“O le ua mata’u i le Atua ma fai le amiotonu, e talia e le Atua” (Galuega. 10 : 35)

Tusia Petaia Setu ,

529 Hits

O le Atua o le alofa lava ia. O lona lea natura. Na te le faailogaina tagata. O le lauga a Iesu, e “faaoso e le Atua lona la i ē ua amioleaga atoa ma ē ua amiolelei; ua ia fatoifo foi le ua i ē ua amiotonu, atoa ma ē ua amioletonu” (Mat. 5:45).

O le la ma le timu (ua), o faamanuiaga tetele ia a le Atua i le lalolagi ina ia maua e mea uma na faia; ia ola fiafia, ola saoloto, ola manuia ai tagata uma. Peitai, ua iai i tagata uma, o lanu ma agaga eseese le avanoa e tali atu ai i ia faamanuiaga mai le Atua.

Ua le afaina poo le Iutaia poo le Eleni. Fai mai Peteru, “…ua ou iloa e le faailogaina tagata e le Atua. Ae peitai o lē mata’u ia te ia i nuu uma lava ma fai le amiotonu, ua talia i latou e ia.”

O le upu mata’u, ua le o se taufaafefe poo le faamata’u. A o le faamatalaina o lou talitonuga ma lou iloa lelei o le Atua. O le a la lou talitonuga i le Atua? E masani ona faamatalaina i nisi o a tatou lauga ua mavae le uiga pa’ia ma natura masani o lo tatou Atua.

E le gata e paia, e mamā, e faamaoni ma alofa ma fai mea tonu, ae o le faapogai foi ia o mea lelei uma. Ua tā’ua e Tavita, e le mafai ona maua le poto pe a le iloa le Atua (Sal. 111:10); ua iai le mafaufau lelei ia te i latou uma o ē fai ia mea. I le, o le mafaufau lelei lea sa ia Konelio.

O Konelio o se tasi o taitai ‘au o vaega taitoaselau o fitafita a Roma. O le tagata o nuu ese. O le molimau a Luka, o le tagata amio Atua ma le mata’u i le Atua. E le i tatalaina atu i fafo le galuega talai o le talalelei a le au aposetolo, a o lea ua liliu Konelio ma ua faasagasaga i le Atua e le aunoa i le tatalo. Ua iloa e Konelio le faamaoni o le Atua, ma ua ia lagona le alofa o le Atua ia te ia ma lona aiga. O Konelio, o le uluai tagata lea o nuu ese ua papatisoina e Peteru i le suafa o le Alii.

O lana amio Atua, o le amio ua pa’ia. O le amio ua faasāina mo le Atua; ma ua tapui mai le toe aafia i ni leaga o le lalolagi. O le amio ua faaagatonuina e le loto ua faapaiaina. Le loto ua tuu atoa i le taitaiga pule a le Agaga o le Alii.

Le pule e te vavaeeseina ai le fanau a le Atua mai le olaga toilalo ma faiga matagā a le tiapolo. O la Solomona, “O le mata’u i le Atua, o le inoino lea i le leaga.” O le leaga, “o le faamaualuga, loto  fefete, amioleaga, ma le gutu faapiopio, ou te inoino iai” (Faataoto. 8:13). O lona uiga, o le mata’u i le Atua, o le poto lea na te faasāina lou olaga mai le leaga ua inosia e le Atua (Faataoto. 6:16-19). E le o la lea ea la ua taulelei ai Konelio, ma na fai ai e ia le amiotonu?

O le amiotonu, o le amio ua le mata’uleagaina. E mamā. E sa’o ma tonu. E faaosofia e le faagaeetia. E pulea e le alofa. E limataitaiina e le mata’u i le Atua. E faavae i le talitonu ma le faatuatua ia Iesu Keriso.

O lona uiga, o le mata’u i le Atua ma le amiotonu, e le mafai ona tuu eseeseina. E ō faatasi lava nei mea e lua i taimi uma ma le olaga atoa. I le, o le uiga ma le soifuaga la lea e manaomia e le Atua i tagata uma, lanu uma, ma gagana uma. Ia mata’u i le Atua, ma fai le amiotonu.

Ia saoloto lou iloa o le Atua, ma faaalia lenā iloa i lau amio ua tonu, mai le loto ua mamā, ua faapaiaina. E iloa ifea sau amiotonu ma sou loto mamā, pe afai o loo e taumafai e mimilo ese mai se isi uso a tagata mai se isi faamoemoe lelei, ua valaauina ma filiffilia ai e le Atua? Ua tapui e Iutaia le talalelei i ona laufanua. Peitai, ua le o le finagalo lea o le Atua. O le ata lea ua aliali manino mai i isi lotu ma o latou talitonuga! Ua taumafai e tapui tagata ia le toe faaaogaina e le Atua i se isi vaega o lana galuega molimau.

Ua latou tauleagaina le fuafuaga paia a le Atua ua tapenaina mo lea tagata ma lea tagata. Ua pumoomoo le iloa faapei o le lotu Iutaia. Ua manatu na o latou e to iai manuia. O latou ua faaolaina. O le olaga faafoliga, ma manatu faale tagata, ua le iai le mata’u i le Atua ma le amiotonu.

Ua le iloa le Atua i le loto a o le gutu. Ua tusitusi lima ma faailoga tagata. E mamao la oe ma le faaolaina. E te le malamalama i le plan a le Atua ma lona faaolataga. (Galuega. 10:11-13) O lana upu ia Peteru, “...‘aua e te ta’ua e sa.” (f.15) Ioe, poo fea lava o le lalolagi nei e maua iai e le Atua le tagata e mata’u ia te ia ma fai le amiotonu – e matala iai le faaolataga, e lē sa. E talia e le Atua, ma faaolaina i lona alofa tunoa. Tusa lava poo le Iutaia ae ‘a le usitai ma lē faia le finagalo o le Atua, e le talia foi e le Atua; ma ua leai sona avanoa i le faaolataga a lo tatou Alii. Vaai oe i ‘e faamasinoina le tofā mamao ma le finagalo pule a le Atua i ona tagata.

Samoa e, o le amiotonu a Konelio, na faamatala e lona olaga tatalo i aso uma. O lona mata’u i le Atua, na faaalia i ona aao mafola i le nuu, ma lona lima foai i soo se tagata. Ia manino lelei le mea lea. E le o le tatalo faalausosoo e faafofogaina ai oe e le Atua – Leai! E le o le faitaulaga i le pule mai isi ma fai meaalofa ona o le faatonuga, e manogi lelei i luma o le Atua – E leai! O le mea lea o loo tupu. Ua tatou lalafi i tua o Konelio ma sisi’o i lona fai mea sili ae mea ane, e le o se faatonuga poo se pule malosi na fai ai le taulaga ma sea mea lelei e Konelio. Samoa, o le loto fuatia ifo ua lelei o Konelio. O lona lava finagalo ua mălie i le Atua. Meaalofa ua fai fiafia mai le loto ua saoloto. O lana tatalo foi, o tatalo ua silafia e le Atua, e le taamilomilo, e le faainuinu, e le faaviivii, e le fili upu, ae tuu sa’o lava mai le loto sa’o, lagona sa’o, i upu sasa’o.

Ia manatua e tatou, e le faailogaina e le Atua se  tagata; ae silafia e le Atua tagata uma. O lona uiga, pe te Iutaia pe te nuu ese, e talia tagata uma e le Atua, o ē ua ola mata’u ma alofa atu i le Atua. O i latou ua faia mea lelei i le loto mamā ma le amiotonu. O le mata’u i le Atua ma fai le amiotonu na aveolaina ai Enoka ma Elia i le lagi. O le amio sa’o ma le amiotonu na alofagia ma faamanuiaina ai e le Atua Iopu ma Noa. O tala ‘ave lelei ia! Tala o lenei tamaloa Italia. Ua le fefe i le kaisara ma puleaga faa Roma, ae ua agiga i le atulaulalu lona mata’u i le Atua. Ua le popole i lona tulaga sinia ma lana galuega ne i maumau, a na tuu sa’o i le Atua ia ma lona aiga ma lana fanau. Ua leai lava manatu i lana tautoga faafitafita poo sona faasalaga, ae ua talitonu ma faatuatua ia Iesu ma lona Mana.

Amuia Konelio ua alofagia e le Atua! Amuia lea ta’ita’i e alofa ma mata’u i lona Matai!

Ia o afea e ola saoloto ai Samoa i sona taitai faapea? O fea e saili iai e le ekalesia ni taitai totoa pei o Konelio e faaolaina ai le lafu mamoe a Keriso?

Aisea ua e saga fefe ai i le isi tagata e pei o lou foi tagata ae ua e le fefe i le Atua? E leai lava se tagata i lalo o le la na te faaolaina oe vaganā le Atua. O lona uiga, fuli lou tua i pulega a le tiapolo, ae faasaga a’e ou mata i le Atua lou Faaola. O loo tatou faapouluulu pea ma galulue faalilolilo, ae o le amiotonu a le Atua o le malamalama.

O me uma na faia e Konelio, sa manino i luma, e le o tua. Aisea? E mata’u i le Atua. E gaua’i i le amiotonu. E leai se isi ala e toe fuataiina ai le amio ua na o le mata’u i le Atua, ma fai le amiotonu, ona fiafia mai lea o ia ia te oe, ma talia oe i le manuia e faavavau. Fai mai Solomona, “O le mata’u i le Atua, o le puna o le ola lea, e ‘alo ese ai i mailei e oti ai” (Faataoto. 14:27) O lona finagalo, “ia fai le amiotonu…” (Mika. 6:8). Ioe, fai le amiotonu. Auā o Iesu Keriso, o le Amiotonu ia a le Atua i le lalolagi.

Amene.

E-mail: petaiasetu@gmail.com

7737063/7505152

© Samoa Observer 2016

Developed by Samoa Observer in Apia