Tatala faitoto’a o le Malumalu o Sagato Iosefo i Afega

236 Hits

<p><strong>Masiofo Filifilia Efi, lana Afioga Tui Atua Tupua Efi ma le Akiepikopo Alapati Mataeliga Lui i le tatalina ole malumalu a Afega.     </strong></p>
<div><strong><br /></strong></div>

Masiofo Filifilia Efi, lana Afioga Tui Atua Tupua Efi ma le Akiepikopo Alapati Mataeliga Lui i le tatalina ole malumalu a Afega.     


Ripotia e Lanuola Tupufia

Fa’aliliu e Maiava 

 O ananafi na ta’ita’ia ai e le Akiepikopo o le Ekalesia Katoliko i Samoa, o Alapati Lui Mataeliga, le sauniga na tatala aloa’ia ai faitoto’a o le Malumalu o le Ekalesia Katoliko i le afio’aga o Afega, ina ua mae’a ona toe fa’afouina atoa.

E le gata i le fa’apa’iaina o le malumalu o Sagato Iosefo, ae sa fa’apa’iaina ai fo’i  ma le Maota fou o le Fa’afeagaiga, lea e tusa ma le $659,000.00 le seleni na fa’aaluina ai, i ia galuega uma.

Sa avea ma malo-fa’aaloalogia, Lana Afioga, Le Ao Mamalu o le Malo, Tui Atua Tupua Tamasese ‘Efi ma le Masiofo o Filifilia ‘Efi, fa’apea le anoano o le mamalu o le atunu’u sa ‘auai i lea fa’amoemoe. 

O le to’atele lava, o Afioga a Patele ma aiga fa’apea uo a sui o le Ekalesia. I le fa’apa’iaina o ia maota uma, na fa’ailoa ai e le ‘Akiepikopo i sui o le Ekalesia, e le taua le fou o maota ua fausia nei, pe a leai nisi e fa’aaogaina.

Na toe fa’amanatu ai lea e Mataeliga le tala i se patele ma se tagata-asiasi, sa fesilisili pea, pe mafua i se a ona leai o ni teu-fugala’au ma teu-matagofie i se tasi o fa’amoemoe fa’apea sa faia.

Saunoa Mataeliga; na fai le patele i le tagata-asiasi lea, e sili pe a toe fo’i atu i le isi aso e soso’o ai.

“O le aso lea, e leai ni fiafia sa faia, ae sa to’atele tagata maualuluga ma malo sa i le nofoaga lea. Sa pesega ma fai talosaga, ona fai atu lea o patele i le tagata-asiasi, o fugala’au ia ma teuteuga o le sauniga. 

 “Po’o le a lava le matagofie o lenei maota, ae a leai se tasi e tapua’i ai a tatalo, ua le fa’ataunu’uina le finagalo o Le Atua mo Lona Maota Tatalo.” 

E 24 matafale o lo’o tautuaina le Ekalesia lea.

Na ta’ua e le Fesoasoani o Etuale Etuale, na amata galuega o le malumalu, i le seleni e na o le $10,700.00 mai ia Fa’alele Tuafiti. 

Sa fa’atino sa’iliga-tupe a le Ekalesia – o bingo, taiga-otaota ma talosagaina fo’i ni meaalofa ma fesoasoani mo le fa’atupeina o le fa’amoemoe. 

Sa maua mai fesoasoani mai sui o le Ekalesia ma le nu’u o lo’o aumau i Ausetalia, o Pago Pago ma Savai’i fa’apea kamupani ma le ‘Au-faipisinisi ma tagata ta’ito’atasi.

Sa fa’afetaia e Etuale le a’ao-agalelei a latou sa fesoasoani atu i le Maota o Le Atua ae maise fo’i nisi sa foa’i fua atu nisi o vaega mo le falesa.

Mai le aofa’iga atoa e $659,000.00 o le tau o le galuega – e aofia ai togala’au ma le pa, ae o lo’o totoe pea le ‘aitalafu e $158,000.00 e le’i mae’a ona totogi.

Na ta’ua e le Failautusi o le Ekalesia, o Lasi Tevaga, e le faigofie le galuega sa faia.

O le tasi o lu’itau tele sa feagai ma le Ekalesia, o le tutuli ‘esea mai le fa’atinoga o sa’iliga-tupe masani.

Na ta’ua e Valasi, o le toe fa’afouina o le falesa na amata ia Novema 2014 ma fa’ama’ea i le Aso Gafua o le vaiaso nei.

Na ta’ua fo’i, o le fuafuaga sa iai, e fa’alelei na o nisi o vaega o le falesa peita’i a’o fa’agasolo le galuega, na fa’atoa iloa ai, e tele se galuega e tatau ona toe fai.

O le Susuga a Silao Va’agai Salesulu ma le Faletua o Ana o lo’o tausia le Ekalesia lea I Afega.   

O le Faletua lava sa ia o’oti le lipine e tatala ai le Malumalu

© Samoa Observer 2016

Developed by Samoa Observer in Apia