FAAALOALOGA I TAMALI’I

385 Hits

Tapena ma Tuufaatasi e Fuimaono Na’oia Faasavalu Touli F. Tupua mo le Samoa Observer. 

 

O le umi ona taatia o le tino maliu o se tamalii e le falelauasiina, o le faateleina foi lena o Afi Laau e tafu i aso uma i totonu o le malae o le nuu e o’o lava i le po; o isi afi la’au e tafu latalata i maota o le ‘au-osilagi poo totonu foi o ia fale; ma e tafu lava i le po atoa-o ia afi e faaigoa o ‘ta’iga-afi.

E faateleina le aofai o ia afi  i le afiafi a malama le taeao e falelauasi ai se tamalii; o ia afi e tu-vāvā solo  -ma o nisi o ia foi afi e tafu latalata pe tusa ma le 20 futu mai le tuugamau, ma e tafu lava se’ia o’o i le taeao.

O le pogai e tafu ai ia afi-la’au tetele -ona o le talitonuga o Samoa anamua, ‘o le oti o se lagolagi pogisa’; ae le gata i lea, o le talitonuga o Samoa- poo fea lava  e oti ai le tagata Samoa, e sau lava le Vaaloa e ao uma atu o latou agaga -ona ave lea i le Fafa o Saualii i Falealupo, e faavasega ai.

O lona uiga- e tuueseese agaga o tamalii ma agaga o tufanua. O le pogai la lea e tafu ai afi laau tetele nei -e faamalamalama  ai le ala e ui atu ai le agaga o le tagata ua oti, e faatali le taunuu mai o le Vaaloa. A leai ni afi- ona faigata lea ona saili e le agaga o le tagata ua oti, le ala e alu atu ai e faatali le taunuu mai o le Vaaloa. 

O sauniga o le osiga o le lagi e faatino e le ‘Auosoga’ ma e masani ona faatino mo le sefulu i le sefulu-lima aso, e faitau mai le aso o le falelauasiga. O ia sauniga e aofia ai taaloga o taua, fusu’aga, pi’iga, taua i uatogi, ma le veloga o Tao; ae o le po e faatino ai poula uiga ese e ta’u o le ‘Taupiga’ poo le ‘Velegese ‘e pei ona faaigoaina ai e Palate.

A mae’a lea, ona taape lea o tagata uma, ae amata, aemaise ai lava o se tuumalo o se tamalii maualuga, le tufatufaina o toga i e sa tautuaina le alii ua tuumalo-ma o lea ‘Ie ia e ta’u o ‘Ie o le Lagi, ma ua toe manatua ai le tufatufaina o toga o le tuumalo o Malietoa Laupepa i le aso 22 o Aokuso 1898; ma e faapenei lona faamatalaga e pei ona tusia. “Afai e tuumalo le Malietoa, ona potopoto mai lea o alo o le Alii ma lona Aiga.

O aiga tetele nei e valu  o Malietoa-o’Sapapalii, Manono, Safotulafai, Afolau, Mulifanua. Saoluafata, Faleapuna ma Falealili. O aiga uma na e potopoto mai -latou te talia toga o le Lagi ia Tuisamau ma Auimatagi. E muamua ona tali toga o Tuisamau, ona lafo lea o le isi ‘Ie ia Fata; o le isi ‘ie o Maulolo; o le isi ia Taliaoa.

Ona tali loa lea o Toga o Auimatagi; tali le ‘ie o Maulupe; tali le isi ‘ie ia Tuloa. Ona tali lea o toga o Faleata-te’a le isi ‘ie ia Unesepute; te’a le isi ‘ie ia Leleua; te’a le isi ‘ie ia Ulu; ma le isi ‘ie ia Ale. Ona tali lea o toga o Fale’ula; te’a le isi ‘ie ia Nu’uialii; ona tali lea o le toga o Luatua i Sale’imoa; tali le toga o le Fofoga o le Alataua ia Li’o; tali le toga o le Vaimauga ia Tamapua- o Alii Toetaufanua uma lava o le Tuamasaga -e tali o latou toga; ae muamua lava i na mea uma le ‘Mea Sa a To’oa ma Aliitasi.’ O le taimi la e uma ai le soifua, le taimi foi lea e motusia ai le sootaga taua ma le ilamutu.

O To’oa o le sui o le aiga maualuga o Tuimalealiifano o Falelatai, ma i le avea ma suli o Tuitofa To’oa; o lea na maua ai e Fonoti o Amaile lea ‘ie.

O le mea moni- o Leuta, o se alo tamaitai o lea aiga, sa nonofo ma Mr. Shuluter ua maliu, e ui lava ina tupuga mai le Tuiaana, lea sa feteena’i ma Malietoa, ae ona pau lava lea o le tamaitai o le aiga sa na tausia o ia se’ia o’o lava ina tuumalo, talu ai o le toatele o tagata o lona aiga e toto faatasi, e le’i auai ona o le le fiafia i le masiofo a le Tupu.

E ui lava ina leva aso o lenei faiga, ae sa taualoa tele lenei sootaga ma le ilamutu i aso ua mavae. E faapena foi le tulaga na aafia ai Aliitasi lea e fesoota’i o la aiga ma Su’a i Safata, poo le Ama ia Matoto. E i ai lava isi tagata Samoa fai mai e ui lava ina e le’i avea Malietoa Laupepa i lena taimi ma Tupu, ae sa matua aloa’ia lava lona tulaga tamalii.

O lea la ua tatou iloa nei, o le malosi lava o le aiga, e maopoopo ai sootaga o sea aiga, ma faatulaga ai vaega uma o le soifuaga faa-Samoa, ma putiputi i ai i le fanau mai se’ia o’o i le oti. O le mea lea, o le tiute o le aiga o le mautinoa lelei lea ua i ai se tuugamau mo le tagata ua maliu i eleele o lo latou lava aiga, ma ia ‘aua ne’i salalau atu ona ivi i matā-matagi e fa. E leai se mea e sili ona tiga i lo le tanu o se tasi i se fanua ese poo le lē tanuina.

Tusa lava poo se tasi na maliu i se ala uiga ese, e pei o se taua; ona fai mai le talitonuga o Samoa e fetafeaa’i solo lona agaga, ma afai e mafai- e o atu uma lava lona aiga i le mea na maliu ai ina ia mafai lava ona pu’e mai lona agaga ua faasevasevaloaina solo.

© Samoa Observer 2016

Developed by Samoa Observer in Apia