Saili manuia i atunu'u i fafo

Tusia Ulimasao Fata ,

45 Hits

Sulesa Fineitalaga Aloniu.

Sulesa Fineitalaga Aloniu.

O le olaga lava ua iai nei Samoa ua matua faigata lava. 

O le talitonuga lea a le Tina ia Sulesa Fineitalaga Aloniu 52 le matua o lona soifua mai le afioaga o Nu’u Fou.Na maua le avanoa a le Tina ia Aloniu e talatalanoa ai foi ma le Fofoga o Samoa I le aso Anafi a’o aga’i ane I le fale ua mae’a lana fa’atau sa faia I se faleoloa lata ane I lana fale.

Na saunoa Aloniu o se tasi vaega ua mafua ai le faigata o le olaga I Samoa nei o le taugata lea ua iai nei le soifuaga.

“O le tau o le soifuaga ua iai nei Samoa ua matua faigata lava ona o le taugata ma ua fai lea ma mafatiaga I tele o aiga I Samoa nei.

“O le taugata foi foi ua iai le soifuaga nei I Samoa ua le talafeuga foi ma tupe maua mai a tagata mai galuega o lo’o fai.”

Na saunoa le Tina ia Aloniu ua atoa nei le lua tausaga talu ona me’i atu ma fa’amautu I Nu’u Fou ae o lo’o iai lava nai mafatiaga o lo’o feagai ma ia.

“Ua lua nei tausaga talu ona matou me’i mai iinei ae ua faigata foi le olaga iinei ona o le tulaga leaga o lo’o iai nei matou auala I le matou fale ona ua faigata ai ona o’o atu le pasi ia matou.

“O le isi itu faigata I le matou nofoaga nei o le lava o le vaega fanau I autafa ane o le matou fanua e fai ai sina tama’i ma’umaga e tapa atu iai I le faigata ua ia le tau o taga araisa I lenei vaitau.”

Na saunoa le Tina ia Aloniu o amioga o le tupulaga I lenei vaitau o se tasi lea o fa’anoanoaga tele ua iai nei I le olaga ua iai Samoa.

“O le isi itu faigata o lo’o matou feagai nei I lenei nofoaga o le itu lea o le leaga ma le le mafaufau o uiga o le tupulaga o lo’o fai nei.

“Ua fefefe lava le matou aiga pe a o’o ina pisa mai nei tupulaga I le leva o le po ona ua le mafaufau lava, ia na’o le pau le mea e mafai ona fai o le vili lea o leoleo.”

Na ia fa’aalia foi talu ai le faigata tele o le olaga ua iai nei Samoa, o lo’o ia una’ia lana fanau ina ia su’e manuia I atunu’u mamao.

“O le olaga lava ia ua faigata tele I totonu o Samoa nei ona o le taugata o le soifuaga ua iai nei aemaise le tele o mea ua tutupu I Samoa nei.

“O lea o lo’o finau atu pea I le fanau e saili manuia loa I atun’u e mamao ma lafo mai ni tupe aua le tausia’ina lea o le aiga.”

© Samoa Observer 2016

Developed by Samoa Observer in Apia