Fa’amalōlō lē-tumau e le Kapeneta, ofisa maualuluga o le malo

181 Hits

Fa’atonu o le Ofisa Aoao mo Moliaga, o Mauga Precious Chang ma le Komesina o Leoleo, o Fuiavailili Egon Keil

Fa’atonu o le Ofisa Aoao mo Moliaga, o Mauga Precious Chang ma le Komesina o Leoleo, o Fuiavailili Egon Keil

Ua fa’amaonia e le Kapeneta le fa’amaloloina le-tumau o le Komesina o Leoleo, o Fuiavailili Egon Keil ma le Fa’atonu o le Ofisa Aoao mo Moliaga, o Mauga Precious Chang.

E afua lea fa’ai’uga ona o moliaga fa’asaga i ofisa sinia nei a le malo. O le Ali’i Komesina o Fuiavailili, o lo’o feagai ma moliaga e aofia ai le taofia fa’asolitulafono,  o le faia ma le iloa o se solitulafono, le tu’uina atu o fa’amatalaga taufa’asese ma le faia o amioga le-talafeagai, a’o Mauga sa taofia i le Aso Lua ma molia i le ‘ave-ta’avale fa’atamala ua mafua ai ni manu’aga fa’apea le ‘ave-ta’avale mata’utia. 

O ia fa’asalaga uma na fa’amaonia mai i se fa’asilasilaga mai le Kapeneta na tu’uina mai e le Ofisa o Vaega mo Fa’asalalauga i le aso ananafi. 

O le Fa’asilasilaga lea na tu’uina mai:    

FA’AMALOLOGA LE-TUMAU O LE KOMESINA O LEOLEO

Ua fa’amaonia e le Kapeneta le fa’amaloloina le-tumau o le Komesina o Leoleo, o Fuiavailili Egon Keil a’o talia le fa’ai’uga o moliaga fa’asaga ia te ia i le fa’amasinoga.

O le fa’amalologa ae totogi pea, e mo se periota amata e tolu masina a’o faia su’esu’ega a le fa’amasinoga i moliaga fa’asaga ia te ia ma ua aloa’ia lea fa’amalologa i le taimi nei. 

O le fa’amalologa lea, o lo’o o-gatasi ma fa’atinoga masani ina ia fa’amautuina ai le fa’amaoni ma le tuto’atasi o le iloiloga ma se fa’ai’uga o lana mata’upu. 

O tiute ma matafaioi uma a le Komesina o Leoleo, o le a tau’aveina fa’asolo i masina ta’itasi e Komesina Lagolago – ‘Afamasaga Michael So’onalole, Fauono Talalelei Tapu ma Samoa Mulinu’u Mulinu’u, e amata ia ‘Afamasaga.  

FA’AMALOLOGA LE-TUMAU O LE FA’ATONU AOAO O LE OFISA MO MOLIAGA 

Ua fa’amaonia e le Kapeneta le fa’amaloloina le-tumau e amata i le taimi nei, o le Fa’atonu Aoao o le Ofisa mo Moliaga, o Mauga Precious Chang, ona o se su’esu’ega a Leoleo ma le iloiloga a se Ofisa mo Moliaga tuto’atasi, i moliaga ua faia fa’asaga ia te ia. 

O le fa’amalologa o Mauga, e mo se periota amata e tolu masina a’o fa’agasolo su’esu’ega a le fa’amasinoga i moliaga fa’asaga ia te ia. 

A’o fa’amalolo, o le a tauaveina e le Tama’ita’i o Muriel Lui, matafaioi ma tiute o le Fa’atonu Aoao o le Ofisa mo Moliaga. 

O le fa’amalologa o le Fa’atonu mo Moliaga, o lo’o o-gatasi ma fa’atinoga masani o galuega, ina ia fa’amautuina ai le fa’amaoni ma le tuto’atasi o le iloiloga ae maise o se fa’ai’uga o lana mata’upu.

© Samoa Observer 2016

Developed by Samoa Observer in Apia