Toe to manatu le tinā i le afā o Gita

Tusia Deidre Tautua ,

83 Hits

Matailiili Lapi mai le afioaga o Samusu, Aleipata.

Matailiili Lapi mai le afioaga o Samusu, Aleipata.

O le aiga o le tinā matua i a Matailiili Lapi mai le afioaga o Samusu, Aleipata sa fa’aleagaina uma latou fale i le afā.

Ae ui i lea e fa’afetaia e tinā le Atua ona e leai se tasi o lona aiga sa ma’imau se soifua i le vaiaso na se’i mavae atu nei.

O lenei tinā e to’aono nai ona alo sa ia ta’ua i le vaega a le Fofoga o Samoa o le taimi nei ua leaga uma le latou fa’atoaga ona o faiga le alofa a Gita.

O se tulaga e le mafai ona fa’agaloina.

O le ma’ema’ea o Gita ua leai ai se fale e nonofo ai lenei aiga, ma o le mafuaaga lea o le ausulusulu solo o lenei tinā e su’e se mea e nonofo ai.

“Pau le aiga sa mafai ona matou sulu i ai o le aiga o lo’o faasaga mai i lesi itu ona e lelei le latou fale e sima,” o le saunoaga lea a Matailiili.

“Sa matou oese ae tu’u ai Gita e fai ona uiga i le matou fale po’o fea e i’u i ai.”

Sa ia ta’ua fo’i o le vai ua ofi atu i totonu o le fale ma ua fa’aleagaina uma ai latou meatotino.

“E pei ona e silasila mai o le fale lea matou te i ai toetoe lava ina a paū i lalo, ma ua mana’omia lava se fesoasoani, ona ua fa’aleagaina uma e Gita matou meatotino e o’o lava i lavalava.

“O lesi matou fata laupapa ua lelea uma i faiga a Gita, o leisi matou fale samoa ua leai se mea o totoe ma e le’I maua lava se taimi e toe fai fa’alelei ai le matou nofoaga ona o lea e fa’amuamua le fanau ma a latou aoga i le taimi nei.

“Tele meatotino ua fa’aleagaina uma, e o’o lava i le fa’avae o le fale ua leaga ona e le’o se simā lea sa fausia ai le fa’avae ae laupapa. 

“E o’o i le vai lea na sao mai i totonu o le itu leaga lena ona ua va’ia uma ma ua le toe saogalemu ona toe nofo ai se tasi.”

E le gata i lea a sa ta’ua e Matailiili e o’o lava i le latou fa’atoaga ua leai se mea o totoe.

O le tasi lea o mafatiaga tele o lenei tina ona e na o le toatasi lava le tagata faigaluega o le latou aiga.

“O le va’ava’ai atu o le araisa le mea’ai lea o le a tua i ai i le vaitau lenei o le oge ona e na o le pau lea o le mea’ai lea e maua i le taimi nei.

“E nao si a’u tama o lo’o faigaluega i Apia.

“Mai la’u fanau atoa e na’o ia lava lea o lo’o tausia le aiga atoa ae e le gafatia ona e fai o mea fa’alenu’u, o mea fa’alelotu ae o le tausiga o a’u ma le isi to’atele o le aiga.

“Ae o si a’u tama fo’i e fai lona to’alua ma lana fanau e to’alima.

“E tau posiposi le tupe e tausi ai lana fanau fa’apea ma le aiga atoa.

“E le mafai ona gafatia e le totogi ona tausi nei tagata uma, sa fai o le fa’atoaga sa fa’alagolago i ai e fesoasoani i si tama a’o lenei ua leai se fa’atoaga o lea la ua mana’omia ai lava se fesoasoani mo si o’u aiga.”

O le latou suavai ma le eletise sa ta’ua e Matailiili ua tipi ona o le le lava o le seleni.

O lo’o fa’aaogaina e lea aiga le uili paelo e la’u mai ai a latou vai mai nisi o aiga o lo’o i ai suavai ma o se tulaga faigata fo’i lea.

Afai ua mu lou loto ma ua e fia fesoasoani i lenei aiga fa’afeso’ota’i le numera 7249073.

© Samoa Observer 2016

Developed by Samoa Observer in Apia