Talia ma le fiafia

By Sarafina Sanerivi 20 February 2017, 12:00AM

O le itu mautinoa, e le tau ‘avea oe ma se tagata mau’oloa ina ia mafai ona maua ai sou fiafia.

O lea le talitonuga o le tamā i a Fotu Mala o le afio’aga o Aele i le  fa’atalatalanoaga ma le Fofoga o Samoa.

O lo’o ua galue o ia o se tagata faigaluega o le Kamupani a le R&R.

 “Ua o tatou iloa ma mautinoa le olaga o lo’o ua i ai nei i totonu o Samoa, o lo’o sologa lelei mea uma i le alofa o le Atua, ma e ao ai fo’i ona tatou fa’afetai ai, ia ma fa’aaoga tatau,” o lana tala mai lea i le Fofoga o Samoa.

“Ia o le tele lava o tagata o lo’o ua o latou e fa’apea e leai se isi atunu’u e tutusa ma le saogalemu o Samoa, ma o lea lava fo’i le talitonuga o lo’o i a te a’u.

“E mo le silafia ai, o Samoa o lo’u aiga ma ou te fa’afetai lava a’u ia i le Atua ona o le atunu’u ua aumai e fai ma tofi.

“O le itu mautinoa  e tusa lava po o le a le  matagofie ma le feilailafa’i o isi atunu’u e tumau lava ma e le mafai ona ave’esea ai le matagofie o Samoa.

“E pei o lea le uiga o la’u tala lea ua fai atu i le taimi lenei , e leai lava se isi atunu’u e tutusa le lalelei ma Samoa.

“E matua’i o’u fa’afetaia lava e a’u ia lenei atunu’u ma e leai lava se isi nofoaga e tutusa ma Samoa, e sili lava Samoa.

O le tele o vaega e pei ona ia fa’ailoa e lelei ai  Samoa , ona o luga o lana lisi o lo’o ua matua’i mautinoa ai lava le nonofo filemu o tagata i o latou lava lauele’ele.

‘A o  tatou silasila i ai le taimi lenei, o lo’o ua nonofo fiafia uma tagata i o latou ele’ele’, ma o lea lava le vaega  o lo’o tutusa lelei ai ma si o’u aiga i le taimi lenei.

“Ia e pei ona o tatou maitauina, ia e le tau tagata Samoa, ia a e sa’oloto lava le la’ala’a solo, e leai se ituaiga tulaga fo’i le le e popole i fana ita e isi pe a so’ona savali i luga o le auala.

“E le pei o isi atunu’u na o le sese lava o lau tu, ia e lavea, ae o si o tatou atunu’u e filmu mea uma e leai lava se vevesi.

Na ia fa’ailoa o le isi itu taua, ia o le olaga lava e faigofie i Samoa.

“Ia o le ola lea i fa’amanuiaga e tau i le si’osi’omaga ma le oa i so’o se vaega o lo’o mafai ona maua  fua mai le lau’ele’ele.

“Ia o lo’o ua tatou tau fai iloa uma, o le tele o atunu’u o lo’o i fafo e pei o tupe lava o lo’o mana’omia mo vaega uma, aua le fa’atinoina o vaega mai lea aso i lea aso.

“A  leai se tupe, ia e fia’a’i le aiga ma ona o’o ai se tulaga le lelei tele.

“O lona uiga e ao lava ona i ai ni galuega ina ia mafai ona  maua ai le mea’ai aemaise o le totogiina o le mau pili e totogi.

“Ia e mo le silafia o lo’o  tele lava nisi o auala e mafai ona o tatou foia ai le tele o fa’afitauli o lo’o ua i tatou i ai nei.

“O totonu lava ia o aiga, ia e pei o ma’umaga o lo’o ua tua i ai, o nai pinati to to e pei o vaega nei o lo’o maua mai ai tupe.

“Ia o le galue malosi lava aua lava le tausiga o nai aiga aemaise lava i fanau.

“I a te a’u ia, o le mea e i ai le loto o lona uiga o lo’o i ai le auala e fai a’i.

Na ia fa’ailoa o le taugata o le tau o le soifuaga o lo’o ua i ai nei o le a faigofie ai fo’i ona alu i luma o le atunu’u i so’o se atina’e o lo’o ua i ai nei.

By Sarafina Sanerivi 20 February 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>