Toe manatu tasi lava...‘Oe ne’i mu

122 Hits

Toe mafaufau tasi lava… Ua fa’alogo so’o o fa’apea: “O le ita i tagata e pei o le susunuina o lou fale atoa e tau tape ai se isumu.” E fa’apena fo’i le fa’a’upuga, “Titipi le isu pe a ita i foliga.” A tatou feita i se tagata, e sili atu lava ona afaina o tatou, nai lo ē o feitai iai. O le mafuaga lena, e sili ai le tago’au i se ‘aupega e sili atu, e taofia ai lou ita pe a fa’atiga mai nisi ia te ‘Oe. O le a le ‘aupega lea? O le fa’agalo. Fa’agalo loa lava i le taimi nei, ma le afaina ai fua o le mafaufau ma le soifua. “E leai sau mea e maua ai pe a taumafai e taui-ma-sui.”  

E vave atu ona fa’ataunu’uina manuia lou fa’amoemoe, pe a e vave fa’amagaloa ma fa’agalo ou fili. O lou taumafai e taui-ma-sui atu i se isi tagata, e faitau fa’atasi uma ai ma ‘Oe i ituaiga tagata e iai latou; ae maise fo’i, a ē fa’amagaloa se tagata, ua fa’aopoopo ai ou togi ma ē sili atu ai i lo latou. O le mea la e fai, o le vave fa’afealofani ma fa’afilemu ma ou fili. “E iai isi tagata e fa’amagalo o latou fili – pe a se’iloga lava ua feoti, a ua matua tuai tuai lava.” 

Manatua, e mo’omia e tagata le alofa ma le fa’apalepale, ui e iai taimi e matua le-tatau ai lava. Vagana se tagata malosi, ona fa’atoa mafai lea ona fa’amagalo atu i isi tagata. E fua le malosi o le tagata, i le tele o taimi sa mafai ai fo’i ona ia fa’amagalo atu le tagata lava lea e tasi. Silasila fo’i, a fa’atumuina loa o tatou agaga i le alofa ma le agalelei, ua leai se avanoa mo le loto-ita ma le loto-tiga. E faigofie lava ona e ita i le isi  tagata, ma e fa’apena uma tagata ola. Ae afai la e te mana’o e ola le-fiafia ai pea ma fa’a’ū’ū fa’pena, pulea ‘Oe: ‘aua le fa’amagaloa tagata na sesē atu ia te ‘Oe. ‘Ae ‘aua ne’i galo, “O le ita ma le lē-loto fa’amagalo, e pei lava o se afi: a e taofia umi, e te mu ai.” 

Peita’i, “A e maua le loto fa’amagalo i se so’o se tasi, o le a e fa’amagaloa ma fa’asa’olotoina se pagota… ona e silafia ai lea, o lau susuga lava, le pagota!” A o le fa’amagaloga moni lava, e mai Lou Matai, i Lona Alofa ma Lona malosi. Tatalo nei ia Iesu Keriso e fa’amagalo ‘Oe ona o ‘ou ala sese uma na fa’atiga ai ma sese i Ona luma. Ona e maua lea o Lona malosi e fa’amagalo ai isi e pei fo’i ona Ia faia mo ‘Oe.  Toe mafaufau tasi lava… (Fa’aliliu e Maiava)

© Samoa Observer 2016

Developed by Samoa Observer in Apia