mai i se kolisi e mai le itumalo o Faleata i moliaga o le osofaiga mataga (indecent assault) i ni uiga sa faapea o lo o masalomia ai o ia sa ia faia lea i se tamaititi o lenei aoga.

E tulai o ia i luma o le faamasinoga i le aso 27 o Mati e tali atu ai i ona moliaga i le maea ai o suesuega.

O le aso 8 foi o Mati na faaulu mai ai se tagi a ni tamaiti aoga mai le kolisi o Avele e faasaga i le o lo o pule lua ma se tasi faiaoga i le kolisi lava o Avele. Na faia suesuega a leoleo ma o lea na molia mai ai i le aso nei le pule lua o le kolisi o Avele i lona faaosoina lea o se tasi e fai se soligatulafono (parties to offences) ae o le alii faiaoga ua molia nei i le faaoolima i nei tamaiti aoga. E tulai i laua uma nei i le aso 3 o Aperila 2018 e tali atu i o laua moliaga.

O le aso Faraile 9 o Mati na faatoai mai ai se tagi a le kamupani a le Samoa Planet e faasaga i le api o foliga (facebook page ma le blog)a le OLP poo le Ole Palemia. O lenei mataupu e faapea o lo o tuuaia ai lenei kamaupani i ni faamatalaga sese ma le le sao ua tuuina lea i luga o lenei facebook page e se tagata e faasaga i lenei kamupani.

O lo o faia nei i ai suesuega a leoleo ma e leai se tasi ua molia mai ai i lenei mataupu. O le aso toonai 10 o Mati 2018 na molia ai e leoleo i le moliaga o le faomea matuia (aggravated robbery) ni alii se toafa lea sa sailia mai i le vaiaso ua tuanai atu e tusa ai ma se taavale laupasese na latou ave faamalosia ma tuuina ai le ave taxi le tama 64 tausaga o Vaivase i tua o le keli o lana taavale lau pasese.

O nei alii e toafa e 19 tausaga o le tasi ae o le isi toatolu ei luga ifo o le tai 20 tausaga le matutua. O lo o taofia uma i latou nei i lalo o le vaavaaiga a leoleo e faatali ai le tulai ai i luma o le faamasinoga i le aso 9 o Aperila e tali i o latou moliaga.

© Samoa Observer 2016

Developed by Samoa Observer in Apia