LIPOTI O LE SUESUEGA A LE KOMESINA O SULUFAIGA 2016

236 Hits

“Faasea o Suitupe Misa i Gaioioiga o Leoleo ma le suesuega i lana lava fuafuaga i le faaaogaina e Leoleo o le malosi ma fana” 

1. O le Ofisa o le Komesina o Sulufaiga

O le Ofisa o le Komesina o le Sulufaiga o le ofisa o le Palemene e tutoatasi mai le Malo i lalo o le Tulafono o le Komesina o Sulufaiga 2013 (“Tulafono”) ma e tolu matafaioi faapitoa e nafa ma le mataituina o auaunaga faatino faapea ma le galulue soosoo tauau ma le Malo ina ia faailoa vaega o loo manaomia ai le faaleleia atili. O matafaioi nei e tolu o loo taua i lalo:

i. Pulega Lelei: Suesueina ma ripotia faaiuga fai o Matagaluega ma Faalapotopotoga o le Malo;

ii. Aia Tatau o Tagata Soifua: Puipuia ma faamalosia aia tatau o tagata soifua e ala i aoaoga, suesuega ma ripoti;

iii. Vaega o Suesuega Faapitoa: Suesueina ma mataituina faasea e faasaga i Leoleo ma isi ofisa ua faatonuina e puipuia amioga tatau.

E tulimata’i le silasila o le Komesina o Sulufaiga i gaoioiga e le faaituau ma e amiotonu e ala i le suesueina ma le ripotia o mataupu e fitoitonu i matafaioi o loo taua i luga.

Mo nisi faamatalaga e uiga i le auaunaga o le Ofisa o le Komesina o Sulufaiga, poo le fia silasila i le Tulafono o le Komesina o Sulufaiga 2013, e mafai ona e asiasi ane i le www.ombudsman.gov.ws .

 

2. Pe faapefea ona saunia lenei Ripoti?

O lenei ripoti na saunia i lalo o le matafaioi faapitoa o le ‘Pulega Lelei’ ina ua faatoai mai se faasea e uiga i gaioioiga ma faaiuga fai o Leoleo.

I lalo o leTulafono, na mafai ai e le Komesina o Sulufaiga ona poloaiina molimau mo latou faamatalaga faatauto i le vaega sa nafa ma lenei suesuega. E leai ni loia e manaomia mo molimau nei i lalo o le Tulafono aua o taualumaga uma o lenei suesuega e malu puipuia lava seia vagana ai o se mataupu e tatau ona faailoa i le mamalu lautele po o se mataupu ua lausilafia uma e tagata ae le i faia le suesuega. E tasi lava le solitulafono e ono tulai mai pe a tuuina mai se faamatalaga molimau i le Komesina o Sulufaiga, o le tauto pepelo i lalo o le Tulafono o Solitulafono 2013. O le faanaunauga lava i soo se molimau ua poloaiina ma faatauto e le Komesina o Sulufaiga ina ia tuuina mai faamatalaga sa’o ma le moni.

I le faagasologa o lenei suesuega, e sili atu ma le 20 molimau na faatalatalanoa, e aofia ai le mamalu o le atunuu sa iai tonu lava i le nofoaga na tupu ai le mataupu, o leoleo na aafia i le mataupu, o leoleo e lava le tomai i le faatinoga o suesuega, faapea ma le afioga i le Komesina o Leoleo. E faitau vaiaso le faafoega o nei faatalatalanoaga ma e sili atu ma le 50 itula le taimi faaaogaina. O faatalatalanoaga uma o le suesuega sa faamauina i le masini pu’e ata ma le pu’e leo.

Sa maitauina lava le faaituau o nisi o molimau e lagolagoina gaioioiga a leoleo, a’o isi e mafuli agai le na faasea. Na silasila totoa le vaega suesue i ia molimau ma sa le mafai lava ona fausia se faaiuga mautu pe a leai sona faamaoniga.  O le faanaunauga lea o le Komesina o Sulufaiga ina ia sa’o ma leai se faaituau i le faatinoga o le suesuega aua o lona popolega ne’i se’e ese mai taula’iga nei, ona le maua ai lea o le fatu o le mataupu o loo suesueina.

O Samoa o se atunuu e laitiiti, ma i le faagasologa o taualumaga o suesuega faapenei, e ono alia’e ni aafiaga poo se sootaga o se isi o le au suesue ma se molimau o le a faatalatalanoa pe suesueina. E ao ona silafia, soo se mataupu e faafoe e le Ofisa o le Komesina o Sulufaiga, e muamua lava ona faailoa ni aafiaga a se isi o le au suesue i le mataupu ma fai ai fetuunaiga. I lenei mataupu, na iai le sootaga o le tasi ofisa suesue ma se molimau, ma sa ia faailoaina lea tulaga ona se’e ese lea o ia mai le faatalatalanoaga o lea molimau. 

I le maea ai o le suesuega, na tuuina atu i le afioga i le Komesina o Leoleo se ata o le ripoti mo ni ana faamatalaga. E le natia le iai o le tasi o mau na sese ae na toe faasa’o. Na lāgā e le afioga i le Komesina ni atgaluga e tusa ma le ripoti ma o loo faamatalaina auiliili i le pepa Faaopoopo G. O isi ana mau e uiga i le suesuega o loo faamauina i laupepa mulimuli o le ripoti. E iai alii leoleo sa masalomia o la molimau i luma o le vaega suesue ma sa toe valaauina mo se isi faatalatalanoaga. Sa tumau lava o la molimau e leai se suiga.

Mo nisi faamatalaga e uiga i le Ripoti, o loo iai pepa faaopoopo e pei ona taua i lalo:

PEPA FAAOPOOPO FAAMATALAGA

A Tusi o le Komesina o Sulufaiga (KOS) i le Aso 10 Setema 2015 e logoina le Komesina o Leoleo (KOL) lona faamoemoe e fia suesueina le faasea o Suitupe agai le Matagaluega. 

B Tusi o le KOL i le Aso 14 Setema 2015 e talifuaitau mai i le tusi o le KOS i le Aso 10 Setema 2015.

C Tusi o le KOS i le Aso 16 Setema 2015 e logoina le KOL le faamauina o lona talifuaitau mai ae o le a faafoeina pea le suesuega i lana lava fuafuaga.

D Tusi o le KOS i le Aso 16 Setema 2015 e logoina le Minisita o Leoleo lona faamoemoe mo le faia o le suesuega.

E Tusi o le KOS i le Aso 15 Fepuari 2016 i le KOL o loo faapipii atu le ata o le ripoti o le suesuega mo ni faamatalaga.

F Tusi o le KOS i le Aso 16 Fepuari 2016 i le Minisita o Leoleo o loo faapipii atu le ata o le ripoti o le suesuega mo lona silafia ma ni faamatalaga.

G Tusi o le KOL i le Aso 25 Fepuari 2016 i le KOS o ana faamatalaga agai le ata o le ripoti o le suesuega sa tuuina atu.

H Tusi o le KOS i le Aso 1 Mati 2016 i le KOL e faamauina ona faamatalaga i le ata o le ripoti o le suesuega. 

 

O LE SUESUEGA

3. Faatomuaga

O le Aso Lua, 18 Aukuso 2015, o se aso e uiga ese i le talafaasolopito o Samoa – o se uluai taimi lea ua faaaogaina e leoleo ni fana mo se osofaiga ua fuafuaina i totonu o se nofoaga faitele e pu’e ai le tagata. Ua pei o se ‘vaaiga i se ata tifaga’ le faasiilima i fana o Suitupe Misa (Suitupe) ma pueina e Leoleo ofu sivili ma sa faateia ai le loaloa o tagata i le Maketi i Fugalei. Mulimuli ane maua le faamatalaga e leai se solitulafono o le alii sa pu’eina ma o le faatinoga o lenei osofaiga na fausia i luga o faamatalaga feaveai poo tala faalogo e le faavaeina ma ua fesiligia ai le faaiuga o le afioga i le Komseina o Leoleo (KOL).

O lenei mataupu na tulai mai ona o nisi o gaioioiga poo osofaiga o Leoleo sa faalauiloa, ma sa iai foi tuuaiga i le soona faaaogaina o latou malosiaga i le faataunuuina o tiute faa-Leoleo. 

O le fesili mo Samoa: tatou te taliaina ea lenei faiga o le faaaogaina o fana e faatino ai galuega faa-Leoleo, pe faamausali pea o tatou tu ma aganuu o le va fealoai mo fesootaiga?

O le a taumafai lenei suesuega e saili se tali o le fesili o loo taua i luga i le auiliili totoa o le faasea a le na pueina e Leoleo faapea le faaaogaina lautele o le malosi faa-Leoleo ma le faauupegaina i fana aemaise lona aafiaga i le tatou atunuu.

 

2. O le Tulafono

O loo manino lava tulafono i Samoa e faatatau i le taimi e faatagaina ai le faaaogaina o fana e Leoleo.

I lalo o le Tulafono o Malosiaga o Leoleo 2007 (Tulafono o Malosiaga o Leoleo) e mafai e le Komesina ona  faatagaina se Leoleo e umia se fana ae seia vagana ai:

(a) ua faamaonia e le Minisita le faaauupegaina o le leoleo po o se tagata; ma

(b) ua maea ona faatinoina i se tulaga faamalieina e le leoleo po o se tagata, se aoaoga talafeagai i le faaaogāina i se tulaga saogalemu o fana ma auupega matautia.

O loo manino i lalo o le Tulafono o Malosiaga o Leoleo e faatoa mafai ona faamaonia e le Minisita se leoleo po o se tagata ina ia faaauupegaina ‘pe afai ua manaomia le faaauupegaina ona o tulaga faapitoa e aliae mai ma faapea ona tusa ai ma poloaiga po o tulafono faafoe talafeagai tau lotoifale a leoleo’. O tulafono faafoe talafeagai tau lotoifale o loo taua, e maua i le Faiga Faavae o Auaunaga o Leoleo o Samoa i le Faaaogaina o Malosi 2012. E limataitaiina foi galuega suesue a Leoleo e le Taiala mo Suesuega o Mataupu Tau-Solitulafono.

O le isi vaega o le tulafono e faatatau i lenei faasea, o le eseesega o le pu’eina ma le taofiga o le tagata mo suesuega. O le taofi o lenei ripoti, ‘e ese le puniloa, e ese le punimatatogo’ i gaioioiga nei e lua.

I tulaga tau le taofiga o le tagata, i lalo o le fuaiupu 36 o le Tulafono o Malosiaga o Leoleo, o loo tuuina atu le faatagaga i se leoleo e ’taofia’, ‘taofia mo suesuega’ ma ‘suesueina’ se tagata pe afai ‘ua masalomia e se leoleo, i luga o mafuaaga talafeagai e faapea o lo o tauaveina e se tagata, po o sa ia umia i se isi faiga e ese ai se mea e talafeagai i se solitulafono ogaoga’. O le gaioioiga la e puipuia mai ai le nanaina, leiloa, po o le faaleagaina o se mea, e mafai e le leoleo ona taofia le tagata mo suesuega, faatino le suesuega ma faoa faamalosi le mea (pe afai ua maua) e aunoa ma le faatagaga i se tusi poloaiga e suesueina ai ona e ogaoga ma faanatinati tulaga ua aliae mai.

A’o le pueina o le tagata, seia vagana ai ‘ua faaailoa manino e le leoleo i le tagata o loo masalomia ua le mafai ona ia alu ese ma o le a suesueina e le leoleo i luga o le masalomia o se solitulafono, o le pueina lena o le tagata’.

O lona uiga e mafai e leoleo ona taofia le tagata mo suesuega i le mea o loo iai i lena lava taimi, a’o le pueina o le tagata seia vagana ai ua talitonu le leoleo i luga o mafuaaga talafeagai le masalomia o le tagata lea na faia le solitulafono. A faapea e pueina lenei tagata, e iai ona aia tatau e pei o le faailoaina o moliaga e faasaga ia te ia faapea ma se avanoa mo le sailia o se loia.

O le a fai ma asiasi lenei ripoti i le tulafono, faiga faavae ma taiala e tau saili ai pe na faatino nei gaioioiga i se tulaga e tonu ma le tatau.

 

5. O le Maketi i Fugalei: Faagasologa ma le Iloiloga

1.1 Gaioioiga ae le’i faafoeina le pueina o le tagata

O le pueina o Suitupe na amata fausia mai i luma atu o le aso tonu na faatino ai lea gaioioiga. O le Aso 13 Aukuso 2015 na faamaonia ai e le afioga i le Minisita o Leoleo  i lalo o le fuaiupu 13 o le Tulafono o Malosiaga o Leoleo  le mafai e le Komseina ona faatagaina le umiaina ma le faaaogaina e leoleo o fana. O lea lava gaioiga na alia’e ai ni popolega.

O le itu muamua, o le faamaoniga  mai le Minisita, e le i faaaogaina le puipuiga o le faaupuga  o tulaga faapitoa e aliae mai ma faapea ona tusa ai ma poloaiga po o tulafono faafoe talafeagai tau lotoifale a leoleo i lalo o le Tulafono o Malosiaga o Leoleo. Ae na tatala atu i leoleo ua faatagaina, ‘ina ia latou umiaina fana...i le faataunuuina o se tusi poloaiga i le suesueina ma le faoa faamalosi o fualaau faasaina i ona tulaga tetele faapea ma fana o loo umia faasolitulafono...ma isi tiute faapitoa ua faatagaina i lalo o poloaiga ma tulafono faafoe o le Komesina mai le Aso 13 Aukuso 2015 i le Aso 13 Aukuso 2016’.

O le tatalaina o lenei faamaoniga mo le faaauupegaina o leoleo ua le o gatasi ma le mafuaaga moni na ala ai ona fausia le Tulafono o Malosiaga o Leoleo. O le faaupuga lea o ‘Tulaga Faapitoa’, e le o manino lelei lona faauigaina, ma e foliga mai e faapito tasi lona faaaogaina. O le faauigaina o ‘tulaga faapitoa’e le Tusi mo Uiga o Upu Faa-Peretania, ‘o se mea e uiga ese pe e le masani a’i’. O le faamaoniga mai le Minisita sa faapitoa lava mo le suesueina ma le faoa faamalosi i luga o se tusi poloaiga, o fualaau faasaina i ona tulaga tetele faapea ma fana o loo umia faasolitulafono MA isi ‘tiute faapitoa ua faatagaina i lalo o poloaiga ma tulafono faafoe o le Komesina’. O le taunuuuga o le tatalaina o lenei faamaoniga, o le a tuuina atu i a’ao o le Komesina le malosiaga e suia ai Leoleo mai se vaega e le faaauupegaina i se vaega ua faaauupegaina i luga o le faamaoniga o le Minisita. E le gata i le faaleaogaina o le agaga o le Tulafono o Malosiaga o Leoleo, o le a avea ai foi ma avanoa e aveesea ai malosiaga mai sui tofia o le Palemene i faiga o faaiuga pe alagatatau ona faaauupegaina leoleo, ae o le a se’e atu i le Komesina e tafilisaunoa ai. E tatau pea ona faatumauina i le Minisita le malosiaga mo le faatagaina o le faaauupegaina o leoleo mo tulaga faapitoa ua alia’e mai.

O lenei faamaoniga na muai faaaogaina i le Aso 14 Aukuso 2015 mo le osofaiga i Faleatiu. Pe ana faapea e faagata i lea osofaiga le faaaogaina o le faamaoniga mo tulaga faapitoa, e leai se afaina ona o loo uia pea auala talafeagai.

E le i atoa le vaiaso o le faamaoniga o le Minisita i le Aso 13 Aukuso 2015, ae faaaoga sese e le Komesina le faatagaga e faaauupegaina ai leoleo mo se tulaga e leai se faapitoa, o le mataupu lea o loo suesueina nei.

E ao pea ona silafia, o loo iai lava tulaga e tatau ai ona faaauupegaina leoleo mo le latou saogalemu faapea ma le saogalemu o le mamalu lautele, ma e matua leai se agaga o lenei suesuega ina ia taofia le toe faaauupegaina o leoleo i fana. O le faanaunauga ina ia faataoto ni tapulaa e fuafuaina ai le faaaogaina tatau o auupega malosi e tusa ma ala o le tulafono.

(Fa’aauau a-taeao)


© Samoa Observer 2016

Developed by Samoa Observer in Apia