O le sailiga o se seleni I lenei vaitau o se tulaga ua matua faigata lava.

O le talitonuga lea a le Tama ia Samuelu Maka 40 tausaga o lona soifua mai le afioaga o Leusoali’i. O Samuelu Maka ua to’a ono lana fanau ma o lo’o ia tausiaina lona aiga e 12 tagata o lo’o iai.

Na maua le avanoa a le Tama ia Samuelu Maka e talatalanoa ai male Fofoga o Samoa a’o fa’atoa foi mai mai le tapenaina o le to’ona’i a le latou fale mo le Sapati.

Na ia saunoa ai I le faigata o lenei vaitau I le sailiga lea o le itu tau seleni.

“O le matou aiga o lo’o fa’amoemoe pea I le ma’umaga pei ona e tagataga’i mai foi lea fa’atoa foi mai foi aua tapenapenaga mo le to’ona’i mo taeao.

“Ua na’o le pau lava lea o le mea o lo’o fa’apena ona tausi ai le matou aiga ma na’o le pau foi lea o le auala o lo’o maua ai se seleni aua le tausia ina lea o le matou aiga.”

Na saunoa foi le Tama ia Samuelu Maka I le faigata o lo’o feagai nei ma lona aiga ona o le taugata tele o le tau o le soifuaga ua iai nei Samoa.

“O le seleni lava o lo’o maua mai I le fa’atauina o mea toto mai le fa’atoaga o lo’o fa’apena ona totogiina ai pili o le matou fale.

“O lo’o fa’aaoga foi lenei seleni aua le totogiina lea o mea aoga a le fanau ia aemaise ai foi fa’alavelave fa’aleaiga pe omai foi.”

Na ia saunoa foi e leai se isi o le latou aiga o fa’apena ona faigaluega ua na’o ia lava o lo’o fa’apena ona tausia to’atasia le latou aiga.

“O lo’o matou nonofo pea ma nai o’u matua I le taimi nei ma si o’u to’alua ia ma le fanau. Ia o lo’o fa’apena foi ona matou nonofo ai ma le fanau a lo’u tuafafine o lo’o fa’apena ona nofo I Savai’i.

“Ia ua mana’o foi e saili se galuega I lenei vaitau I le faigata o le soifuaga e fesoasoani I le ma’umaga aua le tausiaina o le aiga, ae paga lea o lea e laity lava si a’u fanau, ae o lo’u to’alua o lea e nonofo ma nai o’u matua ae ou alu I le ma’umaga I aso uma aua matou meaai.”

Na toe fa’aalia foi e le Tama ia Samuelu Maka lona fa’afetai ai I le lagolago ua maua mai I le gataifale aemaise le fa’atoaga aua le tausia ina o le latou aiga.

“E lagona lava le fiafia I le loto ona o le maua pea o le fesoasoani mai le ma’umaga aua meaai mo le aiga.

“E fiafia foi I le gataifale ona o lo’o maua ai foi le fesoasoani mo meaai I nisi o aso pe a le lava le fa’asoa.”