Tatala-aloa’ia le Survivor Ausetalia i le faletalimalo o Aggie

Tusia Ilia L. Likou, ma Fa’aliliu e Maiava ,

169 Hits

Su’a Hesed Ieremia, S.T.A

O le faletalimalo mata’ina o Aggies i le taulaga - le Sheraton Samoa Aggie Grey’s Hotel and Bungalows i Apia, sa fa’atinoina ai se sauniga fa’ale-iloga e tatala aloa’ia ai le pu’eina o le ata-fa’asolo o le Survivor Ausetalia, i totonu o laufanua o Samoa. 

O lea sauniga - na faia i le po o le Aso Lua – sa ‘auai ai le Afioga a le Ali’i Palemia, o Tuila’epa Sa’ilele Malielegaoi, o nisi o Minisita o le Kapeneta fa’apea le Vaega o le Ala-Ata 10 o polokalame fa’asalalau a le TV a Ausetalia. 

O le sauniga fo’i lea ua amata ai le pu’eina o le polokalame fa’asolo lea, lea ua fuafua e amata i le vaiaso fou. O le faletalimalo o Aggie le tasi o faletalimalo ‘autu o lo’o fa’aaogaina e le vaega pu’e-ata.

O le polokalame atoa lenei o lo’o ta’ita’ia e le ali’i-lauiloa mai Ausetalia, o Jonathanj LaPaglia.

O le vaiaso talu ai, na saunoa ai le Ali’i Palemia e fa’aalia lona fiafia tele, ona ua toe filifilia fo’i Samoa e fa’atino ai lea polokalame ta’uta’ua o lo’o maimoaina e le miliona ma miliona o tagata ‘ese’ese i le lalolagi.

“E lagona lava le fa’agae’etia ona ua toe filifilia fo’i Samoa e pu’eina ai le polokalame fa’asolo lenei a Ausetalia,” o le saunoaga lea a le Palemia.

 “E tele lava mea ua matua sa’o lelei ai ma talafeagai le fa’ai’uga ua latou fai, e le gata i le lava-saunia o faletalimalo ma isi nofoaga lelei ua iai nei, a o le iai fo’i o le ‘aufaigaluega ma tagata ua lava le tomai ma le silafia, e mautinoa ai le sologa lelei ma le manuia o le pu’eina o le polokalame.

“E ui fo’i ua tatou talimalo i se polokalame tau-televise tetele fa’apea i le lalolagi, ae o lo’o tumau lava ona tatou finau e puipuia ma fa’asao le matagofie o si o tatou si’osi’omaga fa’aleNatura, e fa’ailoa atu ai fo’i i le lalolagi lo tatou naunau ma le fa’apelepele i si o tatou atunu’u ma ona laufanua lafulemu.”

O le a pu’eina lenei polokalame i nofoaga ‘ese’ese i Upolu ma Savai’i, e le mafai ona fa’ailoa mai i le lautele.

© Samoa Observer 2016

Developed by Samoa Observer in Apia