Tapena le Little Rina mo le Teuila

Tusia Deidre Fanene ma Fa’aliliu e Maiava ,

157 Hits

Le LITTLE RINA UA FA’AFOU: Sonny Hall, Maselino Ioane ma le Kapeteni o le Little Rina, o Matuaitofiga Fonoti

Le LITTLE RINA UA FA’AFOU: Sonny Hall, Maselino Ioane ma le Kapeteni o le Little Rina, o Matuaitofiga Fonoti

Ua taofiofi-gata le ‘auva’a o le Little Rina, le fautasi mai le afio’aga o Toamua a’o tapena atu mo tu’uga-va’a o le Teuila i le masina fou. 

Na fa’ailoa mai i le Samoa Observer e le Ali’i Kapeteni o Matuaitofiga Fonoti, le agaga fa’afetai tele o le afio’aga ona o le lagolago-sua ua tu’uina atu e toe tapena lelei ai le sa mo tu’uga o le 2016.

VA’AIGA FOU I LE SA O TOĀMUA, le “Little Rina”

VA’AIGA FOU I LE SA O TOĀMUA, le “Little Rina”

“O le tausaga e 1999 na fausia ai le Little Rina ma e momoli ai lava le fa’afetai ona o lea ua mafai ona toe fa’aleleia le fautasi atoa mo tu’uga ia Setema,” o le fa’aaliga lea a le Kapeteni.

“O le fa’amoemoe lava lea, ia tu’u i tai i se taimi o le afiafi nei (Aso Lulu) e fa’ata’ita’i ai ma amata ai loa koleniga mo le fa’amoemoe ia Setema. 

 “Ua fai fo’i si ‘umi o ‘auai pea le Little Rina i fa’alagamaea i le tai ma ua a’e ai se manatu, ua tatau ona toe fa’afou ma fa’aleleia atili nisi o vaega ua mo’omia.” 

VA’AIGA FOU I LE SA O TOĀMUA, le “Little Rina”
VA’AIGA FOU I LE SA O TOĀMUA, le “Little Rina”

Na fesiligia fo’i le Ali’i Kapeteni i le tau aofa’i o le fa’afouina o lo latou sa, ae na saunoa, e i se vaita o le ono-afe tala ($6,000.00) le galuega atoa na faia.

“Pei ona silafia e le to’atele, o Little Rina o le alo-tama’ita’i la’iititi o nisi o tamatali’i-faipisinisi iloga o le atunu’u ma o latou fo’i ia sa fesoasoani malosi i le toe fa’aleleia o le fautasi lea.

“Avea ai lo’u nei tagata fa’atauva’a e fai ma fofoga-tau-momoli o le nu’u nei, i Igoā-matua ma Aiga, le Gafa o A’atoe, le Itulua o Satunumafono ma le Tofa a Va’a’ulu, ae maise fo’i le ‘Auva’a atoa ma tama-fanau a Toamua, ‘ou te fa’aleoina ai le fa’afetai tele mo tua’ā o Little Rina, vaeatu o outou itu tau-tofē, ona o lenei lagolago tele, e le gata i le lagolago le-motusia mai tausaga e tele ua mavae, a’o lenei fo’i fa’amoemoe ua mae’a nei, aua le tu’uga o le Teuila 2016. 

 “O la latou lagolago ua tele ai se suiga ma tu-mati’e lo matou nu’u nei ma silafia e Samoa e lenei lava fa’agatama. Ioe, e ta’utino lava le solo a le tamaloa, seanoa le agalelei mai o La’auli ma le Aiga, e le-mafai ona matou ‘auai i le tu’uga o lenei tausaga.

“Fa’afetai tele atu.”

Sa fa’apea fo’i ona momoli le fa’afetai ia Maselino Ioane mai Amerika Samoa fa’apea Sonny Matuaiala S. Hall mai Ausetalia, ona o le fesoasoani sa tu’uina atu mo le fa’afouina o le fautasi ae maise le fesoasoani a sui o le ‘auva’a. 

“E 47 nofoa mo le ‘au-alo fa’apea foe fou ua mae’a ona tapena,” o le fa’aaliga lea a le Ali’i Kapeteni.

“Ua tau le taofiofia le ‘auva’a nei... ua tuai lava ona tu’u i tai le fautasi, a ua leva ona sauni tama e fa’atino a latou tapenaga.

“E tasi le masina na fai ai le galuega mo le fa’afouina o le fautasi.”

© Samoa Observer 2016

Developed by Samoa Observer in Apia