Ia fiafia e ‘au’auna i le Ali’i

By Vatapuia Maiava ma Ilia L Likou 19 October 2016, 12:00AM

O lea le talitonuga o le tinā i a Peleiupu Soifuaga o Patamea Savai’i ma Vaitele-Uta, ma o le isi lea mafua’aga i le fa’afualoa ai pea o lona soifua.

Ua  89 le matua o lona soifua i le tausaga lenei, o le aso ananafi na maua ai le avanoa e fa’atalatalanoa ai le tinā.

O lona finagalo fa’aalia - ua tele  suiga ua i ai Samoa i lenei vaitau.

“Ia o la aso i si o matou nu’u o Vaipapa (ga’uta o Faleolo) na ou ola ane ai ma le tamā o le aiga ma le fanau, ia sa faigofie mea uma.” Le tinā i a Peleiupu i le Fofoga o Samoa.

 “Sa ta lava le popo i na aso a le Esetete Tausi ia ma fesoasoani ai le tausiga o le fanau aemaise lava i a latou aoga.

“E ui ina laiti totogi na maua ae na taugofie le tele o oloa, ia pe leai fo’i lava se vaemoa ae pei o la aso a maua le eleni ia o le aiga milionea na.

“O le Aso Sa lava ia, a maua le eleni ia ua pei lava o lae ‘ai le vaemoa, ia ae o nei aso , ia a tau fa’alala atu le eleni i tamaiti ua leai mai.

Na ia ta’ua o le isi lea mafua’aga ua tele ai  mau fa’ama’i ona o le tele o mea’ai ua ofi mai totonu o le atunu’u.

“Ia o la aso , a maua lava le ti ma le fa’alifu i le vaiaso atoa, ia e pei e leai lava leai se mea e popole ai, fua ae o nei aso ua tagisa i mea’ai mai fafo ma ua tele ai ma fa’ama’i.

“Atonu o le isi fo’i lea itu o lo’o fesoasoani tele i lo’u malosi ai lava e o’o mai i le taimi lenei, aua o la aso a maua lava le iputi ia ua fiafia fo’i.

O le tausaga e 1987 na o ese mai a ii Vaipapa ma aumau ai loa i Vaitele-Uta ina ua maua ai le fanua a le aiga.

“E moni lava la na solo lelei le olaga sa i nonofo ai i Fanua o le Esetete i Mulifanua ae sa i ai lava le naunauta’iga o a’u le tinā, e pei e sili ona omai e su’e se fanua e latalata i le taulaga ina ua va’ai atu ua to’atele le fanau ma ua tupu le aiga.

“Ia o lea na o matou omai ai loa, ia o matou le aiga muamua le fa’alava lenei (fa’afesaga’i ma le Malae Ta’alo i Tuana’imato) ae o le isi pito atoa lea ia sa i ai le fa’ato’aga tele a le Esetete Tausi.

“E leai ma ni fale sa i ai, ia sa faigata fo’i le amataga aua o a’u ou te sau ma lo’u tofi tiakono mai Vaipapa i le E.F.K.S.

“Ia e leai ni lotu sa i ai i nei vaega o le atunu’u aua na’o toganiu ma togavao loaloa, ia sa matou lolotu i le E.F.K.S. i Elise, ua alualu ua mamao ia ua matou o loa i Tulaele i a Fa’au’uga ua lolotu ai.

“O le fa’aiuga o le 1988, masalo ua silafia e le E.F.K.S. ua tele tagata i’inei i Vaitele-Uta, ia na fai ai loa lotu i le maota o le tamā Faife’au Malōlō i a Vaialia Talatonu, na alu alu a’i ia tupu tagata.

“Ona tofia mai loa lea e le E.F.K.S. le Fa’afeagaiga i a Emau Tofilau e na te va’aia le lotu, ma o ia la lea na fa’avaeina le Ekalesia ma le faifeau muamua i le E.F.K.S. i Vaitele-Uta lea o lo’o ua i ai nei le 13 Aso.

“Ia oka so’u fiafia ua le gata la ina latalata le lotu ae ua lelei avanoa mo le fanau aoga ua o’o mai lava i le taimi lenei, ia  fa’asolosolo mai lava lea o Faife’au o lo matou lotu  i a Emau Tofilau, Faitala Talapusi, Foma’i Lafaiali’i ia ma Muao Fagasua lea ua i ai le taimi lenei.

“Ia o lo’o o’u fiafia lava e ‘au’auna i le Ali’i ma to’aga i le lotu aua e maua ai lava le malosi ma le manuia o fanau.

By Vatapuia Maiava ma Ilia L Likou 19 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>