1. Matauina i Tala Fou le tula’i mai pea o mataupu tau laau faasaina i luma o le Faamasinoga-ma o lona uiga-e i ai lava i latou o loo faatinoina le totoina ma le faaaogaina o nei laau faasaina! O le popolega la- afai e moni ma faamaoni o loo i ai ni mataupu faapenei e uiga i ia laau faasaina-e le taumate la o loo i ai lava tagata o loo faia nei mea e ui lava ina latou iloa lelei-e le faatagaina i le tulafono!

Afai la e le o iloa le pogai ua fai ai e nisi tagata nei mea o laau faasaina-faamata la e le o le mativa ma le le tagolima ua mafua ai? Ae afai foi e le o le tagolima-aisea la ua tagolima ai i mea o loo faasaina-ae fai se faatoaga o taumafa ma mea e aoga? Pule oe ma lau tali-ae o le popolega-afai la o i ai pea nisi o faia lenei faiga ina ia maua ai ni tupe-o lona uiga la-o le mea moni- o le a matua afaina ai le atunuu atoa.

Atonu e leai se mea e leaga ai pe ana faapea e faaaoga lava mo latou aiga-ae o le faatau atu lea i tagata o le atunuu-o lona uiga-e i’u ina felelei ai uma le atunuu atoa i le vanimonimo-aemaise ai lava o tupulaga lalovaoa.

Afai la o silafia e le faigamalo-o lea lava o loo i ai nei laau faasaina i totonu o le atunuu-aisea ua le fuafua ai se faasalaga mamafa mo nei tagata? Ae ia manatua foi-e tatau lava ona i ai se mafuaga e saga fai ai pea e nei tagata nei mea!

Afai o le a taumafa marijuana le atunuu atoa-o le a la le mea o le a o’o i ai? Ia manatua la- e ese lava le onā i le Pia-ese le onā poo le lele i le marijuana! O le eseesega-e le toe fefe i le oti! Faamata e le o se mataupu lenei e tatau ona matua sagai ane le faigamalo e galulue faatasi ai ma nuu ma itumalo a’o le’i tula’i mai ni mea mata’utia? O le a sou taofi? 

2. Matauina foi i Tala Fou fai mai o le a toe iloiloina le tau o le Eletise-ma o lea la iloiloga-e le o mautinoa pe o sea iloiloga o faatūtū ile faaitiitia o le tau o le eletise poo le toe si’i foi i luga. Afai la ae i’u ane lea toe iloiloga-ae toe si’i ai le tau o le eletise-ia atonu ua tatau loa ona fai se filifiliga a le atunuu atoa- poo le fea mea e taugofie mo i latou!

A tu’u mai la i le taimi nei-o le upu moni-o lea e totogi e le atunuu le suau’u lea e aumai e vili ai le eletise-toe totogi e le atunuu le aitalafu a le Faalapotopotoga o le Malosi Faa-Eletise; ae toe totogi foi ma pili o latou moli!

O le a la le sa’o o nei mea? O se mea sa’o ma le amiotonu poo se mea valea? O le leaga lea o le tasi o le kamupani e gaosia le eletise i totonu o Samoa. Ana faapea e lua ni kamupani eletise-semanu e fai se la tauvaga poo ai e taugofie le tau o lana eletise-ona fai lea o le filifiliga a le tagata lava ia-pe o le EPC poo le isi kamupani! O le mea lena e igoa o le tauvaga lelei e manuia ai tagata. O fea o le lalolagi nei e iai ni faiga faapea?

O le tali- E na o Samoa lava! O le a sou taofi? 

3. Matauina foi i Tala Fou le tatalaina aloa’ia o le Pasefika TV-ma o lona uiga la-o lea ua tele fale Televise i Samoa nei. O le lelei la o lea tulaga-o le a mafai ai ona fai le latou tauvaga –ona filifili lava lea o le atunuu- pe o le fea Fale Televise e fia maimoa I ai!

O lena tulaga o le mafai ai ona faaleleia atili le auaunga a le Fale Televise lava ia-ma siitia ai le tulaga lelei o a latou polokalame. O lona uiga-o le a mafai ona faafaigaluegaina ai tagata poto faapitoa mo auaunaga tau Televise i gagana e lua-ae o le mea sili-o le mafai lea e ia fale televise-ona ‘ausia le atunuu atoa! O le a sou taofi?