Suiga i le asō
O le agaga fa’afetai o le tamā i a Toloto Mulivai, 70 le matua o le soifua o Fusi Safata ona o le tele o atina’e o lo’o ua maitauina nei i totonu o le atunu’u.
“O atina’e nei, e i ai ona itu lelei e i ai fo’i ona itu e le lelei ai.
“Ia o lo’o ua tele lava le suiga ua i ai aso nei ma aso ua alu, ma o lea le fiafiaga o lo’o ua ou i ai nei e ui lava o lo’o fai sina taugata o le soifuaga ae o lo’o agalelei pea le Atua.
“O la aso , ia sa le tele ni tupe sa i ai pei o nei aso, sa taugofie le tele o oloa i la aso, e maua le falaoa i le sisipeni.
“O le tele o aiga, e pei e le aga’i tele ini faleoloa e fai ai ni fa’atau ae e pei o le tele lava o mea fafaga e pei ona i ai talo , ta’amu o ufi, o fa’i ma le tele lava sa tua i ai.
“E le gata i lea ia , sa i ai lafu pu’a’a i so’o se aiga, o na vaega uma sa fa’amoemoe mo le tausia o aiga, o le tausiga o faife’au, o matai , matua aemaise ai lava i fa’alavelave.
“E solo lelei mea uma , maua e tagata uma le filemu ia ae o nei aso ia e pei ua tele le mau atina’e o lo’o ua i ai nei.
“Ae pei ua alu ai luga ma le tele o le tau o oloa ma o se tulaga e le mafai ona o tatou te’ena i le taimi lenei.
“O suiga lava o lo’o ua i ai nei, ia o lena lava o le a o tatou alu ai.
Na ia fa’ailoa lona misia ai o le manaia o le olaga fa’asamoa moni sa i ai aso ua mavae.
“I a te a’u lava ia, ia e le tau fa’amatalatalaina le manaia o mafutaga i totonu o aiga i la aso ua mavae.
“E nonofo fa’atasi aiga uma, e leai se mea e vevesi ai, e ala ona vevesi ua o’o le taimi e fai ai mea’ai ae ua uma na o se faigalotu.
“E usita’i tamaiti ma e fa’aaloalo tagata uma, e leai se va’ai atu ua ai savali se isi, e iloa e tagata uma a tautala ia nofo i lalo.
“O le savali, nofo i lalo o le a le tagata e fai e tatau lava ona fai mea uma ma le fiafia aemaise le ava fatafata.
“Ae tu’uaia ia o nei aso ua le toe tutusa, e pei ona ou fa’ailoa muamua ia ua tele suiga, ma e i ai ona itu lelei e i ai fo’i ona itu le lelei.
“Ae soia ia, tatou alu ia fa’apea!