O le aualuma o le isi lea faiganu’u

Tusia Vatapuia Maiava ,

275 Hits

Sa’oao ma le Aualuma a Savaia Lefaga.

Sa’oao ma le Aualuma a Savaia Lefaga.

I le fa’atalatalanoaga a le Fofoga o Samoa ma se tasi o ta’ita’i a le Aualuma a Savaia Lefaga o Maria Reti Simanu sa ia fa’ailoa ai o le aualuma o se tasi lea o faiganu’u taua i totonu o so’o se afioaga.

O le talitonuga a lea tinā ua telē lava le suiga o lenei vaitau ma aso ua mavae.

“O le suiga muamua ua telē le tomai pe a fuafua atu i aso ia sa fai ai e nai lo’omatutua.

 “E le’i i ai se tomai ma se malamalama mai fafo e taumafai e fai ai ni suiga fou i totonu o le nu’u ona ua masani lava latou o le tala lava e fai atu ai o le mea fo’i  lena e tatau ona fai.

“A’o aso la nei ua tatala le avanoa e fa’asoa ai le malamalama auā ua to’atele teine o le aualuma o lo’o aumau i fafo, ma o lo’o maua galuega lelei e pei o faiaoga, fa’afoma’i ma le tele o galuega lelei o lo’o latou mau mai i le olaga i fafo atu o le nu’u.

“O lea fo’i matou te fautuaina ai lava e matou ia ina ia telē se malamalama’aga  o tagata nei i totonu lava o le matou nu’u.

 “Ae ou te leiloa la i nisi nu’u po’o le mea o lo’o alu lava i le fa’aanamua o le ta’ita’ia lava e le mea sesē le mea sesē ona o lepulega tau’ave e le aumatutua.

“O le taimi nei la lae alu lava i luga o le matouta’ita’iga ae tu’u lava le avanoa i le lautele e fa’aali mai ni latou manatu e fesoasoani fo’i i le tofā ma le fa’autaga.”

Sa fesiligia fo’i le tama’ita’i i ā Simanu po’o le ā tonu lava le tulaga o le aualuma i totonu o se faiganu’u.

“O le aualuma o lesi lea faiganu’u e pito sili ona tāua i totonu o se nu’u.

“E uma loa ali’i ma faipule, sa’oao ma le aualuma ona taulel’ea loa lea,

“E 3 lava faiganu’u a le nu’u o mea uma fo’i la e fai e pei ona e silasila ai nei e aumai lava le fa’amuamua a ali’i ma faipule i sa’oao latou te lotea mea uma lava e fai ina ia aua lava ne’i i ai se fafine (se’i tulou) e lotea mea e fai aemaise lava mea taumafa.

“O le itu fo’i lea e iloa ai e mamalu lava le nu’u ia pe afai o teine lava o le nu’u e faia, o le telē lena o le matāfaioi a le aualuma i totonu o se nu’u.

“E o’o fo’i i mea e manana’o ai ali’i ma faipule fa’apea le ekalesaia e fa’amoemoe lava i le malosi o teine o le nu’u.

“Ae a lē lelei la tagata e ta’ita’ia le aualuma e le malosi le lagolago a le itupā lea.”

O le a le ese’esega o Apia ma i’inei i le itu i le aganu’u?

“O le ese’esega o Apia ma i’inei e leai ni faiganu’u a ali’i ma faipule e latou te fa’amalosia le fa’asamoa.

“Ona o tagata ese’ese mai i ma o o lo’o nonofo i le taulaga e le o se nu’u e fai ai se fa’asamoa o le ala foi lena e ala ai ona fa’apena.

“E pei o le fa’ataitaiga o Vaitele o tagata o lo’o ua lisi i fanua a le malo ae leai se nu’u foi lele e fa’apea o ali’i ma faipule o Vaitele  ma ni a latou saoao ma le aualuma.

“E na’o le pau le itu lea e tasi ai le pitonu’u lea o Apia na o le ekalesia.

“E le mafai fo’i la ona pule e sesi ia nu’u i Apia ona e le o ni nu’u e pei o tua nei e ma’oti lava le nu’u ia ma lana faiganu’u.”

© Samoa Observer 2016

Developed by Samoa Observer in Apia