Tofia Alex Su’a e avea ma Peresetene o le Asosi a Fa’afāfine

Tusia Deidre Tautua ,

85 Hits

Peresetene Fou o le Asosi a Fa’afafine i Samoa Alex Su’a

Peresetene Fou o le Asosi a Fa’afafine i Samoa Alex Su’a

O le ali’i loia ia Alex Su’a ua avea nei ma Peresetene fou a le Asosi a Fa’afafine i Samoa.

Ua ia tauavea mai le tofi i le maliu ai o le sa amataina le asosi ma le sa avea ma peresetene mo le 17 tausaga le ali’i ia So’oalo Roger Stanley. 

O Su’a o se tasi lea o sui na amataina mai le asosi ma o ia o se ali’i loia.

E tusa ai ma le fa’atalanoaga ma le so’oupu a le asosi, Kevin Schuster sa ia fa’aalia ai o le sui peresetene oVaialia Iosua.

O Vanilla Ice Heather o le sui auai ale fa’afatama o lo’o i totonu o le komiti fa’afoe.

O le faia ai o suiga ma le filifilia ai o sui o le komiti fa’afoe a le asosi sa fa’atautaia lea e ala i le latou fono fa’aletausaga sa faia i le fa’aiuga o le vaiaso na se’i mavae atu nei.

“O ta’ita’i fou o le asosi e le o ni sui fou i totonu o le asosi, ona ua fai si umi ona tautua ma togi ma’a i totonu talu ona fa’avae mai le asosi.

“O le matou fono muamua lea talu ona maliu So’oalo o le sa avea ma ta’ita’i ma o se tasi fo’i ua loa lana tautua e le gata i le asosi ao le atunuu foi.”

Sa ta’ua e Alex o le filifiliina o le peresetene sa autasi uma ai lava le toa’tele o le komiti o le asosi.

“Sa ou teena ona o lo’o i ai i latou o lo’o tele le agavaa ma le tomai, ae peita’i ua autasi lava i ai le asosi o lea sa ou taliaina ai.

“Lagona lava le loto maualalo ma le fa’agae’etia e le ona o le tosi ae ona o le talitomuina fo’i o lo’u nei tagata e le komiti aemaise ai le asosi.

“O le a tauave pea le lagolagosua ale S.F.A. i le amanaiaina o fa’afatama ma fa’afafine i totonu o le atunu’u aemaise i totonu o aiga.”

O le peresetene fou o se ali’i ua loa tausaga o avea ma loia ma o ia ua fa’auluulu i ai le vaega a loia i Samoa.

“O se tofiga taua tele ma o le a ou tu’uina atoa i ai lo’u malosi atoa ma fai ai mea silisili ou te mafaia ina ia ou fa’aauauina ai galuega ma le anavatau ale S.F.A.

“Fa’afetai atu ai i le komiti ona o lo latou talitonuina o lo’u nei tagata, fa’afetai le Atua ona o lona valaauina o a’u i lenei tulaga maualuga.”

Sa ia fa’ailoa mai fo’i o le galulue fa’atasi e mama ai se avega.

“E leai se mea e ta’u o a’u fuafuaga mo le S.F.A. ae o matou fuafuaga uma lava mo le S.F.A. 

“O le komiti fa’atonu lea ou te peresetene ai, ae o fuafuaga uma e mai i sui uma lava o le asosi e aofia ai le vaega faufautua, komiti fa’atonu e faia uma fuafuaga fa’ataatitia ale asosi.

“O lea ua i ai galuega fa’ata’atitia, pau le itu o le fa’atinoina loa ia galuega.”

Sa ta’ua e Schuster o o se tasi foi lea o sui ua loa lana tautua i totonu o le asosi.

“O lo’o galue nei Vaialia i le matagaluega a Tina ma Tamaitai Atina’e o Nu’u ma Afioaga ma Aga Fesootai o se galuega sa ia mauaina i le mae’a ai o lona fa’ailoga o le Master i le Human Rights i Filipaina.

© Samoa Observer 2016

Developed by Samoa Observer in Apia