O AI E TUA I AI LE MANUIA O LE ATUNUU?

19 June 2016, 12:00AM

O le viiga ma le faafetai i le Atua-e le mafai ona uma pe gata mai-aua o Ia o le Alofa-ma ua na o Ia lava le alofa-e amata atu nei lava-e o’o i le faavavau. Malo afua ailao ua maua! O le mataupu ua faaalia i luga-o le ute lena o le a tatou talanoa i ai-atonu e faatupu manatu ma lagalagā ai sou finagalo i mea lelei.

Ia-alo maia! “O ai e tua i ai le manuia o le atunuu? O le manuia o loo fia talanoaina iinei-o le manuia lea i soo se itu; o lona uiga-o le manuia e le gata nei poo taeao-a o le manuia e amata atu nei se’ia o’o lava i le gataaga o lou soifua ma lo’u nei ola.

Afai e toe faamanino atili-o lona uiga- ‘o le manuia o le ola fiafia, ola sa’oloto. E fiafia aisea? E fiafia ona ua tagolima; e fiafia ona ua lava le faasoa, e fiafia ona ua mafai ona faa-a’oga le fanau, ua malu puipuia le lumana’i o le fanau; ua malu puipuia au meatotino; ua malu puipuia lau aia tatau ma la’u aia tatau; ua leai ni au aitalafu- ua mafai ona maua mea uma e tusa ai ma le tausiga o le aiga; ua lelei falema’i e tua i ai le fanau ma Samoa atoa; ua leai se faailoga-tagata; ua leai se faale-aiga i totonu o le malo; ua leai se faatautala; ua aloa’ia le ola o le tagata i faiga faavae a le malo; ua faasili le ola o tagata i lo upufai palapalā-faa’ole’ole ma le tele lava o isi itu e manuia ai.

O le manuia tonu lena o loo aga’i i ai le tatou talanoaga i le asō. O ai la e tua i ai le manuia o lenei atunuu? E mafai ona tua i tagata faatautala? E tua i le tatalo i Togafe’ai? E tua i le faatau o lau palota i tupe ma mea’ai? E tua i le moli eletise? E tua i le fai o auala?

E tua i le faiga o paipa ma le vili o le vai ae le o tofutofusia ai tagata uma? Faitalia lava oe Samoa ma lau tali i nei mea uma. A’o la’u lava tali-“E tua le manuia o lenei atunuu i le “Alofa ma le fai mea tonu.” Ona pau lava lea o le mea e tua i ai le manuia o Samoa ae le o se isi lava mea! Aisea? Aua fo’i ana faapea o manuia le atunuu- poo penei e le o toe matitiva tagata-poo penei o a’o’oga uma tamaiti ae le o  e faatau atu oloa i luga o le alatele i le ao ma le po.

E ui lava ina a’o’oga fua le fanau e pei ona folafola mai-ae na fiu e tatali. E lelei la Aopo na folafola atu ona Vai ma na vave ona maua-ae sefulu ma le tasi tausaga sa tatali ai le faatinoga o le a’oga fua o le fanau. E mafai la ona tua le manuia o Samoa i le faatautala?

O le tali-LEAI!  E faapefea ona tua i ai se manuia o le atunuu pe na o meatotino a le atunuu ua toeititi uma ona faatau atu. E le gata ina le ta’u maia i le atunuu-ae le’i tuuina atu foi i le Palemene mo se faatagaga e faatau atu ai ia meatotino! Ua uma ona faatau atu le Faletupe o Samoa i Sisifo-ua uma ona tuuina atu le vaega o le Falemeli lea sa i ai teugatupe faasao; e le gata ina le logoina le atunuu-ae lei tuuina atu foi i le Palemene mo se pule faataga. Ua fia eleele o le Malo ma eleele o le Esetete Tausi ua uma ona vaevae mo i latou ma o latou aiga-e aunoa ma se ioega a le atunuu poo le Palemene?

Sa faailoa mai foi se fuafuaga i aso ua mavae-o le a faatau le Vailima ma le Faleoloa o Mea Tau Faatoaga. Sa fai nei fuafuaga uma e aunoa ma le logoina o le atunuu ma lana Palemene. Ae o le mea e sili ona leaga-o le faatau o nei meatotino a le atunuu o loo maua ai tupe-ae milimili faa-pepe le Polenesia e faitau miliiona tupe a le atunuu na maumau ai. Aisea la na le ta’u mai ai ia Samoa ma lana Palemene ia fuafuaga?

O le tali- o le faatautala ina tetele! Ia silasila i le Maota o le Ao o le Malo sa i ai muamua i Vailima! O fea o i ai nei? O lea ua tutuli ese alii ae teu ai meaafale a Papalagi Aisea na le o ai e fai se fale i Sekotilani pe afai e sili le taua o lea Papalagi i lo le Ao o le Malo o Samoa?  O le mea ‘ea e fai atu Samoa e ou le atunuu lenei- o Vailima e afio ai le Faauluuluga o lona Malo-ae nonofo ma sui? Ua faifai nei la Mulinuu-na maumau ai tupe a le atunuu-o le a le mea na faatu ai! Silasila la i le faatautala! O le fesili la-e tua le manuia o Samoa i le faatautala?

O lena ua e silafia le tali. Afai la e le tua le manuia o Samoa i le faatautala, e tua la i le a? E tua i le alu e tatalo i Togafe’ai? Leai.Aisea?  O le tatalo sili e fia faafofoga i ai le Atua-o le tu’u o le faatautala, tu’u le pi’opi’o, tu’u le matape’ape’a, tuu le ave o meatotino a tagata i auala palapalā-tu’u le manatu faapito!

E le tua foi le manuia o Samoa i le faatau o palota i tupe e tele ma mea’ai?! O lona uiga la-o tupe na avatu ia te outou-o outou lava e toe totogiina leaga e le o ni a latou tupe! A toe faamanino la-o le tali-“o oe ma lau fanau e toe totogiina ia tupe. E faapefea ona toe totogi ia tupe?

A tulai mai le faigamalo-ona toe si’i lea o tau o mea taumafa ma le tele o isi mea e toe totogi ai tupe na avatu i le taimi o le Palota.Afai la ua matua maualuga le tau o le soifuaga pe a fua i tau fou o oloa ia ua faalauiloa mai-o iina la e te toe totogiina ai tupe na avatu Ia te oe. O le manuia la o Samoa-e tua i le faamasinoga ma le amiotonu!

19 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>