Manatu o le Fa’atonu - E tofu i tatou ma le matafaioi e fai

211 Hits

Na valaaulia le tusitala e le Matagaluega o A’oga, Taaloga ma Aganuu e saunoa i lana fono faale-tausaga na usuina i le  Maota o T.A.T.T.E. Na saunoa  o ia i le autu:  “O Faiga Faa-Paaga mo le Faaleleia o le Faitau Tusi ma Numera i totonu o Aoga-O le matafaioi a Nusipepa. O lana saunoga lenei: 


Tusia - Mata’afa Keni Lesa

Faaliliu e Seagaitumua Tupuola 

 

Lau susuga i le Ta’ita’i o le Sauniga,
Minisita o A’oga, Taaloga ma Aganuu,  Magele Mauiliu Magele
Ofisa Sili o Pulega o le Matagaluega o A’oga, Taaloga ma Aganuu, Karoline Afamasaga-Fuata’i
Sui Auai o le Fono
Tama’ita’i ma alii. 

 

Muamua, ou te fia faafetai atu ia te outou mo le tusi valaau ina ia ‘ou auai iinei. O se faaaloalo lea ma le aloa’ia lo’u tula’i atu i outou luma i lenei aso ma ou te molimoli atu i lou outou mamalu faamanuiaga na la matou Faatonu Aoao, o Savea Sano, le pule o a matou lomiga o Muliaga Jean Malifa ma le aufaigaluega a le  Samoa Observer Newspaper Group i Samoa nei ma le lalolagi atoa. Ou te fia momoli atu foi le faamalo i le Matagaluega o A’oga, Taaloga ma Aganuu ma a outou paaga uma-e aofia e o loo lagolgoina outou-mo lenei fonotaga matagofie. Ou te fia momoli atu foi le faamalo ia Professor Karoline Afamasaga-Fuata’i i le avea ma Ofisa Sili fou o Pulega o la outou Matagaluega. 

O le ‘auga o la outou fono, “Afai e le o nei….O afea la?” e le gatai ina talafegai ma le taimi, ae matua taua tele i nisi o lu’itau o loo tatou feagai ai i totonu o le vaega tau aoaoga i aso nei. I le talanoaina la o lu’itau, ou te talitonu o loo outou i ai i se tulaga e sili ona lelei tou te malamalama ai i nei lu’itau. I le avea ma Pulea’oga, faia’oga ma e faatinoina pulega, o loo outou i ai i foliga moni o aoaoga i totonu o Samoa. Ua outou silasila la, o nisi o i tatou e mafai ona nofo i totonu o matou ofisa ‘ea malūlū ma mafaufau e uiga i mea ia matou te manatu o mataupu tonu ia ae o outou e lava lo outou silafia. 

O outou ia e lava lo outu silafia. O outou ia o loo faafesaga’i ma le mea moni o le taumafai lea e a’oa’o i latou e le’i a’oa’oina i le salafa o Samoa, i aso uma, i le tausaga atoa. Mulimuli ane, o outou foi ia o le a faatinoina le matafaioi autu o le sailia lea o vaifofo, vaifofo ia e taua, e mafai ona faatino ma e faapito lava ia Samoa. O le pogai lea o potopotoga faapenei e matua taua tele, aemaise ai lava pe a faatinoina a’o le’i a’e a’oga. I lenei taeao, sa talosagaina o a’u e fai ni nai upu e uiga i le mataupu o le “Faiga Faa-paaga mo le Faaleleia o le Faitau Tusi ma le Numera i totonu o Aoga.

 – O le matafaioi a Nusipepa.” Ina ua valaauina a’u ou te faia se lauga, sa ‘ou le mautinoa lelei pe o le a le umi latou te mana’omia ai a’u ou te lauga. Ia atonu o se mea lelei lea talu ai- ou te fiafia i le puupu’u ma ia tau i le ‘auga. Ia manatua foi, sa le mafai ona ‘ou mautinoa pe o le fea faiga-paaga lea latou te finagalo ou te tautala i ai-o le mea lea- o le a tafa-tasi ai sa’u faamatalaga  i le “matafaioi a Nusipepa tau le faaleleia i le faitau tusi ma le numera. 

Tama’ita’i e ma alii, o le matafaioi a nusipepa o le faailoa atu lea ma aoao o tatou tagata ina ia mafai ai ona latou faia ni filifiliga lelei e faasino i mataupu ia e aafia ai i latou. E le o se mea e tau faailoa atu e faapea o le mafai ona  faitau tusi ma faaliliu numera o se itu lea e matua taua tele. O le itu e faafetaia ai, o le maualuga o le maualuga o le faitau tusi ma le numera i totonu o lo tatou atunuu ua tatou mafai ai ona tuuina atu se auaunga e faailoa atu ai, a’oa’o ai, faafiafia ma o le itu e sili ona taua, o le mata’ituina lea o le faatinoga o galuega a tagata o le malo. O se tasi o matafaioi e sili ona taua a nusipepa o le avea lea ma ta’ifau leoleo a lo tatou malo-ma o lena itu e aofia ai le Matagaluega o A’oga.  O le lu’itau mo i matou o loo i totonu o nusipepa, ou te talitonu, e le faapitoa i le tuuina atu ia matou tagata e auai ma tagata faitau mea e faitau mo le manao tau faitau ae o le tuuina atu o tusitusiga e sili ona lelei, mautu, e faapito i le ‘auga, le ituaiga lea na te faia se eseesega. I le avea ma taliga ma mata o sui o le atunuu lautele, e ala ona matou i ai ina ia fai ni fesili faigata, fesili e le tauga-malie, fesili e manana’o tagata maoa’e ma tagata paoā ona ‘alo ai. 

Se’iloga lava matou te maua tali i nei fesili faigata-ona faatoa mafai lea ona tatou maua se atunuu e moni ma faamaoni i le faaupuga lea e masani ona faaaoga sese  o le “faimea tonu, mautali atu ma faiga-malo lelei.”

Ma o lea tulaga, ou te talitonu, o se vaega taua lea o le so o nusipepa i lenei faiga-paaga- e faaleleia atili ai le faitau tusi ma le numera i totonu o aoga. A sologa lelei mea, o loo matou i iinei e faailoa atu ia matou tagata fai e uiga i lea itu ma tuuina atu le viiga i le mea e tatau ai. 

E faapena foi lea tulaga, a le sologa lelei mea, matou te le ‘alo ese mai le mea moni. E ala ona matou iinei ina ia tuuina atu na fesili faigata ma le a faaauau pea ona fai ia fesili pe afai lava e le maua mai i ai ni tali.  

I le faaiuga o le aso, e i ai le matafaioi a nusipepa ia la matou ‘aufaitau. Latou te faatuatuaina i matou ina ia tuuina atu ia fesili ma maua mai i ai ni tali. E le o se mea lilo le faapea e anoano fesili ua leva ona fetogia’i solo e uiga i le suega tau Matematika. O nisi o ia fesili e mai ia i latou o loo i totonu o lenei potu. Matou te talitonu o nei fesili e tatau ona tali ma ia tali ma le faamaoni. Ona pau lena o le taimi e mafai ai ona tatou faagasolo i luma. 

O se tasi o itu matagofie  e uiga i nusipepa e faapea na te una’ia le faaalia sa’oloto o manatu, lea e mafai ona faaaoga e faavae ai faiga e fo’ia ai. Matou te una’ia outou uma ina ia faatino se matafaioi lelei i totonu o lea fono, ia e lagona le sa’olotoga e faaali ai ou manatu, tusa lava pe e te ioe  pe lea i le mataupu. Ia iloa e o tatou tagata le mea o loo outou mafaufauina. E ese ai mai la matou matafaioi e avea ai ma ta’ifau leoleo, matou te ioe e faapea e tofu tagata uma ma se ituaiga o matafaioi tau le faaleleia o le faitau tusi ma le numera i le salafa o tatou tagata.

Ae peitai, o le mafuaga autu ua auina atu ai e le toatele o matua a latou fanau i a’oga-ina ia mafai ona latou aoaoina pe faapefea ona faitau ma tusitusi. O nisipepa ma isi e na o le lagolago le matafaioi e mafai ona latou faia-o se matafaioi lea ua noatia ai tatou –ma tuuina atu mea faigaluega ma fautuaga ia e mafai ona fesoasoani i le aoaoina o le fanau.

Ae ui o lea-mulimuli ane-o le matafaioi muamua a le faiga tau aoaoga lea e tatau ona faamuamua-o le silasila lea ua tupu lenei mea. 

I le Samoa Observer, matou te alolofa i le lumana’i o a matou fanau. O le pogai lea matou te lomia ai pea tala e uiga i tamaiti ia e faatau atu oloa i luga o ala tetele ae sa tatau ona o i le a’oga. 

O le pogai lava lea e tasi matou te lomia faasalalau ai tala e uiga i atugaluga e faasino i pepa o suega a le atunuu ma fesili e faasino i maka poo togi e pasi ai a tatou tamaiti a’oga.

O le pogai lea matou te lomia faasalalau ai tala e uiga i talosaga a faia’oga ma le latou finauga mo ni totogi lelei. Ou te faamnatu atu e faapea i le faaiuga o le aso, o faia’oga lava e gafa ma le aoaoina o tamaiti a’oga, ae le o fale fe’ilafi ma polokalame lelei i luga o pepa ina ia mafai ai e tagata ona faasa’o e tagata a latou pusa.

Tusa lava pe o a polokalame e faaaoga e se a’oga, o ia polokalame e faatoa mafai ona faaaoga pe afai e faatinoina e se faia’oga magafagafa. O loo i ai ni polokalame uiga ese i aao o se faia’oga e le lelei e na o le taunuu ai i le malaia ma le le pasi. O lona uiga o la tatou vaaiga taula’i, pe afai tatou te manaomia le faaleleia o le faitau tusi ma le numera, e le faasino i ni poloklame ma ni fuafuaga.. 

E tatau la ona tuuina atu le tatou vaaiga taula’i i le mautinoa lelei e faapea ua lagolagoina faia’oga lelei e tusa ai ma le galuega o loo latou faia. O le a’oa’oga atu o se galuega lea a se tagata e to’atasi. O se galuega faigata. Ma latou te mana’omia le lagolago atoa e mafai ona latou maua. Matou te talitonu pea i taimi uma e fapea o faiaoga i Samoa e tatau ona lelei o latou totogi. Ou te fia faamnatu i le asō e faapea- afai e faaauau pea e le malo ona totogi atu ia i latou pinati , o taunuuga o le a atagia ai lea tulaga. O le mea tatou te lūlū e mulimuli ane ona avea ma mea tatou te seleseleina. Ma e le tatau ona tatou faasese ia i tatou, afai tatou te lūlū pinati i totonu le atiina a’e o faia’oga, tatou te selesele i manuki.

I lenei taimi, ou te fia faailoa atu e faapea i le Samoa Observer, e tumau o matou loto ma noatia ina ia galulue faatasi ma le vaega tau Aoaoga ina ia faaleleia ai le faitau tusi ma le numera i totonu o Samoa. O la matou Nusipepa i totonu o Aoga o le faamau faailoga lena o lo matou noatia atoatoa i lea faamoemoe. I lea nofoaga-ua matou ati a’e ai se vaega faitau tusi malosi i tagata talavou, o le toatele o i latou ua matou vaaia le tulaga solo lelei o a latou aoga ma ua faagasolo i luma i aso nei e avea ma ta’ita’i i totonu o lenei atunuu. 

Ma ua na o se vaega lena e tasi.

E i ai foi la matou Tulimanu mo Tamatiti ua faapito lava i le tuuina atu o mea e aoaoina ai tamaiti. O se vaega autu o le iloa ona faitau ma tusitusi o le a fiafia i nei mea i le tulaga muamua. O le tauvaga o tala pupuu a le Samoa Observer o le isi lea ala o loo matou una’ia ai le fiafia o tupulaga talavou e tusi a latou lava tala ma faitau i tala a isi. O tauvaga i le tele o tausaga sa matua uiga ese lona faamanuiaina. E faa’iu atu ai, tamaitai e ma alii, ou te toe fia momoli atu le faamalo mo lenei fonotaga. O la outou autu o le “Afai e le o le taimi nei…o afea la?” o le mea moni o se lu’itau e matua tele. O le valaau lea mo se galuega faatino, o se valaau mo i tatou uma lava ina ia tutula’i atu –talu ai e tofu i tatou ma le matafaioi e faatino. 

I le Samoa Observer, o le a faaauau pea ona matou tuuina atu fesili faigata, faailoa atu tala ua faamanuiaina ma siitia le taua o le faitau tusi ma le numera ia tatou tagata faitau i Samoa ma le lalolagi atoa.  

Ae faapefea outou? 

Tu’u mai a’u ou te faailoa atu e faapea o le mea lena e te i ai –e le’i mafua ona o se faalavelave faafuase’i. Ua e i lea tulaga mo se faamoemoe, o le Atua Silisili Ese na ia tuu atu oe i lena nofoaga mo le faaleleia atili o le atunuu e ala i au meaalofa ma taleni. Na ia silafia lelei e mafai ona e faia.  O le mea lea-patipati mai outou ona o lo outou lotomau e avea ma vaega o vaifofo ma le faia o le tautinoaga e faatino ai pe afai e taua-i totonu o potu a’oga. 

Ia manuia le fonotaga, ma ia faamanuia atu le Atua! 


© Samoa Observer 2016

Developed by Samoa Observer in Apia