O lo’o i o tatou lima manuia

Tusia Sarafina Sanerivi ,

84 Hits

Sili Sili mai le afioaga o Pesega.

Sili Sili mai le afioaga o Pesega.

O le fa’atalatalanoaga ananafi ma  Sili Sili o le afio’aga o Pesega na ia fa’ataua ai le ola e galue mo le taimi lenei aua le lumana’i manuia o aiga.

“Ia o a’u o lo’o o’u galue i se tasi o Kamupani e igoa o le Mana i Vaitele  , ma o lea le galuega o lo’o o’u maua mai ai se tupe e tausi ai lo’u aiga,” Sili i le fa’atalatalanoaga ma le Fofoga o Samoa.

“E le’o toe aoga se ola nofonofo , ae o le galue lava.

“O lo’u ia iloa i ai le tau o le soifuaga o lo’o ua i ai nei, ia ua tatou tau fai silafia uma lava lea itu ua taugata lava mea uma.

“E o’o lava i le tau o oloa aemaise o auaunaga ese’ese o lo’o ua matua’i faigata lava le tulaga o lo’o ua i ai le taimi lenei.

“O lo’u ia iloa i ai le taimi lenei, ma ou te iloa a o tatou nofoa’i ma le faia ai ni galuega lelei mo le alu i luma ia o lona iuga o le a tupu le mala.

“E pei la o lo’u ia manatu i ai, ia tatou talia mea ua i ai lenei taimi ae tatou alo aga’i i luma e faigofie ai o so’o se taumafaiga.

“Ia o tatou iloa, ia o lo’o tavili saosaoa le lalolagi i le tau o le soifuaga, ma e ao ai fo’i ona o tatou galulue aga’i i ai.

Na ia fa’ailoa o le galue lava ma le fa’amaoni le ki o so’o se fa’amanuiaga.

“E pei o lo’u ia lea va’ava’ai i ai le taimi lenei, ele maua se mea ma se filemu.

“A le galulue fo’i, ia e leiloa le tulaga e o’o i ai, ia e ao ai lava ona galulue, aua a na’o le nonofo ma faitio ae le galulue e pei o i’ina o le a tupu mai ai loa le mala.

“O le to’atele lava o lo’o ua latou taua le tau o le soifuaga o lo’o ua i ai nei, ua mafua ai le mativa, ae o lo’u iloa i ai, ia e leai se mativa.

“Ae pei o le le galulue lava o nai o tatou tagata o lo’o ua mafua ai uma mea uma.

 “O lo’o manino lava, e ese’ese uma taleni na aumai e le Atua mo i tatou, ma e ese’ese uma lava vala’auina.

“A mafai lava ona aputiputi lelei taleni ma fa’aaoga tatau i le mea e tau ai lo tatou malosi, ou te iloa o le a faigofie mea uma i le alofa o le Atua.

O lona talitonuga o manuia lava o lo’o i o tatou lima.

© Samoa Observer 2016

Developed by Samoa Observer in Apia