Fia fa’aleleia auala

By Vatapuia Maiava 19 October 2016, 12:00AM

“Ia e pei ona outou va’ava’ai atu ai, ia ua leaga lava le auala e sau ai i tua nei Falelauniu.” Fa’aolataga Feagai, 37 le matua o Falelauniu.

O le aso ananafi na fa’ailoa ai e Fa’aolataga ua tele ina alofia e ave ta’avale laiti ona toe uia lea vaega o le afio’aga ona o le fa’aletonu o lo’o ua i ai ne i le auala.

“Ia ua fai lava si faigata o le mea lea ua i ai aua e pei e foliga mai ua le toe va’aia nisi e omai e fa’aleleia le tele o vaega o le auala  o lo’o omo’omo.

“Ia ua pefu fa’asoloatoa aemaise lava pe ā o’o ina mugalā aso, ae le gata i lea o le tele o aso ia ua le mafai ona alofia le pefu tele mai o luma o le auala.

“O le tulaga e pito sili ona le lelei ua i ai i le taimi lenei, e pei ona outou maitauina mai ia o tamaiti, ae a o’o lava ina pefu fa’asoloatoa ia o le tulaga alofa e va’ava’ai atu ai i fanau.

“Ua na’o le flu o tamaiti ma ou te iloa e le na’o matou o lo’o ‘a’afia i lenei tulaga.

O le isi fa’anoanoaga o le tinā ona o le le fa’aleleia o auala e pei ona fa’amaoti e sui tauva o le palota na se’i mavae atu nei le fa’aleleia pe ā tūtū mai i le tofi.

“Ia o le mea lea ua i ai, ua fiu le mea e tatali le ‘au vaega lea na ekisi ai ma fai mai folafolaga i vaega nei e fa’aleleia pe ā tula’i mai le tofi.

“Ae foliga ua alu alu ua uma atu lava le palota, ia ua fiu e tatali e pei ua leai lava ma se isi o toe iloa mai.

“Ua uma atu lava le palota ma uma atu ai lava, ae o folafolaga lea na fai mai e pei lava e moni.

“O le mea sa’o lava ia sa ou tau le alu e saili i le taimi o le palota ae na omai  i a’i matou mo le ekisi, ae o lea ua uma atu lava ma uma le toe iloa mai.

O le isi itu faigata  o lo’o i ai le taimi lenei na ia fa’ailoa, o le fa’alapisi o nisi o tagata i lea vaega o le atunu’u.

“Ia e pei o fanua e le’i fa’ato’aina ia ua pule lava le tagata i lana aga e fai ai, ma a sau le manogi ia e ‘a’afia ai uma nisi o aiga i’inei.

“E pei o lea le talosaga i le malo ina ia fesoasoani mai mo se tali o fa’afitauli i tua nei.

By Vatapuia Maiava 19 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>