LAUGA - “O lau tautoga i le Atua”

By Rev. Petaia Setu 19 November 2017, 12:00AM

(Salamo.50:14)


O lo tatou talitonuga, o le mea ua iai le loto, e iai le auala e fai ai. Pe faigofie poo le faigata, o le auala lava lēna. O le lagisoifua, o lo tatou saolotoga. E ui ina sa tīgā ma faigata, ae ona pau lea o le ala sa tauto ai o tatou tuā’a i le Atua mo so tatou mālo tutoatasi. Tatou te le i ositaulaga ia Niu Sila i ni palapālā mālo a le atunuu poo ni mana’oga o papālagi. A o le loto sa tuu i le Atua; sa faamau i le ola. O le tautoga lea a nai o tatou tuā’a ua lagomau mai i ti’asā. Fai mai la tatou matua, “ia e avatu foi i le Silisili ese mea na e tauto ai.”

O le upu “tautoga” o le upu faigata. Auā o le ‘tauto,’ e le māmā. O le tautoga, o le tautinoga a le ola ua mălie iai le loto,  e tauto ai. Ae maise lava, o loo i le Atua le faamasinoga, o le tagata ma lana tautoga. Pe e te tauto faafaipule, pe e te tauto faafaifeau, poo le faatausima’i, poo le malu o le mālo, e taoto uma i le Atua tautoga. O lau tautoga, a oe lava i le Atua. Ia e manatu i le mea lenei Samoa. Se ā se mea ua e tauto ai i le Atua, ia e iloa Samoa, o le mea ua tuu loa. E le toe foi mai. E tuu ’oti. Ua topano i le Atua. E fai i le loto. Le loto fuatia ifo ua lelei. O le agaga mamā e vivii a’e ai i le Atua. I le talitonuga, ua iai le alofa atoatoa i le Atua.

Se i o tatou vaavaai i le tautoga a Isaraelu i ana taulaga osi i le Atua. Ua o se mea fua i le au ositaulaga ma faitaulaga a le nuu ona faama’ite taulaga sii atoa i le Atua i lea aso ma lea aso. Ua manatu, e lava le Atua i le telē o le povi. Fā’i lava a le nuu o le tele o povi po’a, ma ’oti po’a, ma mamoe po’a e faamălieina ai le Atua! Ua o se aga ua masani ai. Ia silafia e le Atua mai le lagi, ua le tuua ni lelei a o ni masei. Ua faataunuu aga masani faalelotu ma tu po faiga faavae a le nuu. Ua fai taulaga i mea silisili. Ua faamatietie le Atua i galuega ma mea ua faia i lima o tagata! Ua pei ua talatala mai i le  pese a Asafo, le ata atoa o Isaraelu i ia ona po, o loo ua limataitaiina ai Samoa i nei ona po. A o le pese nei, o le a’oa’iga o le loto ma le faamaoni i le tautoga. Le loto ua solifeagaiga. O le aoaiga i le taulaga sa faia ona o aga masani; sa faia ona o le faatonuga. Ua le i faia ona o se lagona fuatia ifo e lelei. A ona o le fefe ma le pala’ai, a o se viiga foi ma tala ‘ave o Pai ma Lafai!

Se ā se tautoga ua e fofola i le Atua? Ua e tauto i le Atua i ni a? O loo lagi e le fai Salamo le finagalo manino o le Atua. Ou te le mana’o i ni au povi po’a. Ou te le mana’o i ni au ‘oti ma ni au mamoe. E le manao le Atua i ni mea o i lou fale poo ou lotoā (f.8-9). O ’e manatua o le lalolagi ma mea uma o iai o mea a le Atua? (Sal.24:1) Ua fia ‘ai ea le Atua? Po ua oge mea ea le Atua? A o le i avatua se mea i le Atua, ua leva ona silasila e le Atua lou loto. 

Samoa e, pe la’u uma le palapālā mālo a le atunuu i le Atua, e le mana’o ai le Atua. E le faatauina lo tatou faaolaina i mea na. Ua le o la’ei foi na o le alofa i le Atua. “Auā o o’u manatu, e le o outou manatu ia; o o’u ala e le o outou ala ia….”(Isa.55:8). Ua silafia lelei mai e le Atua, o le tautoga ua le iai atoatoa le loto, o se taulaga ua faia ma le oono.

Samoa e, soo se taulaga tatou te fai, tele pe itiiti, ia faia ma le loto faafetai. Ia e fai ai le viiga i le Atua. Ia fai mălie. Poo lau galuega, poo lou aiga, poo lau fanau, poo lau tane/ava, poo oe foi, poo au measina, ia faia ma le faamaoni. ‘Aua le fetōtōa’i; aua foi le fai toa’i.( Galu.5:2). “Auā e matuā sueina atu  ai ia te oe e Ieova lou Atua; e fai lea ma agasala ia te oe” (Teu.23:21). Ua sili ona silafia e le Atua o tatou loto, nai lo tatou poto. Ua fetalai mai le Atua, “O le viiga, ia e faia lea ma taulaga i le Atua.” O le faigofie ia o mea o loo manao mai iai le Atua. E manao ia te oe. E le o nisi lava mea. O oe. Le oe femoumoua’i. Le oe o taulamua i mea valea ma pulega sesē. Le oe o loo tautala  gagana a tagata atoa ma agelu ae leai se alofa. E te fai tulafono ae e te soli tulafono. Le oe ua e inoino i le aoaiga ma ua e lafoa’i le finagalo o le Atua. Le oe o loo faama’ītea tuinanauga o le lalolagi ma mea e ‘ai e le matagi. Fai mai le Atua, “ia e avatu foi i le Silisili ese mea na e tauto ai” O le a lau tautoga i le Atua? 

Le ekalesia e, e te le tauto i le Atua i ni fale, poo ni atiinae, poo ni pisinisi. O oe! E te tauto i le Atua ia te oe lava. Ia faafouina lou oe. Le oe ua lagona lona faatauvaa, ma ua tagi atu i le Atua i se loto mamā; se loto fou; se loto mau (Sal.51:10) O le loto ua momomo, o le loto lenā ua masofasofa i le alofa. E fiafia iai le Atua (Sal.51:16-17) Auā ua na o lea le loto, e mafai ona fai taulaga ai i le Atua i le viiga ma le pese faafetai. Fai mai Iona, “A o a’u, ou te fai taulaga ia te oe ma le upu faafetai; ou te faia le mea na ou tauto ai.”

Le au uso e, o le tautoga a le auauna faauuina, e tuu loa le ola i le Atua. E le toe foi mai. O lona uiga, ua tuu oti oe i le galuega, e te le toe pule oe ia te oe. Ua topano lou ola mo le Atua. O le taulaga mamā la lea. O le tautoga e afua mai i le loto ua mălie. O se taulaga e tali mălie atu ai i le agalelei ma le faamaoni o le Atua. O’u uso e, o le tautoga outou a aiga ma nuu. Ia outou iloa le finagalo o le Atua. Auā e lua lava fili matautia o loo ua sesē atoa ai le galuega molimau sa tauto ai – o le poto, ma le pule. O kama ia, ua mafatia ai le tino o Keriso. Ua tūgā ai manu’a o mamoe. Ua ta’ape’ape atu ai ma le lafu. Auā ua mafuli le ekalesia i le teuteuina o le tino i fafo, a o se upu i le ola faaleagaga ua galo. O le a lau tautoga i le Atua? O le faamalosi mo oe ma tatou uma, ia mata’u i le Atua, ma faia le finagalo o le Atua. ’Aua le faia faale tagata; ’aua foi le palaai i tagata. Faalogo i upu a le teine lea sa fai i lona tamā, “Na e tauto i le Atua ia te a’u? Ia e faia e tusa ma lau tautinoga na e tauto atu ai ia Ieova” (Faama.11:36). Ua manaomia e le ekalesia ni tautoga, e mafai ona aveesea le mamafa o le amoga. Ni e ua tauto, ina ia fai ma fofō. Fai mai le Salamo a le fatu pese, “ou te faailoa atu ia te ia le faaolataga a le Atua.” (f.23)Ioe, o i’u lelei la ia o le tauto faamaoni. O taulaga sili ia. E manino ai le vaai atu i le faaolataga a le Atua. Ia manatua, soo se tautoga, e faavae i le alofa. Auā o le alofa, e sufi ai le viiga i le Atua. E fai ai le taulaga faafetai i le Atua. A nanea lau tautoga, pe le o le taulaga sili ea lea? A malie lau tautoga, pe le o le taulaga mālo ea foi lea? Ae faapefea ona fai oe ma taulaga mālo, pe afai e le o lou ola e fai ai lau tautoga?

Le ekalesia e, ma lo’u atunuu Samoa, o lau taulaga, o le ola vivii i le Atua. O le tautoga e faia i le agaga atoa ma le faamaoni (Ioa.4:23) O lau taulaga mālo lenā i aso uma o lou ola.

 

Amene

7737063/7783782

By Rev. Petaia Setu 19 November 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>