O la’u tala fo’i

168 Hits

1.Matauina i Tala Fou se ulutala fai mai o loo puipuia pea e le Palemia ana mea faalilolilo-ona soso’o mai ai lea ma le faaupuga a le Palemia e faapea:- “E le’i musuia lava a’u e le Agaga i se mea e tatau ona fai!  Atonu o taeao-(o ananafi lea), talu ai -o mea uma lava ou te faia –“ou te faalagolago lava i le Atua ma Lona Agaga” E le o manino mai la i lea faaupuga poo le a tonu lava le uiga o ia upu –“o mea uma lava”! Ae tusa ai ma la’u faauigaina o lea fuaitau- “o mea uma lava,” o lona uiga-“o mea lelei ma mea leaga” A tu’u la i se tasi itu-e le tioa lava a soona faaalu e le faigamalo le faitau miliona ma miliona o tupe a le atunuu e ala i ana faiga pi’opi’o ma taupulepulega leaga a tagata faigaluega o le Malo-ae leai lava ma se mea e tasi o  fai i ai! 

E le tioa foi a faifai pea nei faiga pi’opi’o-ona o lea lava ua ta’utino mai e le Palemia le pogai na fai ai- o mea uma lava mai le Agaga o le Atua! E le tioa foi a musu e tuuina atu lea mataupu i le Faamasinoga e fai i ai le amiotonu ma le faamasinoga-ona o le musumusuga a le Agaga o le Atua! O le mea lea-o le tuu-a-lalo i le atunuu -ae le o se faatonuga-ia tatou onosa’i ia i lenei 5 tausaga-leaga o mea uma lava a le faiga-malo o loo fai-o lea lava ua ta’utino e le Palemia le pogai e ala ai ona fai-ona o le musumusuga a le Agaga o le Atua! O le a la le mea e tau faalafi ana mea lilo pe afai o ni mea mai le Atua? O le a la sou taofi? 

 

2. Matauina foi i Tala Fou le faateteleina pea o le vevesi i le va o tamaiti a’oga toetoe lava o aso uma. O le fesili la-aisea ua faapenei ai fanau a le atunuu? O ai e mafua ai? O le isi fesili-o le pogai lea e mafua ai ona ave fanau  i a’oga? Afai o nei faalavelave ma misa -e tula’i mai pe a uma a’oga-o lona uiga la- e le tuua’ia le mamalu o faia’oga ma le latou pito-laau! O lona uiga-atonu e talafeagai pe a matou faapea atu-e ono mafai foi ona tuua’ia ai matua! 

O le uiga o le manatu-o matua e tatau ona latou fo’ia lenei mataupu-o lona uiga- afai o matua e i ai taavale-e tatau ona faamalosi e aumai o latou alo mai le a’oga i aso uma- i lenei taimi o le vevesi! E i ai foi le sao o a’oga e mafai ona fai e fo’ia ai lenei mataupu- o le tutuli lea o a latou tamaiti o taulamua i le faatupuina o nei vevesi! 

Mo tamaiti e malaga i pasi i o latou nu’u-ua tatau fo’i ona sui nofoaga e faae’e ai pasi mo tamaiti e o i sasa’e ma le nofoaga o pasi mo tamaiti e o i sisifo! Mo tamaiti e nonofo i nuu e latalata i Apia- e tatau foi ona ese se isi nofoaga e pu’e ai a latou pasi! Ae o le itu e sili ona taua-o le sao lea o a’oga uma ma le Ofisa o Leoleo. O lona uiga-ia matua faate’a ma le a’oga tamaiti uma e faatupu vevesi i totonu o le taulaga. Ia saisai foi e Leoleo tamaitai faatupu vevesi uma ma ave i le falepuipui-ina ia mafai ai ona a’oa’oina o latou mafaufau! O le a sou taofi? 

 

3.Matauin a foi i Tala Fou-o lea lava e tafaofao i tua isi o pagota e to’alua na sosola ese mai le falepuipui i Tafaigata-i le faaiuga o le vaiaso talu ai. O le tala la fai mai o lea lava e fai sailiga a Leoleo-ma o lea pagota-o Tui Samuelu- e mai Manono-Tai, Falelauniu ma Vailoa, ae o le isi pagota, o Aniseko Vaileti. O Samuelu fai mai le tala na vaaia i Savaii-ma na falepuipui ona o le gaoi. O le fesili la-o le a le pogai e mafua ai ona sosola so’o i tua nei pagota? O fea Leoleo ae sosola i tua Pagota? O le a le pogai e maumau ai tupe a le atunuu e totogi ai nei tagata e galulue i le Falepuipui-pe afai e le o faia o latou tiute? O le a le pogai e sosola so’o ai i tua pagota? 

A tatou tilotilo lelei i lenei faafitauli- e peiseai o se mea lea ua tupu i aso uma, ma o lona uiga- e leai se galuega e tasi o faia- e fo’ia ai lea itu! E aliali mai foi- e pule lava le pagota ia poo fea le taimi e fia alu ai i tua-ona alu lea! Faamata o mamafa i le Vaega o Falepuipui le saogalemu o le atunuu? Aisea ua le saili mai ai se tasi na te mafai ona fo’ia lenei faafitauli? Afai e ono maua se Papalagi mai fafo na te fo’ia lea faafitauli- tusa lava pe taugata ae tatau ona aumai –talu ai e le mafai ona tauia i ni tupe le soifua o tagata o le atunuu!O le a sou taofi? 

 

4.Matauina foi i Tala Fou e faapea e to’atolu ni tamaiti a’oga o loo taofia e Leoleo-talu ai se misa na fai i Savalalo i le Aso Gafua. Na faaalia la e le Fofoga o le Matagaluega o Leoleo ma Falepuipui e faapea- o lo latou manatu –o le tuuina atu o se lesona ia i latou- e a’oa’oina ai o latou mafaufau! Manaia tele lea fuafuaga! O aso nei-ua matua ese lava tamaiti a’oga mai tamaiti a’oga o Samoa i aso ua mavae! O le pogai-e tasi lava le faamoemoe sa to’a’aga ai tupulaga i aso ua mavae i a’oga. Ia maua le poto e faafeao ai i latou –e leai ni taua ma ni misa na fai i la aso. 

E pau lava taua ma misa na fai i na aso-“o taua o le mafaufau poo le sailiga lea o le poto ma le aoaoina-e tusa ai ma Tusi Pasi sa faatūtū i ai a’oa’oga i na aso e pei o le Samoan Public Service Exam-N.Z. School Certificate-University Entrance-ona sikolasipi loa lea ma ulufale i le Iunivesite i Niu Sila! Ae a aso nei i tamaiti a’oga? 

Ua na o le fia-malosi, faalialia vale-tautalaitiiti ma le mitamita vale ae faavalevalea! O le a la sou taofi? 

© Samoa Observer 2016

Developed by Samoa Observer in Apia