Poloa’iga e Tuilaepa le Loia Sili ia fai loa se fa’aiuga

Tusia Deidre Tautua-Fanene ,

99 Hits

Ali’i Palemia, Tuilaepa Sailele Malielegaoi.

Ali’i Palemia, Tuilaepa Sailele Malielegaoi.

Ua fa’atonuina e le ali’i Palemia, Tuilaepa Sailele Malilelegaoi le Loia Sili, Lemalu Hermann Retzlaff, ina ia fai loa se fa’aiuga i ai latou o lo’o masalomia i le “O le Palemia.”

“O lea ua uma ona ou fa’atonuina le loia sili ina ia fai loa se fa’aiuga i tagata nei,” o lana saunoaga lea i le Samoa Observer.

“O e manatua na ou faiatu i a te oe e leai se mea e lilo i lenei lalolagi.”

E le’i manino mai i le saunoaga ale ali’i palemia po’o le a le ituaiga fa’aiuga lea sa ia fa’atonuina ai le Loia Sili ina ia fai.

Pe na te fa’aalia manino mai fo’i suafa o nei tagata o le a faia i ai le fa’aiuga a le loia sili.

E o’o i le fuainumera o latou ua masalomia e le’i mafai ona fa’aalia mai.

Sa taumafai atu le Samoa Observer mo se avanoa i le Loia Sili ae peita’i e le’i mafai, e o’o fo’i sa tu’uina atu e ala atu lea i le imeli e le’i mafai ona maua mai se tali i le taimi na tu’ufa’atasia ai lenei ripoti.

O le “O le Palemia” o se tasi lea o itulau o lo’o i luga o le facebook ua ave i ai le fa’amuamua ale malo ina ia sa’ilia po’o ai o lo’o ta’imua i lea itulau.

I le vaiaso na se’i mavae atu nei sa aveesea ai le facebook lea itulau ona o le solia ai e lea itulau ni tulafono ma tulaga masani aua le puipuia o tagata.

Ae i le mae’a ai o le aso e tasi talu ona aveesea lea itulau sa toe mafai ona toe fai mai sesi itulau fou e ta’ua o le “OLP O le Palema.”

Sa ta’ua e Tuilaepa o nei auala fa’atekenolosi uma e aofi ai le facebook, twitter ma isi o vaega uma nei o lo’o lagolagoina e le malo. 

“O isi nei vaega o atina’e a le malo,” o lana saunoaga lea. 

“Ou te manatua le taimi na matou filifili ai e fa’apipi’iitelefoni i le tausaga e 1999 sa tele fo’i ni faitioga na maua maua mai i tagata ma le pulega sili o le matagaluega.

“Afai na e faitau i la’u tusi, sa ou tu’uina i totonu o le pulega lea ni Minisita se to’alua ina ia taumafai e fa’afou feso’otaiga o fa’amatalaga ae peita’i e le’i fa’amanuiaina.

“O le a lesi a’u gaioiga sa fai? O lea s ou filifili ai e avea a’u ma Minisita o Feso’otaiga ina ia fa’ataunu’uina itu ia na ou mana’o i ai ae e le’I mafai e nei tagata.”

Sa ta’ua e Tuilaepa o lea sa fai ai loa se tulafono ina ia tu’u eseese le vaega o feso’otaiga lea na amata mai ai loa i le Samoa Tel, ma le tasi poloketi lea na mafai ai ona ofi mai ai le Digicel i Samoa.

“Ae ina ua o’o ina fa’alauteleina le auala fa’atekonolsi auā le atina’eina o le atunu’u, ae itu lea ua tulai mai ua fa’aaoga sese e latou ia ua leaga ulu le fa’aogaina o auala fa’atekenolosi.

“Ua latou fa’aaogaina ai gagana e le talafeagai ma tu’ua’ia ai fua isi, ae o le tasi nei atina’e a le malo e fesoasoani ai i tagata o le atunu’u e fa’afaigofie ai auala o feso’otaiga.”

© Samoa Observer 2016

Developed by Samoa Observer in Apia