Aloᾱia le filifiliga o le Ta’ita’ifono ma le Sui o le Komisi

19 March 2018, 12:00AM

(OFISA SO’OUPU) O le fa’aiuga o le vaiaso na te’a nei na fa’afeiloa’i aloaia ai e le Komisi e Pulea Galuega a le Malo (PSC) le Ta’ita’ifono Fou ma le Sui o le Komisi Fou a le Komisi o Galuega a le Malo (PSC).

O lea filifiliga na faamaonia mai e le Kapeneta.

O le Afioga ia Aiono Mose Su’a ua tofia nei e avea ma Ta’ita’ifono o le Komisi e sui tulaga ai ia Afioga ia Tuu’u Dr Ieti Taule’alo ina ua mae’a ai le ono tausaga o ia umia lea fa’aeaea.

O le Afioga ia Auelua Samuelu Enari, ua avea ma sui o le Komisi e sui tulaga i le Afioga ia Safuneituuga Paaga Neri.

I se sauniga faafeiloai na faia, na saunoa ai le Afioga i le Minisita o le PSC ia Tuilaepa Dr Sailele Malielegaoi, ma fa’afetaia le tautua a’o feagai ai Aiono ma Auelua io la valaauina i le Malo i le tele o tausaga ua tuanai.

Na ia toe fa’ailoa o tofiga uma e mai le Atua, i lona aotelega a’o le’i auina mai Aiono ma Auelua i lenei lalolagi, ua leva ona silafia e le Atua, e i ai le taimi o i laua nei, e seei ai i nei tofiga.

I lona finagalo na ia fautuaina ai le Ta’ita’ifono ma lana Soᾱtau, ina ia matuᾱ silasila toto’a i le tulaga o suiga talafeagai, ma le fa’atinoga o ni a’oa’oga mo le aufaigaluega a le Malo, ia mautinoa le si’itia maualuga o le tomai e fa’atinoina ai mo’omiaga mo le atina’e o Samoa aoao.

O Aiono Mose Su’a ua loa tausaga o avea ma Ofisa Sili o Pulega o le Matagaluega o le Va-i-fafo a Samoa (MFAT).

O le Afioga ia Auelua Samuelu Enari na avea ma Ofisa Sili o Pulega o le Matagaluega o Pisinisi Alamanuia ma Leipa (MCIL) mo tausaga e tele ua mavae.

I le mau tulituliloa a le Malo, ua o latou mautinoa ai le tulaga maualuga o le silafia i le tofᾱ saili ma le fa’auta’utaga sasa’a a nei tamᾱli’i, la te fa’afoefoeina ai tiute ma faiva e mata’ituina ai le sologa lelei o galuega a le Malo ma ona tagata faigaluega.

O le Afioga ia Aiono na fai ma fofoga taumomoli o le la sa se’e lua ma Auelua, e momoli le agaga fa’afetai i le Malo ona o le amanaia pea o i laua, e avea ma auauna faigaluega i nisi o tofi ma tiute ua tofia ai.

E to’atolu i latou o lo o i totonu o lenei Komisi, e aofia ai Aiono Mose Su’a (Ta’ita’ifono), Auelua Samuelu Enari (Sui o le Komisi), ma le Afioga ia Vaosa Epa (Sui o le Komisi) o lē sa avea ma Ofisa Sili o Pulega i le Matagaluega a le Palemia ma le Kapeneta i tausaga ua mavae.

19 March 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>