Ia fai ma fa’ata’ita’iga lelei i fanau
“O le naunauta’iga ia manuia la’u fanau ma lo’u aiga,” Le tamā i a Salo Tea, 50 le matua o le soifua o Pesega.
O se mana’oga lea o lo’o i a Salo i le taimi lenei, ia manuia fanau, aiga ma le Ekalesia i galuega o lo’o ia fa’atinoina i le taimi lenei.
O le fa’atalatalanoaga ma le Fofoga o Samoa, na fa’ailoa ai e Salo o ia o se tamā tausi aiga, e i ai lana ma’umaga ae le gata i lea o lo’o faigaluega fo’i.
O lona talitonuga, a galueaina lelei taleni ma agava’a ua fo’ai e le Atua i le tagata, e le taumate le fa’amanuiaina.
“O so’o se tamā lava ia, ia o le tausiga lava o le aiga ma ia taumafai e faufautua i le fanau i so’o se vaega ina ia matutua ane mafai lava e’i latou ona atia’e o latou olaga.
“E le gata i lenā a ia ola lava le tagata e taumafai, ia mafai ona amata atu e ita o le tamā o le aiga ni fa’ata’ita’iga lelei mo le fanau.
“A sa’o lava le fa’asinoga o le fanau i le taimi lenei ia e leai se mea e popole ai i lo latou lumana’i.
“O le naunauta’iga lava ia sologa lelei tausiga i totonu o aiga, e le gata la o a’u o se fai fa’atoaga, tausi aiga ae o lo’o o’u galue fo’i ina ia mafai ona maua se lumana’i ma ia solosolo lelei le tele o taimi ma maua le fiafiaga o lo’u aiga i lenei olaga o lo’o o tatou ola.
“O le taimi lenei i lo’u ia iloa i ai ua taugatā le soifuaga ae o le tagata e taumafai e tausia lona aiga ia e maua le fiafia.
“Masalo e leai se mativa i Samoa e ala ona tupu le mativa o le tulaga fo’i lava lea o le lē galulue, o a’u e usu i le taeao i le galuega e afa le fitu amata…afa le fa manava, ia pa’i atu le aiga taumafai e va’ai nai isi fe’au e fai ma va’ai le ma’umaga.
“Ia o le sailia lava o so’o se vaega aua lava le tausiga o le aiga aemaise o fa’alavelave ma nisi o vaega e ao ona ave ai le fa’amuamua.