Tatau ona si’itia totogi

By Deidre Tautua-Fanene 19 February 2018, 12:00AM

Ua tatau ona i ai se si’itaga i totogi o tagata faigaluega ina ia ogatasi ma le tau o le soifuaga.

O le talitonuga lea o Tusi Tamate mai le afioaga o Siusega. 

O lenei tamā e toa’valu lana fanau ma o ia o se faifa’atoaga.

Sa ia fa’ailoa i le Fofoga o Samoa e o’o lava i ni taumafa lelei ma maloloina ua le gafatia o le mafua’aga lea e latou te fa’atau ai taumafa mai faleoloa o Saina ona e taugofie.

“E na’o lo’u to’alua e faigaluega, a’o a’u e fai la’u fa’atoaga.

“Sa ma faigaluega uma ma lo’u to’alua ae peita’i e le gafatia e ma totogi ona fa’asoa i mea fai a le aiga, e fai o aoga a tamaiti, o pili o tamaiti, o mea faalenuu ma mea fa’alelotu e le gafatia lava e ma’ua totogi ona fa’asoasoa.

“O le mafua’aga lea ua ou nofo ai e fai le fa’atoaga ona e lelei e maua ai le mea’ai ma sina tupe fo’i pe a o’o ina lelei le fa’atoaga.”

Sa ia ta’ua e sili atu le olaga lea ua i ai nai lo le tulaga lea sa i ai muamua le la’ua aiga.

“O le tau o le soifuaga ua alu i luga a’o totogi o tagata faigaluega o lo’o tumau pea,” o lana saunoaga lea.

“E leai se paleni o i ai na o le pologa ai o tagata.

“Ana fa’apea e ogatasi mea ia lua o le a le mafuaaga o le a faitio ai tagata?

“Ae peita’i o le itu lea e i ai e alu i luga le tauagata o oloa ae alu i lalo totogi o tagata matua’i le paleni lava ma le soifuaga o le tagata ola.

“Ou te leiloa i le tagata faigaluega po’o le a le lelei o se faigaluega pe a fua atu i le totogi amata lea e i ai $2.30.

“e leai ma se mea aoga e maua i nei ituaiga totogi na o le fiu e faigaluega ae leai se mea aoga a le aiga aemaise o le fanau e maua ai ma e leai fo’i se fiafia e maua ai na o le misa ai ma ta’ito’alua ma aiga pe a le lava le fa’asoa.”

Sa ia ta’ua e tatau ona si’itia le totogi amata i le $5.

“Ua tatau ona fai se fuafuaga a le malo, ma ia alolofa i le pologa ma le oi o le atunu’u lea ua i ai.

“Tatau ona fai mase alofa ina ia fai ai se fuafuaga a le au fai pisinisi, ona o lea e maitau atu o lo’o maua lava polofiti ale au fai pisinisi ma le malo ae pologa ai lava nai tagata faigaluega.

“E maua tupe a le malo e fai ai va’alele ae o lea lava e tumau totogi o nai tagata.

“afai ua mafai ona latou fa’atau se vaalele aisea e le mafai ai ona latou sii I luga totogi o tagata?

“Tele tupe ale malo ma e tele tupe maua mai i atunuu i fafo o lo’o fesoasoani i atina’e ae le mafai lava ona aumai sesi vaega o na tupe e fai ai totogi o nai tatou tagata.

“E fai o le taugata o le soifuaga toe po mai tatou mata i le alu i luga o lafoga ua atili ai ona leai se mea lelei ale aiga e maua.

“O le meatonu lava ua matitiva ai Samoa, e ui i le faimai o le malo e le mativa Samoa ae o lea e maitau atu o lo’o mativa Samoa ona o lo’o oi tagata i le taugata o le soifuaga.

“Tatau lava i le malo ona sui le latou va’ava’ai, tatau ona fai ma se alofa i nai tagata, tatau ona va’ava’ai o tatou o tagata nuu ae le ua na’o ni totogi lafoga.

“Tu’u ia le taumafai e fa’atosina mai tagata i fafo e ala lea i le fausiaina o fale tetele, o lea e totogi uma e tagata faigaluega aitalafu o lo’o fausiaina ai na fale.

“O le afu o tagata ia e alu, ae fai mai fo’i le upu ‘o le afu o le mea e o’ona.’

By Deidre Tautua-Fanene 19 February 2018, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>