Lu’i sa’o a e se Sogi le Ali’i Palemia

Tusia Ilia L. Likou ma Fa’aliliu e Maiava ,

395 Hits

Nanai Lui Tokuma

Nanai Lui Tokuma

E le maluelue le finagalo o Nanai Liu Tokuma, se tasi o lo’o nofoia ‘ele’ele ma fanua i Sogi.

“Matou te le-o i se mea,” o le fa’aaliga lea a le ali’i 76 tausaga na fa’ailoa mai i le Samoa Observer.

“’Ou te fa’afetai tele atu lava i le Palemia o Tuila’epa mo lau lapata’iga, ia matou o-‘ese nei. Ae iai le mea ‘ou te fia ta’u atu, e te le-iloa se mea e uiga i le fasi-‘ele’ele lenei. E sili la ona tu’u pea matou, ‘aua le faia fua.”

O saunoaga a Nanai, e tali ai le fa’atonuga le Ali’i Palemia, ua uma le taimi na tu’u atu e tapena-‘ese ai ae fa’alaolao ‘ele’ele ia i Sogi. 

Na saunoa Tuila’epa, ua uma aso e 30 na tu’uina atu mo tagata uma o nofoia nei Sogi e o-‘ese ai ma o le a leai se isi avanoa e toe tu’uina iai. Na te le’i ta’ua le isi la’asaga e fa’atino e le malo pe a mae’a le 30 aso.

Ae matua tete’e malosi Nanai.

“Mo lou silafia, o le ‘ele’ele lenei, sa fa’amatu’u i lo matou tama o Tokuma Torurae ua levaona maliu, e Mata’afa, le ulua’i Palemia o le atunu’u lenei,” o lana fa’aaliga lea. “Fa’atasi ma ana ‘upu na saunoa ai i lo’u tama – “O e nonofo ma lau fanau i le ‘ele’ele lea; e le taitai gafatia e le malo ona totogi lana ‘aitalafu i lo’u tama, ma o lou nofoaga lena e o’o i le fa’avavau.”  

Sa fesiligia Nanai mo se fa’amalamalamaga ae tali, na molia-sese lona tama ona o le maliu o se tamaloa-faipisinisi.

“Na fa’asala i le oti,” o lana saunoaga lea. “’Ou te manatua lelei le taimi na fa’atofa mai ai lo’u tama ia matou uma, a’o saisai ona lima, ua sauni mo le fa’asalaga. Ua uma ona saisai lima i le maea, ua iai fo’i le maea i lona ua ma le ‘ie sa ufiufi ai ona foliga.

“A’o savali atu i le nofoaga o le a sisi ai, ae taufetuli ane ni ali’i-Saina se to’alua ma fai i Leoleo, o la’ua lea sa fasiotia le tamaloa faiPisinisi. Na mafua ai ona fa’asaoina lo’u tama. 

“Na savali mai lo’u tama ua sa’oloto, ma ona loimata e maligi i o matou luma ma lo’u tina …o le mafuaga lena o le fa’amatu’u mai o le ‘ele’ele lenei o lo’o matou nonofo ai pea e o’o mai i le taimi nei.”  

Na ta’ua e le tama lea, na tu’uina atu e le Palemia i lena taimi, le fasi-fanua lea, e avea o se taui sa ofo-fuaina atu ona o lea mea na tupu.

“Na saunoa lava le ali’i i lo’u tama a’o matou fa’alogologo uma iai, na fa’apea ai: “e leai se tupe a le malo e taui ai o ia ae na ofo-fuaina ia te ia ma lana fanau, le fanua lenei e nonofo ai se’ia o’o i le fa’avavau.

“O le mafuaga lena o le matou iai i’inei. Mai le fia o tausaga ua alu a’o lea ua fai mai le malo matou te o-‘ese. O le mea aupito ogaoga ma tiga, o le fai mai matou te fa’ataua se fasi-fanua i Falelauniu, ae leai ni matou tupe e faia ai lena mea.”

E matua te’ena e Nanai lea ofo.

“Ua ‘ou fa’alogo o lo’o taumafai e fa’atu se faletalimalo i le ‘ele’ele lenei. I luga o le fanua ua loa tausaga o matou nofoia ona o le ola o lo matou tama. Ua tele tupe ua alu i le fa’aleleia o lenei nofoaga, ua fausia o matou fale ma atina’e aiga i le tele o tausaga.”

O le lapata’iga lea na avatu i le malo, fai mai Nanai, e la’ititi lava le Ali’i Palemia o Tuila’epa, na o se ali’i-talavou i lena taimi na te le silafia se mea.

“O le mea aupito sili ona fa’anoanoa ai, ona ua to’afa palemia ua mavae atu, ae na o Tuila’epa lava lea ua oso fai lea fa’ai’uga ma fai mai matou te o i Falelauniu,” o lana fa’aaliga lea. “E le gata i lea, a ua fai mai fo’i matou te fa’ataua fanua ia ae leai se tupe o latou ‘aumai mo matou.

“Matou te le-totogia se mea, e le ni vale fo’i nei tagata-ola. 

 “Fai mai le malo matou te o i Falelauniu ona o fesuia’iga o le tau ae ua ‘ou fa’alogo o lo’o fuafua e fa’atu se faletalimalo i Sogi nei.” 

Saunoa Nanai, a o’o loa ina vevesi le mata’upu, o le a o’o loa i le Fa’amasinoga le mata’upu. 

“Lea ‘ou te iloa ua iai le malosi atoatoa i le malo e fa’atamo’e ai mea uma a le malo. Ae le-taitai ‘ou popole iai, o lo’o iai le matou aia atoatoa e finau ai mo le ‘ele’ele lenei.”

E le’i maua se avanoa ananafi i le Ali’i Palemia mo se saunoaga i lea mata’upu fa’apea fo’i le Fa’alapotopotoga mo ‘Ele’ele a Samoa (SLC). 

O le tausaga e 2011 na ulua’i fa’alauiloa ai le fa’ai’uga a le malo, ia si’itia tagata o lo’o nofoia ‘ele’ele i Sogi.

Sa ofoina atu ai e le malo mo aiga uma, le ta’i-kuata ‘eka o fanua i Falelauniu, ia latou lisiina ma avea ai lava ma o latou fanua totino, i le tau e sili teisi atu i le tolusefulu afe tala ($30,000.00) fa’atasi ma le tolu afe ($3,000.00) e tapena ai i uta. O le to’atele o aiga sa i Sogi, ua talia lea ofo. E to’atele fo’i, e matua le-talia lava.

Lua masina talu ai, na tu’uina atu ai e le tina-matua o Tala Leiataua se talosaga i le Ali’i Palemia e fa’apea: “Ua matou nofo sauni e fa’afeagai ma so’o se tulaga e o’o iai – ae matou te o-ifo fa’atasi uma lava i le ‘ele’ele lenei. Tuila’epa, o lo matou tu’ugamau lava le ‘ele’ele lenei,” o lana fa’aaliga lea. 

 “Fa’amolemole, tu’u pea matou i’inei. O lo matou ‘ele’ele lenei ma lo matou fa’asinomaga sa pologa ai o matou matua i le tanuina o le taufusi i le taimi o tatou pologa ia Siamani. Matou te manana’o lava e nonofo i’inei.” 

Na ta’ua fo’i e Tala, a naunau pea lava le malo ina ia o-‘ese: “’Ou te tatalo atu i le malo, ia ‘eli se lua ma lafo uma iai matou. E sili lo’u oti ma tanu ai i le fanua na tu’u mai e o matou matua ua tofafa mai tu’ugamau.”

© Samoa Observer 2016

Developed by Samoa Observer in Apia