To’atele ua le gafatia le tau o le soifuaga

Tusia Sarafina Sanerivi ma Ilia L. Likou ,

129 Hits

Finau Emosi, 28 le matua o le soifua o Letogo.

Finau Emosi, 28 le matua o le soifua o Letogo.

“Ia e mo le silafia ai, e ta’u sa’o atu lava le faigata o lo’o i ai nei le tausiga o si o matou aiga ona le leai o se tupe i le tele o aso.” Le tamā i a Finau Emosi, 28 le matua o le soifua o Letogo.

Na ia fa’ailoa o lo’o tele lava ina ola le aiga i mea totō i aso uma e pei ona i ai fa’i ma ulu ma nisi o vaega.

“Ia e tele lava nai o tatou tagata e fa’apea mai o lo’o i ai lava le tulaga lea o le lava o mea’ai ae o la’u ia va’ai i ai e sa’o.

“Aua fo’i e le  fa’apea o le a  fua fa’alausoso’o ai pea le fuata, e i ai taimi e motu ai, o se upu o se tupe e mafai ona maua ma fa’aagaga mo nai fanau.

“E matua’i fuamoa lava le tali i lena vaega...to’atele ua le gafatia le tau o le soifuaga

O lona talitonuga o lo’o i ai le mativa i Samoa.

“Ia o lo’u lea iloa i ai le taimi lenei , o lo’o i ai lava le mativa i Samoa, e fai mai e leai se na tulaga , ae o la’u mau lea.

“E mafua la’u ia tala ona o le le taugata o le tau o le soifuaga o lo’o ua i ai nei, ma ua avea lea ma mafua’aga ua faigata ai lava le tau fa’asoasoaina o tupe maua pe afai lena e maua se tupe.

“Ia o la’u mau lea, ma ou te talitou o lea lava le tulaga o lo’o ua i ai le mamalu o le atunu’u o le le tele  o vaega o lo’o alu ai tupe.

“Ia e fai ma molimau la’u ia tala e pei e tasi lava le taimi e u’ua ai se tupe ia ona pau lava, o le isi lima minute e fiu le mea e toe su’e atu e pei lava ua lelea i le matagi.

“Ou te le’o malamalama fo’i po o le a le mea e so’oona fa’apea mai ai tagata e ala ona matitiva o le le galulue.

“E ta’u atu ai pea, o i matou o tagata e galulue e fai nai fa’ato’aga  mo le aiga, ae o lo’o maitauina le le gafatia e vaega nei le tausiga o aiga.

“Ua matua’i le mafai ona alu i se faleoloa ma se $10 e fa’amoemoe e maoona ai lou aiga i se mea’ai e  fa’atau ai.

“Ia ou te iloa e a’u ia ua tatau se’i toe va’ai alofa mai le malo, a ua taugata le tau o le soifuaga ae alofa se’i tau tele ni galuega e maua.

“Ia o le mea lea e i ai e faifai le ma’umaga tu’u ae alu su’e se galuega ona o le mana’omia o se tupe.

“E pei lava ona o tatou silafia mea uma ia o tupe lava mea uma.

© Samoa Observer 2016

Developed by Samoa Observer in Apia