O salu fa’atau mo se tupe aua aiga

By Aruna Lolani 19 June 2017, 12:00AM

I le aiātatau lava ia o tinā o le faia lea o mea uma aua lava lumana’i o aiga. 

O lea foi le tulaga o lo’o talitonu ai le tinā ia Mele Tau’oa o Vaitele.

O le tinā e 43 tausaga le matua le soifua ma o le maua ai o le la fa’atalatalanoaga ma e Fofoga o Samoa sa ia taua ai o le tiute lava ia o le tinā o le tausi aiga ma e faia pea ma faia pea. 

“O lenei aso, o lo’o fa’atau atu a’u salu tū aua lava se seleni mo le fanau,” o lana lea tala I le Fofoga o Samoa. 

“O la’u lava galuega fai lenei I lenei vaitau ua ma’i le tamā le aiga. 

“Ia o le fanau lava le mafuaaga o le galue malosi, aua lava se tupe o lea aso ma lea aso. 

Sa taua e Mele e pei o le tamā lava sa fa’alagolago iai le alagatupe maua o le aiga.

“Ioe o le tama lava sa gafa ma le alagatupe o lenei aiga e ala mai le sami. 

“E alu lava e fagota aua se I’a mo le mea’ai ae fa’apea foi se I’a fa’atau aua se tupe. 

“Peitai, talu ai na lavea i se tasi o fa’alavelave tau ta’avale ma afua ai loa ona ma’i. 

“O le taimi nei ua pau uma mai le mamafa o le fanau ma  aiga ia te a’u nei le tinā ma ua avea lea ma tulaga ua ou savali ai le auala e fa’atau le salu. 

O le tinā ia Mele e to’alua le fanau aoga ae o le ulumatua o lo’o nofo ma ona matua. 

“E pei o le tupe lava le fa’afitauli o lo’o ia nei, peitai e le’o se tulaga o le a itagia ai le olaga lenei tau te ola ai. 

“O le auala lava ina ia mafai ona tulei ai ma lu’itauina ai tatou ina ia galue malosi mo lumana’I o aiga, nu’u ma ekalesia. 

“Aua e le nofonofo se isi ona maua fua se manuia, a le galue e leai lava se mea aoga e maua. 

“O le ala foi lea o le galue malosi o a’u o le tinā le aiga ina ia mafai ona fa’alagolago mai si a’u fanau ma lo’u to’alua ia te a’u. 

“O le galue lava ma le malosi aua o lo’o alualu lava I luma le taugata le soifuaga ma faigata ai mea uma. 

By Aruna Lolani 19 June 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>