Tala faasolopito o Samoa mai le amataga

210 Hits

Tapena ma Tuufaatasi e Fuimaono Na’oia Fasavalu Touli F. Tupua mo le Samoa Observer. 

 

O le aso 31 o Me 1891 na tuufua ai le maota o Mataafa; a ua afio atu i Malie, le laumua o aso ua mavae, ma ua talafeagai lea fuafuaga.

O lea la ua toe aliali mai le ono to’alua o Tupu e pulea se atunuu e tasi; ae peitai, o le pule a Malietoa o le pule a se Tupu e lē mafai ona sui ai se mea, ma ua le mafai ona na pulea ai se atunuu. Ma o lea la ua tupu mai nei se mea uiga ese. Ua lua Malo, ae ua mumusu tagata e toe totogi ni lafoga i le Malo o Malietoa.

O lea ua lua Tupu, ae ua lē talia e tagata le Tupu o loo aloa’ia e Malo Tetele; ae o le tulaga ua i ai upufai o le malo ua lē lelei, ma a’o le’i toe masa’a le toto o le atunuu, sa toe faatulaga le isi fuafuaga e faapea, afai e talia e Malietoa, o le a tumau pea ona avea o ia ma Tupu, ae o le a tuuina atu ia Mataafa se tulaga maualuga tau le pulega, e tutusa ma le tofi o le Palemia.

Sa teena e Malietoa lea fuafuaga. Ma talu ai lona teena o lea fuafuaga, o lea na toe tula’i mai ai le isi taua i totonu o le atunuu. Ana faapea na te talia lea fuafuaga, semanu e leai se mea e tupu ma to’afilemu le atunuu. Sa tumau pea ona aloa’ia e Mataafa aiaiga o le Feagaiga i Perelini, fai mai o le aia tatau a tagata o Samoa- le filifilia o lo latou lava Tupu, ma ua nofo sauni foi e toe faaui i tua lana tagi pe afai e faatino e le Faamasino Sili se faiga-palota fou.

Sa mulimuli ane ona faalauiloa faalaua’itele e le Faamasino Sili o Cedarkrantz o le a leai se palota e faia ma o le a tumau pea ona avea Malietoa ma Tupu. O le taimi tonu lea na amata ai le fetaua’i o le atunuu.

Sa lagolago e Vaatau mai fafo Malietoa ma o le pogai lea na malolo ai le finau a Mataafa, ma o le pogai lea na faaaunuua ai Mataafa ma le pe tusa o le sefululua isi tamāli’i i Sailusi. A’o le’i tuua e Mataafa le atunuu, sa faatu’iese loa Tamasese ina ua tuumalo lona tua’a ma ua faamanuiaina ai ona o le mea ua tupu ia Mataafa, ma ua faatu lona malo i Manono, ae mau i luga o atu mauga, lea e malu ai latou mai Vaatau. Ina ua mae’a lelei ona toe faatulaga aiaiga mulimuli ane ai, sa faamalieina loa lona taumafai. 

E lima tausaga sa faaaunuua ai Mataafa ma lana ‘aumalaga, ma na faatoa mafai ona faataga e toe taliu mai, ina ua uma ona ia sainia se maliega o le a latou lē toe faia se isi mea e faavevesi ai le filemu o le atunuu.

Na toe taunuu mai latou i Apia i le aso 19 o Setema 1898, a ua tasi le masina talu ona tuua le malo i le Malietoa. O lenei mea ua tupu mai ua matua faateleina ai le naunau o tagata ina ia filifilia Mataafa e avea ma o latou Tupu e suitulaga ia Malietoa, auā o lea ua toe faaolatia mai i fanua. Sa matua tapenapena lelei le Komiti o le Konesula ma fai laasaga e mautinoa ai, ia toe fai e Mataafa lana ta’utinoga e tusa ai ma aiaiga o le feagaiga na ia sainia i Sailusi. E faapenei la le faaupuga o lea feagaiga ta’uta’ua i le tala faasolopito:-

1. O a’u, Mataafa, o loo taofia nei i le motu o Sailusi, ua ‘ou ta’utino atu nei ma folafola atu, ua ‘ou malie ma faailoa atu e faapea afai e faatagaina a’u ou te toe fo’i atu i Apia, Samoa ma nofo ai, o le a tumau i taimi uma ona ‘ou aloa’ia le Malo o Samoa, e pei ona faavaeina i lalo o le Tulafono Mulimuli a Perelini, e pei ona faamauina i le aso 14 o Iuni 1889, ma le Malo e pei ona faavaeina ma o loo i lalo nei o le Tupu o Malietoa Laupepa ma lē suitulaga ia Malietoa Laupepa pe a filifilia; ma o le a ‘ou nofomau i Mulinuu, le nofoaga i le taimi nei o le Malo o Samoa, ma lē alu ese mai ai e aunoa ma se maliega tusitusia a Konesula o Malo Tetele e Tolu o le Feagaiga, ma o le a ‘ou lē una’ia pe auai i soo se gaoioiga tete’e e faasaga i le Malo, ma ou te lē faatagaina foi tagata o lo’u aiga poo ē lagolagoina a’u ina ia auai i soo se gaoioiga faatu’iese i le Malo; ma o le a ‘ou faia i le mea sili ou te mafaia e tausisi, fesoasoani ma lagolago le Malo e pei ona faavaeina nei i lalo o le feagaiga, ma o le a ‘ou faaaoga lo’u tulaga e siitia ai le to’afilemu o Samoa ma faamalosia ai le lagolago a tagata i le Malo; ma ua ‘ou malie e faapea o lo’u toe taliu atu i Samoa, ma faaauau pea ona ‘ou nofo ai o le a faalagolago i lo’u faatinoina ma le faamaoni o aiaiga ua ta’ua i luga, ma e faapea o le teena ma le loto i ai o aiaiga ua ta’ua i luga. 

Ua lava lea e avea ma mafuaga tatau e aveeseina ai a’u mai Samoa poo mo isi lava faasalaga.

© Samoa Observer 2016

Developed by Samoa Observer in Apia