Toe manatu tasi lava - Manumalo i le Popole (Vaega 2)

132 Hits

Toe mafaufau tasi lava…E 40 tausaga o atu-popole le   isi ‘olomatua ne’i maliu i le fa’ama’i o le kanesa. Na i’u lava ina maliu, ae le’i afaina i se kanesa, a ona ua matua lava lona soifua. Matua ma’umau atoa le isi ‘afa o lona olaga o popole i se mea sese!

O le asō, o le a fa’aauau ai ona tatou talanoa i ‘auala e manumalo ai i le popole. 

O le isi mea faigofie tatou te fai, o le manatu i le tala fa’atama, o le ulupo’o a o le ulupo’o, o le tagata-ola a o le tagata-ola. Ne’i galo ia tatou, e leai lava se isi e tu-fa’amauga, e leai se tagata e matua atoatoa i so’o se mea, e aofia ai ma ‘Oe. Tatou talia lelei le mau, e tofu tatou ma sese ma fa’aletonu ma e tutusa ai tatou uma i lea tulaga.   

E le mafai ona e finau i mea moni o le soifuaga nei, aua e iai lava mea e tutupu, e iai fa’aletonu i lea aso ma lea aso. Pei fo’i o tala masani a la’u ‘olomiti: “A’o ai na fai mai e sa’onoa le soifuaga nei?” Aua e le fa’apena! “E tutupu fo’i mea-leaga ma fa’aletonu i tagata lelei.” E tatau lava ona tatou talia mea lelei, talia fo’i ma mea le-lelei uma e fa’afelavei mai. Tatou ola i le lalolagi ua ‘aumai, ia pei o se tafe a se vaitafe, e ta’amimilo solo i ma’a ma so’o se la’au e fa’alalava ane i ona ala. 

O se fa’ata’ita’iga, e iai taimi e te aupito tigaina ai ma e amo to’atasi le mamafa o se fa’afitauli nai lo isi tagata. Pau lava o lea, o lou fa’atino ma le agaga fiafia ma taumafai e tilotilo i luma aua e aupito taua atu ou so’otaga ma le mafutaga ma tagata nai lo tupe. Manatua, e na o nai mea nini’i lava ia ma fa’atauva’a e alu-alu gata ma le-aoga. Ae maise fo’i, e le mafai ona e alu ma ‘ave pe a tu’ua o le ola nei. 

Pei fo’i ona tatou mo’omia le alofa ma le agalelei mai isi ona o tatou sasi ma fa’aletonu, e tatau fo’i ona tatou fa’apena atu i isi o tatou mafuta fa’atasi, ona tatou le tigaina ai lava lea ma leai se popole ae maua le agaga fiafia loloto, le to’ato’amalie ma fifilemu atoatoa. 

 “O le popole e tupu ai le maasiasi, o le popole fo’i, e le ‘ave’esea ai fa’afitauli ma fa’aletonu o taeao.” O le manumalo i le popole, o se “galuega tau-‘Oe”. O le taua lena, o le finauga fo’i i lou mafaufau ma lou fatu. Fetalai Iesu: “O ai ea so outou na te mafaia I lona popole ona fa’asiliina lona ‘umi i se aga e tasi? Aua e popole le aso a taeao i ana lava mea. E tatau i le aso lona lava leaga.”

Na ta’utino mai lava e Iesu, a e galue malosi, o le a Ia fa’atino le isi vaega tele o le galuega. A tu’u atu atoa fo’i lou ola i Ona a’ao, e leai se mea e toe popole ai aua o mea faigata uma e le mafai ona e fa’atonutonu, o le a Ia fa’atino mo ‘Oe ma a’u. E mata’utia lea ta’utinoga. Manatua, a iai lou fa’atuatuaga i Le Atua e pulea ai le lalolagi aoao, e mafai fo’i ona e fa’alagolago iai, e pulea e Ia lou ola atoa. Tatalo nei loa e fa’amalosi e Ia lou fatu ma lou ola atoa, atoa ai ma fa’afitauli ma fa’aletonu uma o le ola nei, o le a Ia avatu ia ‘Oe le filemu moni ma le malosi e manumalo ai i le so’ona popole – po’o a lava fa’afitauli o lua feagai. Toe mafaufau tasi lava…                       (Fa’aliliu e Maiava).

© Samoa Observer 2016

Developed by Samoa Observer in Apia