Ia galulue ae aua le nofoa’i

Tusia Vatapuia Maiava ma Ilia L Likou ,

187 Hits

Le tinā i a Foketi Brown

Le tinā i a Foketi Brown

“O a’u ē ese ma lo’u ita ae paie mai se isi o la’u fanau.” Le tinā i a Foketi Brown o Matautu Lefaga  i le fa’atalatalanoaga ma le Fofoga o Samoa.

O Foketi ua 88 le matua o lona soifua, e to’aiva ona alo, ma o ia o se tinā e fiafia ma ua leva i le fa’atinoina o galuega taulima.

“Ina ua maliu si o’u tinā ma ua fai lo’u to’alua ma le fanau to’atele, na ou fa’aauauina mai ai lava lea o le  gaosiga o siapo, titi fulumoa, o sei, o pale fuiono, o le lalagaina o ato…ma so’o se itua’iga mea taulima lava…ou te iloa fai.

“Ou te ta’utino atu lava, o a’u galuega nei na ave fa’atau ina ua fa’atoā ma nonofo mai ma le tamā o tamaiti na ola ola lelei ai le gasologa o le olaga o le fanau ma le tausiga ai o le aiga.

“Na ave fa’atau, na maua mai tupe, na fesoasoani i pasese o le fanau i aoga a’o laiti, o fa’alavelave fai o le aiga….e leai lava se isi mea na fai i ai…na o lo’u tatalo lava i le Ali’i e aumai le malosi e fa’atinoina ai vaega uma nei.

“Ua tele ina fa’ai’ui’u aoga a le fanau, ona amata loa lea ona ou tago toso mai e fa’aa’oa’o i ai le gaosiga o  galuega taulima…ua ou va’ai atu ua o latou fiafia lava e fai…ma o ‘i’ina na ou iloa ai o lo’o tele le agava’a i a te’i latou e fa’atinoina ai vaega nei.

“O le taimi lenei e leai ma se isi o la’u fanau e le iloa le gaosiga o le tele o vaega ia e pei ona silasila atu nei i ai, ma ua fesoasoani tele i o latou aiga.

“O la’u upu e fai ai pea, e ala ona fa’aletonu le aiga o le tagata, ona ua fa’avaivai ma fa’apalapala…ua o tatou iloa le soifuaga o lo’o ua i ai nei, ua le toe faigofie.

“O le mea moni, a o tatou nofoa’i ai, ia ua tupu le fa’aletonu.

 Na saunoa Foketi, e le’o toe mafaia ona ia fa’atinoina  le tele o galuega e pei na masani mai ai.

“Ia ua amata fo’i ona pē pē lima o le lo’omatua, pe ā toe minoi i le taimi lenei, e pau lava la’u galuega lea ua fai, ia o le fa’asino pea ma otegia le fanau i le tele o taimi pe ā ‘augatātā.

“Ou te fai ai lava i ai ina ia fa’amalolosi ma ia faia mea uma  ma le fiafia ma to’a’aga i le lotu.

“O a lu’itau e o’o mai, o le tatalo lava e filemu ma faigofie ai mea uma.

© Samoa Observer 2016

Developed by Samoa Observer in Apia