O la’u tala foi

128 Hits

1. Matauina i Tala Fou o lea foi ua toe valaau mai le Minisita faaolioli o Tupe a le Itu Agai poo le Tautua Samoa Party, o Afualo Dr. Wood Salele- “E taofi le Faimea Pi’opi’o…”O lea foi ua na toe faamanatu mai-“E leai se tasi e i luga a’e o le Tulafono”!

O ia faiga pi’opi’o-fai mai Afualo ua uma ona faamaonia e le Pule ma Su’etusi Sili-ma lagolagoina e le Komiti Filifilia a Alii Ofisa o le Palemene! O lona uiga la- o faiga pi’opi’o ia e ta’ua e Afualo-o faiga pi’opi’o ua leva ma ua uma ona faamaonia-lea e aafia ai le Minisita muamua o Tupe ma le Faalapotopotoga o Eleele a Samoa poo le S.L.C.  O le finagalo la o Afualo-ia faatu se Vaega e Tete’e atu i Faiga Pi’opi’o poo se “Anti Corruption Tribunal”.

O le finagalo la o Afualo –afai tatou te soli le Tulafono-e tatau ona tatou mautinoa-ua faatino le amiotonu ma le faamasinoga.

E leai la se tasi e i luga atu o le Tulafono e o’o lava i le Palemia. Fai mai Afualo ua leva ona fai mai Tuilaepa o loo i ai le tatou Komesina o Sulufaiga-ma ua matou iloa lelei lava lea tulaga-ae anoano mataupu ia e le o fiafia ai tagata o le atunuu-  i le itu tau le faatinoina o le pule a lea Ofisa-ma o le mea lea e tatau ai ona tatou mautinoa e faapea o le mea latou te faia –o le faatino.

Ia-atonu ua ta’ua soo e Afualo lenei tulaga-ae ia manatua-o le taofiofi umi o lenei mataupu-e le faia i ai le amiotonu ma le faamasinoga-o se solitulafono lena a le faiga-malo o le HRPP-ma o lea e tatau ona tuuina atu i le Privy Council mo so latou manatu, ma o le upu moni-a tuuina atu lenei mataupu i le Privy Council-o lana tali mai- e tatau ona fai moliaga i le Faamasinoga, talu ai- o loo aafia ai tupe a le atunuu-ona o faiga pi’opi’o-ona o mai loa lea o Loia ma Faamasino mai fafo-e fai le mataupu-ona faigofie lava lea ona maua le tonu.

E mafua ona fai atu- ona e le o se mea e faigofie i le Palemia ona faatino i le taimi nei lea tulaga-leaga o lea e loma le Palota! Ae o le upu a le atunuu- “E tuai lava ae fai mai”-o lona uiga-e tuai lava ae taunuu! O afea la e taunuu ai? O le tali-e maua lava ia Mati pe a uma le Palota! O le a la sou taofi?

2. Matauina i Tala Fou le tulaga mata’utia o le gaoi ua i Samoa nei! O le vaai i se tasi alii ma lona faleoloa na faatama’ia i le afi i le Flea Maketi talu ai nei-ai lava o le mea moni lea o le vaai atu lava i lea uso ua pagatia talu ai lea afi-ae toe o atu foi ma le ‘au-gaoi-ave faa-gaoi ana oloa e pei o faa-ata, o kilipa oti ulu, seleulu, lauulu faapipi’I, ofu lakapi, ma le tino-i-tupe e $2,000 sa i totonu o le sefe tupe-o pauta ma isi lava oloa.

Fai mai sia alii a fua i le tau o ia mea uma- e latalata i le $30,000-e le faitaulia ai ma isi mea ua alu uma. Talofa e ia Samoa ma le tulaga ua i ai nei- e vaai atu ua pagatia le isi tagata Samoa-ae alu atu toe fasioti. E le o atu e fesoasoani-ae o atu e su’esu’e mea aoga-ma gaoi meatotino a isi tagata sa taumafai ai pisinisi mo sina manuia o latou aiga!

O le a faapefea la ona manuia ia ituaiga o tagata pe afai e pagatia le isi uso ae alu atu ma ia toe sasa ia oti? Aisea ua faapenei ai le atunuu? Faamata e le o le mativa masaesae o tagata ua faapenei ai? Ai ua galo i ia tagata le tala i le Samaria agalelei? Afai la o ituaiga ia o manuia o loo saili e isi tagata-e lelei ona ta’u atu –e na ona faafaula’i ai o malala ola i luga o lou ulu-faatasi ai ma mala mata’utia e te le fia vaai i ai i luga o lau fanau! O le a sou taofi? 

Matauina i finagalo o nisi fai mai e sili pe ana tuu mai i luma le aso o le Faiga-Palota Lautele ia Mati-ina ia vave ai ona mou atu lenei anoano o finauga tau polokiki ma folafolaga ae le mautinoa pe taunuu pe leai! E taofi nisi o finauga lava ia o loo fai mai nei-sa fai mai foi i totonu o le Palemene i nisi taimi ua mavae atu-ma o lona taofi-maumau pe ana i ai nisi mea fou e mafai ona faatino nei- ae se’i o tatou vaai tino i ai!

O le isi taofi fai mai –e leai lava se mea e ese ai polokiki ma le taaloga foi lea o le poka-e tiga lava ona e le o ia te oe se sai poo le ka poo se teine-ae a lelei lava lau finau-e te’i lava ua e malo ai-ae leai ma se pepa malosi o loo ia te oa.

O lona taofi mulimuli la fai mai-maumau pe ana o’o mai  i nei aso –o filifili mai pea e itumalo o latou sui faatu mo le palota! O le lelei o lena tulaga-o le sui lava na filifilia e le itumalo- e mautinoa lava le avea ma Faipule o le itumalo. Ae o nei aso-ua matua le mautinoa lava pe o ai le sui o le a faipule-talu ai –ua le o toe filifilia e itumalo! O le mea la e ono tupu mai-o le filifilia o le tagata e le agavaa-ae malolo le tagata agavaa ma le talafeagai na tofia e le itumao! O le a sou taofi?

© Samoa Observer 2016

Developed by Samoa Observer in Apia