Tuua e le Afi lona ala o le faatafunaina

223 Hits

Iakopo Siaosi ma Vaele Ilalio.

Iakopo Siaosi ma Vaele Ilalio.

Tusia - Sarafina Sanerivi

Faaliliu e Seagaitumua Tupuola

 

O le afi lea na sasao i totonu o le Maketi i Savalalo i le Aso To’ana’i –e le na o le faatafunaina o se fale. O lea afi mu-saesae na sasao i le Maketi i Savalalo i le Aso To’anai e le na o se fale na faatama’ia ai.

O lea afi na sasao na faaleagaina ai foi le faitau afe ma afe o soifua o i latou e faalagolago i pisinisi o loo faatino i lea nofooaga. Na fetaia’i le Samoa Observer ma nisi o i latou ananafi.

Mo Pele Pio o Togafu’afu’a, sa faate’ia pea o ia.

“Ua matua faigata lava ia te a’u ona talitonu ua alu uma mea i lenei taimi,” o le faaaliga lea a Pele. O Pele e fai lona faleoloa i le maketi. E ui ina sa mafai e ia ona faasaoina nisi o ana oloa, ae o ana uo ma isi lava o le ‘aufai-fale’iga-sa le maua so latou avanoa. “Ou te iloa o loo feagai i latou ma se taimi faigata ma ua ‘ou masani i lea lagona o le maumau o mea uma sa e galue ai ma le tiga,” o le faaaliga lea a le tamaitai.

“Ou te lagona le tiga o loo faalogoina e nisi o a’u paaga fai fale’aiga i le taimi nei. E le o se mea sa faamoemoeina, e tasi le minute sa lelei uma ai mea ona soso’o lea ma le pasae! Na matua mu uma lava i lalo.

O se tulaga lena e faanoanoa ai.” Fai mai Pele o lona faleoloa o le falaoa ma le pata lena a lona aiga.“Ona pau lenei o le puna o tupe maua mo a’u ma lo’u aiga. E matua le ofi i lo’u mafaufau le mea o le a tupu pe ana aveese uma e le afi nei mea o i totonu o le faleoloa. Ma talu ai o le a vave ona a’e a’oga, e tatau ona ‘ou tausi la’u fanau e to’atolu ma ou  te mana’omia se tupe e auina atu ai i latou i le a’oga ma tausi i latou.”

O loo faafetaoa e Pele le leai o se tasi na afaina ai. Ae peitai fai mai a ia “o le taimi tonu lenei mo le malo e tula’i mai ai e fai se mea mo tagata ia ua pagatia ona o lenei faalavelave. “O le taimi lenei e faamaonia ai latou te popole i le manuia o tatou tagata ma e moni o lo tatou malo e mo tagata.”

E talitonu Iakopo Siaosi mai Siumu e faapea e tutupu mea uma mo se mafuaga ma o lea faalavelave na tupu -e i ai lona mafuaga. E faatau atu e Iakopo lavalava i lumafale o le faletupe o le Atiina A’e o Samoa i tala ane o le maketi ma fai mai o ia e toatele ana uo  ma tagata fai fale’iga i le maketi.

“Ou te iloa o loo latou feagai ma le anoano o mea i le taimi nei talu ai ona sa ‘ou talanoa i nisi o i latou analeila,” o lana faaaliga lea.

“O le maketi sa pei o se aiga mo le toatele o i latou . O nisi o i latou ua avea o latou fale’aiga ma o latou aiga lona lua. O nisi o i latou ua momoe foi i totonu o le maketi.” “O le mea lea ou te manatu ai e le gata ina maumau o latou fale’aiga ae faapea foi sootaga na latou faia ma a latou tagata faatau ma isi tagata fai fale’aiga. 

“ Ou te alofa i aiga uma lava ua aafia talu ai lenei faalavelave ma ou te faamoemoe o le a fesoasoani le malo ma pisinisi a le atunuu ia i latou.”Va’ele Ilalio mai Afega fai mai e le talitonu ua leai se maketi i le taimi nei.  “Ua matua vave ona tutupu nei mea uma, ua pei o se miti i le toatele o tagata.

”Fai mai Va’ele o lona tuafafine e ou se fale’aiga e tasi lea na aveeseina e le afi.“Ou te lagona le faanoanoa mo ia ona o se tasi lenei o a latou puna autu o tupe maua. Ma ou te iloa sa latou galulue malosi mo lea tulaga ma o le faapea lava ua alu uma ia mea e lagona ai le vaivai o le loto.”

O le maketi o se tasi lea o nofoaga e sili ona asia e turisi e o mai  i Samoa, o le faaaliga lea a Vaele.. I le taimi nei, ou te manatu e tatau ona tatou tilotilo i luma ma vaai poo le a le mea e mafai ona tatou faia e afua atu iinei. 

“I le taimi nei, o loo fia vaai tagata uma i le fusuaga a Parker iinei i totonu o le atunuu-ae o le itu e faanoanoa ai- ona ua tulai mai se mea sa le mafaufauina ae o loo tilotilo tagata uma i le fusuaga o le tala faasolopito. Ae ui  o lea, ou te faamoemoe ma tatalo o aiga uma na aafia i lenei faalavelavae faafuase’i o le a toe faamaloloina mai lenei mea mata’utia ma le le faamoemoeina ua tupu mai. 

© Samoa Observer 2016

Developed by Samoa Observer in Apia