Taua e le tina le aoga ole Ola Tautua

Tusia Fetalai Tuiluluu ,

298 Hits

Patricia Ah-Ken Usufono

Patricia Ah-Ken Usufono

O se tina e le uma lona alofa ile tausiga o lona aiga.

So’o se tina lava e tu malosi i ona talintonuga, e avea lea ma auala e faamalosi’au ai i lana fanau e ola i se olaga tuto’atasi. E faapena lava se tina e iloa ola ise olaga e tautua. 

 “ So’o se tamaitiiti lava, e manaomi’a e ia se tagata e faata’ita’i iai ma sulu iai. O tina lava e tele na ola ai le fanau.

O le manatu na o le tina ia Patricia Ah-Ken Usufono mai le alalafaga o Fagali’i ma Falelauniu e 21 le matua o lona soifua. 

Na feagai Patricia ma fuafuaga masani pei o le faiga ole tagamea a si ana fanau iti, ile aso ananafi ina ua taunuu atu atu le Fofoga o Samoa.

 “Ia e pei e na’o le pau lava lea o se taimi e fai ai le tagamea aua e pisi isi aso ole vaiaso ile faatauina atu o matou oloa o tonati, fuamoa aemaise fo’i kekepua’a e su’e ai  se seleni. Sa taua e Patricia.

“ E taua tele le aoga a si a’u fanau ia te a’u. O le mea a lea e faamuamua i lo’u aiga ma o le mafuaaga na e faatau ai ma oloa ma si ou to’alua i Fagali’i Primary School i aso uma e su’e ai se tupe. 

“E ui lava ina laititi se tupe maua ae e fa’asoa lava.

Na alu pea lana ia tautalaga ma ia faapea e tele lava mea e mana’omia e le tamaitiiti, ma o le tina lava e iai i taimi uma e iai sona manaoga. O le mea lava lea e tatau ona fai pea e tu i lou tofi fa’amatua. 

Sa fai le aiga o Patricia ao laititi lava o ia ae ui lava ina faigata le olaga, e taumafai lava o ia e faaali ona uiga tausaafia ona i lona iamafaufau, o tamaiti lava le lumanai manuia.

“O tamaiti e tapu’e i auala ia e feola atu ai, o le mea lea e taua ai le faaali atu ole alofa, loto fesoasoani mo se faataitaiga lelei ina ia latou feola ifo fo’i, e faapena lo latou olaga ile lumana’i. I lou ia a manatu, o lea ua ou manumalo i le olaga faatina e mafua mai si a’u fanau. Ou te alofa, fesoasoani atu ia tei latou ma puipui i latou mai tagata e faatiga ia latou. Out e talitonu so’o se tina lava e faapea.

Na ia ta’ua atu ile Fofoga o Samoa o ia e auai foi i le komiti aualuma a le nu’u o Fagali’i ma o se tasi lea o fonotaga e maua mai ai e ia ni fautuaga lelei e fesoasoani ia te ia ile tau atina’e ina o si ona aiga.

O le isi mea e faamalosi’au ia te ia, o le talitonuga lea a leai se fesoasoani a le tina ile olaga a lana tama, ole ola faapaupau foi na ole tamaitiiti pea matua ma e le mana’o o ia e o’o lana fanau i lenei tulaga. 

“O tamaiti e faataitai mai mea ua vaai ai, o le ala lea e taua ai ona ou tu i se tofi po’o se faataitaiga lelei, ma se tagata e iloa faaaloalo i lona aiga aemaise foi le aiga o lo’u toalua ina ia faapea foi na iloa e la’u fanau faaaloalo atu i isi tagata. 

So’o se tina lava, ole faailoga taua lava e mana’o ai o ia ile iuga ole aso, e pei ona faapea mai ai le toatele,

“O lo’o fiafia ma saogalemu la’u fanau.

© Samoa Observer 2016

Developed by Samoa Observer in Apia