O SAILIGA-MALO A TAFUA MA FUATAGA- Mai le Tusi o le “Suaga a le Vaatele”

574 Hits

Na usu Tagaloa Funefe’ai ia ‘Ulalemamae le tama teine a le ulugalii o Puna ma Manava i Manono faae’e le gafa o Sina’auvale. O Puna ma Manava o suli o Tolufale. Usu Tuiatua Letauā ia Sinaauvale faae’e le gafa o Alei ma Pata.

O tama ia na faalogo ua fai tofiga i Malaetele i Manu’a-ona o lea i ai. E o atu o fai le ‘Alofi-sa o le Tuimanu’a ona fetolofi ane lea i lalo o le la’au o le Ifi-ua lalafi ai. E taliu mai tama mai Manu’a-ua sui o la igoa ia Leifi ma Tautoloitua. E i ai le pou o Aleipata i Manu’a e valu i ai pou o le “Fale’ula”-ma ua ta’ua lea pou-o le Pou o Leifi ma Tautoloitua. Ua uma tofiga-ona fo’i mai lea o tama ma le “Tumua,” ma le “Fale o Itu’au ma Alataua.”

E alu atu le atalii o Tuitele-le tama lea o Fa’ivae-ua uma ona fai tofiga. Ona fo’i mai lea fai i lona tamā o Tuitele-ua uma ona fai tofiga-ae a o ane tama Aleipata ma Malo mai Manu’a-ona faaafe lea i Leone ma fai i ai se faaaloaloga-ina ia mafai ai ona tu’u i Leone mea uma o loo malaga mai ma tama. Ua taunuu tama i Leone-ma e o atu le nuu e saili-o momoe faasausau lava tama i lalo o le la’au o le Ifi. Ona maua ai lea o igoa o Malae o Leone o “Laloifi ma le Falesau.”

E faapea se tala a Leone na ta’i le Sua ma ua tu’u loa i ai le “Tumua.” Sa tu’u foi i ai ma le faalupega-“Malu o le Fale”-lea o loo faalupe ai nei Fa’ivae, ae aumai na o le “Fale o Itu’au ma Alataua.” O le “Fale o Itu’au ma Alataua lenei  na o mai tama tu’u i Falealili i Sapunaoa-lea o loo leleo ai Le’avasa ma Ma’aelopa.

O le mafuaga na tu’u ai i Falealili le “Fale o Itu’au ma Alataua”-ona o le la tina-o le afafine o Tagaloa Funefe’ai-e uso ma le teine o Taupifagalau lea na usu i ai le tama o Punaoa-lea na maua ai le tama o Manusamoa ma le teine o Tautiapagofie.

Ua o’o i le tasi aso-ona o lea o tama nei o Leifi ma Tautoloitua e saili le aiga o le la tina i Savaii. Ua taunuu tama ona toso lea o le la va’a i Salelologa-a’o alaga le vaosa o Tagaloa ma lona Alofi-sa lea sa tapu ai le sami ma le vao. Ina ua alaga le Taga-e o ane tama ua ave e le tagata o la va’a. Ona o lea o tama i le nu’u ua ta’ua nei o Tafua. E taunuu atu i le nuu-o nonofo mai le tamaloa ulusinā i le matua-tala.

O le pogai lea o le faalupega o le “Taufa’asisina ma le Alala Matuatala.” Ona fai atu lea o le tamaloa ulusinā i tama poo a la’au na ta ai lo la va’a, ae tali tama o le ‘ulu ma le maota.’ Ona faapea lea o le tamaloa ulusinā, ua maua la igoa o a’u tulafale o Ulu ma Maota, ae o le a ave oulua i le tamā o le lua tinā. E momoli atu tama i Sili ae fai mai e ave i Vaiafai o loo faata’ele ai le Alii. Ua taunuu tama ma ua feiloa’i ma le Tagaloa ma faamatala i ai le mea ua o’o i lo la va’a.

Ona faapea lea o Tagaloa-ua lelei-o le a alu le Fuataga o le vao o le Tagaloa-ona maua ai lea o le igoa “Fuataga,” ma afai e maua se la’au-o le a Ta-fua lo oulua Sa.” Ona maua ai lea o igoa o “Fuataga ma Tafua.” Ua taliu mai tama mai Savaii ma ua afe ia Malietoa-e saili malo. Ona faapea atu lea o Malietoa ia Tafua ma Fuataga-ua leai se malo o totoe ia te ia, ua toe lava o lona “Nofoa-vaevaeloloa.” Peitai- sa tauanau pea e tama Malietoa-ona faapea atu lea o Malietoa ia Auimatagi-e avane le Tumua o loo ia te ia i tama e o ma la’ua-ae se’elua ma Tuisamau.

Ona maua ai lea o le faalupega o-“Auimatagi ma Tuisamau ma lo la Vaa tautai lua.” Ua ave le Tumua i Atua e Tafua ma Fuataga-peitai- e afe atu tama i Lufilufi-ua uma ona faasoa le i’a ma ua te’a atu ia i la’ua “Ao o Atua.” Ona tu’u ai lea e Tafua ma Fuataga le Tumua ia Lufilufi e o’o mai i ona po nei. O le “Susuga” a le Malietoa ua faapea foi ona tu’u ia Lufilufi e Tafua ma Fuataga. 

© Samoa Observer 2016

Developed by Samoa Observer in Apia