O LA’U TALA FO’I

19 February 2016, 12:00AM

1. Matauina i Tala Fou o lea ua amata taualumaga o se faamasinoga-ona o se tagi e faasaga i se Ekalesia.

O lē ana lea tagi o Reverend Kerita Reupena-ma o lea tagi e faasaga i le Komiti a le ‘Au-Toeaina a le Ekalesia Faapotopotoga Kerisiano Samoa-ma na amata tala atu ananafi i le Faamasinoga Sili. O le Komiti la a le ‘Au-Toeaina e aofia ai le Taitaifono o le EFKS o Rev. ElderTavita Roma-le Sui Taitaifono o Rev Elder Tautiaga Senara ma Rev. Elder Kerisiano Soti ma Rev Elder Peleti To’ailoa.

O i latou uma la ia ua molia ona o le latou faaiuga e aveese Rev Reupena mai ni tofi sinia se lua o le ekalesia- e aofia ai lona avea ma Faatonu o le Queensland District i Ausetalia. Ia o se vaega lena o lea tala fou-ae o le fesili-aisea lava ua tuuina atu ai lenei mataupu i le Faamasinoga? 

Ua leai ‘ea se Pama i Kiliata e pei o le upu a le Tusi? Aisea ua le mafai ai ona fo-alamea le Ekalesia e tusa ai ma ana lava faafitauli? Afai la ua foliga mai ua le mafai ona fo-alamea le Ekalesia-o le a le pogai? Aisea ua le mafai ai e le Ekalesia ona fai se faata’ita’iga lelei mo le atunuu atoa? O fea le upu folafola ma le Tala Lelei o loo laugaina pea i Aso Sa uma? Afai ua sala Uta –ia tonu Tai e pei o le upu a le atunu! Aisea? O le afioga a Iesu-“ia outou tausi i a’u mamoe”! O se faiga talafeagai la lea e tausi ai mamoe? O le a sou taofi? 

2. Matauina foi i Tala Fou se ulutala o se faaupuga fai mai o loo faaaoga lava e Minisita Lagolago taavale a le malo ma o loo maua pea o latou totogi. Fai mai la o ia taavale o loo faaaoga e Minisita Lagolago e fela’ua’i solo ai a latou tagata palota.

O le finagalo la o Palusalue e faasino i lea itu-fai mai-o ia tagata e matua leai lava ni mafaufau…! Fai mai la Palusalue-ua tatau loa ona sui le igoa o le latou Vaega Faa-Upufai mai le HRPP I le H.R.C.P. Ina ua fesiligia la Palusalue ina ia faamanino ane le uiga moni o le upu “faiga pi’opi’o” e tusa ai ma le pulega a le Palemia-fai mai Palusalue o lana upu e faasino i le “faaaoga sese ma le faaaoga e le talafeagai ai o alamanuia a le malo mo le manuia o sui auai o lana pati.

O ia la taavale o loo faaaoga e Minisita Lagolago-ua tatau ona tuu aua ua uma ona faataape le Palemene! O le manatu la i lenei tulaga-ua sa’o lelei lava le Taitai o le Itu Agai-talu ai- e foliga mai e leai se mea o faia e tusa ai ma le tulafono! O le finagalo faaalia la o se tasi o sui faatu mo le faiga-palota o Papu Vaai-fai mai e sa’o lelei Palusalue. O le a la sou taofi? 

3. Ua tau le ‘asa le aso ma matauina i Tala Fou le tele o talanoaga ma fonotaga e uiga i faiga pi’opi’o ma se faiga e tatau ona faamuta ai! Afai la e moni lea-o lona uiga-o nei mafutaga uma ma fonotaga o loo talanoaina ai faiga pi’opi’o- o le Tala a le Tusi Oti!

O lona uiga- e uma mafaufauga lelei ma manatu anoa –ae le mafai lava ona taofia! Afai ua mautinoa e i latou uma o loo taulamua i nei fonotaga mo le tineia o faiga pi’opi’o –o le Malo e afua mai ai nei mea leaga uma- ua tatau la ona latou talanoa i le Malo! Aisea? E mafua ona o le Malo e ana faiga pi’opi’o ia e tau titina nei- ae o le faalavelave- ua aafia ai ma le aufaigaluega a le Malo! O lona uiga la- a tuu i se isi faaupuga- ua matua pisia lava le atunuu atoa i nei faiga pi’opi’o!

Afai la tatou te fesili pe aisea ua fiafia ai taitai o le Malo  ma tagata faigaluega o le Malo e fai nei faiga pi’opi’o ua afaina ai le atunuu-o le tali- leaga o loo maua ai o latou faamanuiaga i tupe ma mea faitele a le atunuu! E te talitonu la e mafai ona tineia nei faiga pi’opi’o ma le mataga ua ta’uvalea ai le igoa o Samoa? O le a la sou taofi?

4. Matauina foi i Tala Fou se faalavelave tau afi na faaumatia ai se fale i Vaigaga –ona o se tamaititi e faapea sa taalo i se afitusi! O lea la tala fou-atonu o se faamanatu taua lea ia i tatou uma-talu ai – o nei mea o afi tusi- e tatau i taimi uma ona te’u lelei i se mea e lilo mai tamaiti- talu ai le mata’utia tele o faalavelave e ono tutupu mai ai.

O se faamanatu foi Iea i aiga uma e i ai tagata taumafa tapaa-ina ia matua faaeteete lava i le mata’utia o faalavelave faapenei. E le tatau ona faataatia solo ni afi tusi i totonu o le fale-aemaise ai lava mo se aiga e toatele tamaiti! Afai la tatou te faatamala- ia mautinoa la- e le o le tamaitiiti e mafua ai-ae o tatou lava tagata matutua ma le faatalale i mea faapenei! O le a sou taofi?

19 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>