O le naunauta’iga ia manuia le fanua

Tusia Vatapuia Maiava ma Ilia L Likou ,

140 Hits

Tupa’i Fa’amate.

Tupa’i Fa’amate.

“O le taimi lenei o lo’o taumafai lava na fa’asoasoa le totogi o lo’o mafai ona maua, mo tamaiti aoga, o le tausiga o aso uma, o pasese i le galuega aemaise ai o le totogiina o le fale mautotogi o lo’o i ai ma le to’alua ma le fanau i le taimi lenei,” Le tamā i a Tupa’i Fa’amate o Falelauniu i le fa’atalatalanoaga ma le Fofoga o Samoa.

Na fa’aalia e Tupa’i i le Fofoga o Samoa o le tausaga na se’i mavae atu nei na maua ai le fale mautotogi i Falelauniu, ma o le fa’amoemoega tele ia latalata i le Kolisi o lo’o a’o’oga ai lana fanau teine e to’atolu.

“O lo’u ola lea o la’u fanau, ou te taumafai o le a se mea e o’o ai lo ma malosi ae ia manuia si a’u fanau aemaise ai o teine uma.

“O le tausaga ua mavae na taumafai ai e saili se fanua, ma na ave le tusi talosaga  i le Ele’ele o Samoa ia e le’i maua se tali.

“O le taimi lenei na o lo’u to’alua o lo’o faigaluega fa’atoa maua la’u galuega i le vaiaso fou, o le leoleopo, ia o le totogi o le tinā o le aiga e na’o le $120 i le vaiaso.

“Ia o lenā totogi e aumai ave’ese ai  le $50, ina ia mafai ona o’o atu i le fa’ai’uga o le vaiaso ua mafai ona maua le tau o le fale mautotogi o lo’o i ai nei aua e $200 i le masina.

“O le tupe e totoe mai ai, e $70 o lo’o fa’asoasoa mo si a ma fanau teine e to’atolu  o lo’o i le aoga.

“O le ulumatua o lo’o i le Tausaga 12, lona lua, o lo’o i le Tausaga 11 ma le la’ititi i le Tausaga 9…ma o lea fo’i e le’i totogiina pili a le fanau aoga aemaise o mataupu a le afafine matua lea o le a su’e nei su’ega o le Tausaga 12.

“O le fa’amuamua o lo’o ave mo le fanau, o le a le lē lava o le fa’asoa e taumafai lava e fa’amuamua vaega nei, o le tele lava o aso ia a ua lava le ti ma sina e alu ai, ia o lena lava.

“O la’u ia tala atu, e le’o mafai ona lava le fa’asoa o lo’o i ai i le taimi lenei, ua faigata lava, ae o lo’o taumafai pea ona o le manatu alofa i si a’u fanau.

“Ia o le taimi lenei e le’i totogia nisi o mataupu mo le su’ega a le fanau ia o lo’o titilo atu lava i ai, ona ua faigata lava le fa’asoa.

O se tasi o fa’afitauli na ia fa’ailoa, o le tulaga o le suavai ona o le tele o taimi e pe atu ai le paipa.

“Ia e mamao i tai nisi o aiga o lo’o tau aumaia ai le suavai, ma e faigata tele i taimi vaega nei mo le aiga.

“O se tane o lo’o mana’omia i nofoaga nei,alu aso agalelei le Atua i se fanua e se’e ai, ia e o lava ma ave se tane vai, tele le mana’o i lea tulaga ae o le fa’alavelave lena, e le lava le fa’asoa.

“O le a le tele o le  mau fa’alavelave ma fa’afitauli ae o lo’o malosi lava le loto ona o le fesoasoani mai o le Atua.

© Samoa Observer 2016

Developed by Samoa Observer in Apia