O LA’U TALA FO’I

19 April 2016, 12:00AM

1. Matauina i Tala Fou le faaauau pea o faamasinoga tau solitulafono e faasino i le Faiga Palota Lautele talu ai nei- ma le tuuina atu o tupe i tagata palota-e ese ai mai faiga tau faasese ma faiga pi’opi’o.

O nei la mataupu uma ua tuuina atu i le Faamasinoga-ma ua faamaonia ai le sasao faa-afi o faiga pi’opi’o ma faiga tau faasese i totonu o Samoa! O lona uiga la- e matua leai lava se mea e igoa o se “mea sa’o” e toe maua i totonu o Samoa!

O le fesili –Aisea? O le tali- leaga e afua mai ta’ita’i o le faigamalo- le fai mea pi’opi’o ma o lea la ua tofo i ai tagata- e suamalie-ona faaauau ai lava lea leaga e maua ai manuia! Afai la o le faiga lea o le a alu ai tatou i lenei lima tausaga-o lona uiga- e fai le tane suau’u lea na pa i luga o le uafu i Matautu- na mafai ona titina-ae leaga o lea ua fua le tovine o Napota-ma ua tofo i ai tagata o le atunuu -e suamalie-ma o le a faaauau ai lava ona o loo maua ai o latou manuia-ae matelaina ai le atunuu-ma le anoano o aitalafu a le Malo ia latou te totogiina!

A fua la i le tau o le soifuaga-e totogi e tagata lafoga i le Malo mai o latou totogi faatauvaa-toe faaopoopo atu i ai ma le Lafoga o Taumafa poo le VAGST-toe faaopoopo i ai ma le totogi e le atunuu o suauu ia o loo vili ai le eletise -ma toe totogi aitalafu a le Malo- ma toe totogi pili o latou molī-toe totogi le aitalafu a le Malo i fafo lea ua silia le Piliona Tala!  A faapefea la ona manuia lenei atunuu? Silasila i le fua aliali o le mativa masaesae o le atunuu-ma fanau pele ia ua una’i faamalosi i luga o ala tetele i le ao ma le po e faatau atu oloa-ona o le fia maua o se tupe e tausia ai o latou aiga-a ua le o i a’oga? O le a sou taofi?

2. Matauina pea le leai o se saoasaoa faatulagaina mo le alatele mai Vailoa faasolo mai ai i Vaiusu ma faasolo ai lava i Sisifo. E ui lava ina o lea ua i ai molī-auala ua maua ai se fesoasoani mo lea faafitauli- ae o le upu moni lava ia-e le o mafai ai lava ona faaitiitia le soona saoasaoa o isi taavale! Afai la e le o mafai ona fo’ia lenei fafitauli-o le a la le mea e tatau ona fai i ai?

A tu’u ai lava faapea e pule le avetaavale ia? O le taimi e aupito i sili ona mata’utia o lea auala-o le afiafi faasolo ina po.Ia manatua la-e le na o taavale o loo feoa’i i lea auala-o loo feoa’i ai foi ma tamaiti i uila vilivae e leai ni molī. Ae le gata i lea-o le taimi foi lea o le afiafi-e vaaia ai ma isi taavale e le o laiseneina! O le fesili la-afai la o le tulaga lea o le a i ai i le taimi nei ma le faagasologa i luma-o ai la e noatia ai pe a tulai mai ni faalavelave? Ae faamata e mafai e lena tulaga ona toe faaola mai se tasi ua oti i sea faalavelave? Atonu la e lelei ona faapea-e sili ona tu’u se’i iloa pe toafia nisi o le atunuu e maliliu ai-ona faatoa fai loa lea o se fuafuaga mo lea itu! O le a sou taofi?

3. Matauina foi ma le fiafia tele le suiga tele ua ‘ausia e le Ta’ito’afitu a le Manu Samoa i le Taamilosaga lea faatoa mavae atu- O lea foi la ua faamaonia-e tele tulaga maualuga e mafai ona ‘ausia e le Taito’atifu a le Manu Samoa pe a loto i ai-ae a ta’a’alo loa ma le manatu foi lele o le le kea-ona malaia loa lea o a latou taumafaiga.

Ae o le itu taua e tatau ona iloa lelei e ia alii ta’a’alo- o lea ua fai i latou ma sui o le atunuu atoa e aofia ai ma o latou aiga ma nuu-ma o loo maimoa atu ia latou taaloga uma. E tatau foi ona latou faatauaina le mea moni-o a latou taleni ia ua mafai ai ona latou o’o atu i isi atunuu o le lalolagi- e le toatele ni Samoa ua o’o i ai-ma e le mafai foi ona latou o’o i ai -pe ana le seanoa a latou taleni. O le mea lea e momoli atu ai le faamalo ma le faafetai tele ia Falemiga Selesele ma lana ‘au –ona ua mafai ona latou siitia le suafa o Samoa i se tulaga maualuga-ae ia manatua-e le ona pau ai lena-ae tapenapena pea i taimi uma-ia sau le valaau-ae o lena lava tou te sauni! O le a sou taofi? 

4. Matauina foi i Tala Fou se tama’ita’i ma si ona tina matua-faatasi ai ma lana ta’utinoga -e le o se galuega e faigofie le tausiga o se tina matua-ma e lagona foi le fiu i nisi taimi-ae ona o le lagolago a le Faalapotopotoga mo e Puapuagatia-o lea ua maua ai lona fesoasoani tele. Afai la o lea faaupuga-o se faaupuga a se tama teine poo se tamaitai-ia faafetai  ona e te le o fiu ai-ma sa e finau pea. Ae ia manatua- poo le a lava –o le matafaioi lea a soo se tama teine! Aisea? Leaga e ui lava ina mafai foi ona tausi e se tama-ae i ai lona tuaoi! O le mea lea-afai o loo e tausi i si ou tina-o lou tofi lena ma lau matafaioi –e te manuia ai! O le tofi ia o le tama tama- o le tafaovale-ae o le teine lava na te faamaopoopoina le aiga-ma o ia foi e gafa ma le tausiga o matua pe a matutua! O le a sou taofi? 

19 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>