O la’u tala fo’i

129 Hits

1. O loo vaaia pea tupulaga laiti i le aso atoa ma le po-o feoa’i solo i luga o le alatele i uila vilivae. O isi uiga e fai molī-a’o isi e matua leai lava ni moli o uila vilivae e feoa’i i luga o alatetele. O le fesili la i le LTA ma le Matagaluega o Leoleo-ia o loo gafa ma feoa’iga i luga o ala tetele-“o faataga e le Tulafono nei uila vilivae ona feoa’i i luga o alatele e aunoa ma ni laisene-aemaise ai o le leai o ni molī e feoa’i solo ai i luga o ala tetele i le po? Afai e le o faatagaina e le tulafono-e faapefea la pe a tupu se faalavelave ma oti ai se tasi o ia tamaiti? E fesili atu foi i matua o nei tamaiti- pe o latou silafia le tulaga  mata’utia e o’o i ai a latou fanau pe a tupu ai se faalavelave? O se mea tatau le tuuina atu o fanau ma nei uila vilivae i luga o ala tetele-ae o le saoasaoa o taavale i lenei vaitaimi-ua matua mata’utia lava! Afai la o le LTA ma le Ofisa o Leoleo ia o loo vaavaa-lua i le faafoeina o feoaiga i luga o ala tetele-o ai la e tatau ona na faamalosia le matua faasaina o nei uila vilivae i luga o ala tetele i le afiafi? E ofo le loto pe afai o loo silafia e nei matua le feoa’i solo o a latou fanau i uila vilivae i luga o ala tetele i le afiafi-ae le o taofia! Ia matau lelei mai la- a tupu se faalavelave i se tasi o nei tamaiti-o ai e tuua’ia? Ia atonu e te faapea mai o le avetaavale-ae ia manatua lelei-o oe lava na e nofo ma faatau i ai le uila vilivae; o lena foi e te iloa lelei lava- o loo ti’eti’e uila lau tama i afiafi po uma- ae leai lava sau mea o faia i ai! O le fesili la-faamata ana fai lou tiute- e oti lau tama? Faamata ana fai le tiute o le LTA ma le Ofisa o Leoleo-o le faasa o nei uila vilivae i luga o ala tetele i le po-e oti lau tama poo lou atalii? O le a sou taofi? 

2. Matauina pea foliga uiga ese ma le felanulanua’i o faatosina faa-polokiki! O lona tulaga uiga ese- e peiseai e latalata loa i le isi faiga-palota-ona tolaulau mai loa lea o lea fuafuaga ma lea fuafuaga ua leva ona nofonofo ma le sui i lenei lima tausaga atoa o le a mavae atu. E foliga mai la- e faatitino lava faiga poo faatosina a vaega faa-upufai pe a lata le va-i-vaa! Ia-o ai a le titio ua tatau ona tala mea so’o le upega o lenei 5 tausaga-ae toe fonofono ma toe faaleleia atili aua i’a o le loloto ia ua aga’i mai? Ia-atonu o le gagana taatele lava fai mai o polokiki-ae i ai polokiki e tatau ona tatou faaeteete i ai- e i ai foi polokiki e tatau ona matua Iloilo lelei! Aisea? O le tali- a tatou filifilia polokiki lelei-e lelei foi lo tatou taui-ae a tatou filifilia polokiki leaga-o lea lava ua tatou vaai tino i faiga mata’utia a polokiki leaga-e na o le mativa ma le fia’ai lona taunuuga. O le mea lea-tuu pea polokiki i le aufai-polokiki; ae silasila toto’a tatou i polokiki e manuia ai le atunuu ma i tatou uma! O le a sou taofi? 

3. A’o tatou tapena mo le faiga-palota o loma nei-atonu o nisi o mataupu e tatau ona silasila lelei i ai o le Tau o le Soifuaga. O le Tau la o le Soifuaga- e le faapito i taumafa-ae aofia ai foi ma tau poo totogi o auaunaga uma lava ia o loo tatou faaaogaina e pei o le suavai, eletise ma soo se auaunaga lautele e manaomia e le atunuu! O le fesili la-aisea ua taugata ai le Tau o le Soifuaga i totonu o Samoa? Ia pule oe ma lau tali-ae o la’u tali-ona ua le mafai ona faamalieina le Malo i tupe maua o lafoga o loo tatou totogi atu i le Malo-totogi o auaunaga mo soo se mea e manaomia mo le soifuaga e pei o tau o togafitiga ma vailaau a le Falema’i, Tau o Taumafataga ma Auaunaga poo le VAGST, totogi o auaunaga o loo tatou faaaogaina e pei o le suavai, eletise ma isi mea! A tuu ane la i le eletise-e le o po se lilo-o loo totogi e le atunuu le aitalafu a le Malo, suau’u o loo vili ai le eletise-toe totogi pili o latou moli. O totogi o le aufaigaluega o loo tipi ai lafoga o loo faaaoga e le Malo-o loo tipi ai foi ma isi tupe mo Taui o Faalavelave Faafuase’i-ae a malolo litaea le tagata faigaluega- e le toe maua se sene ‘apa e tasi o na tupe! A tuu ane i le aitalafu a le Malo i fafo-o lea ua ‘ausia le $1.1 Piliona! O ai la e totogiina lea aitalafu? O le tali-o le atunuu atoa ma tupulaga e 1-4 o lalovaoa-e totogiina! A toe tuu ane i ai ma le faitau miliona ma miliona o tupe a le atunuu na faamaumau e le Minisita muamua o Tupe-ia na faamaonia e le Pule ma Su’etusi Sili ma le Komiti Filifilia a Alii Ofisa o le Palemene-ae le o mafai ona molia i le Faamasinoga-o mea uma nei e tatau ona matua silasila lelei i ai le atunuu atoa a’o lumana’i ai le Palota ia Mati 2016. Aisea la e tatau ai ona silasila toto’a le atunuu i nei mea e pei ona ta’ua? O le tali- leaga e mafai foi ona toe tupu mai? Aisea? Leaga ua uma ona tupu muamua- ae leai se mea o faia i ai e le Malo! O lona uiga-o mea foi ia e toe tutupu mai. Aisea? Leaga na tupu muamua-ae pule lava i latou pe fai i ai le amiotonu ma le faamasinoga pe leai! O le a la sou taofi? 

4. Matauina foi i le Talanoaga i le Ala le eseese o finagalo faaalia e uiga i atiina a’e na fai e le Malo-pe o lelei pe leai. O le matau la i ia finagalo faaalia-o isi fai mai e manaia le galuega na faatino e le Malo e tusa ai ma le fausia o ala tetele-ae fai mai e le o manaomia e Samoa nisi fale tetele. O isi fai mai e lei kea le Malo i tagata. O isi e matua le fiafia lava i ia atiina a’e tete’e isi ma fai mai ua maumau ai le tele o tupe a le atunuu ona o le leaga ona fuafuaina o ia galuega. 

O isi foi o i latou na auai i lea Talanoaga i le Ala fai mea e matua le fiafia lava i ia galuega ona ua maumau ai le faitau miliona ma miliona a le atunuu. Ia poo le a lava- ae aoga tele finagalo faaalia faapenei e silasila i ai le atunuu-ona faaaoga lea ma le tatau a latou palota! Ia manatua foi –o le amataga o le Palemene o Samoa sa ta’itolu tausaga o le paeaiga, ae o le taimi nei-o lea ua lima tausaga o le paeaiga-ona faatoa toe fai foi lea o le isi palota. 

O lona uiga la- o le 5 tausaga o se taimi umi-ma a lape le faiga o a tatou palota-ia manatu la- e 5 tausaga lea ua i ai-ma o se taimi umi! O le mea lea e taua ai tele le sa’o o lau palota! O le mea e igoa o le palota sa’o- o le palota lea e aveese ai le pologa ma le mativa-ae sui i le manuia! O le a sou taofi?

© Samoa Observer 2016

Developed by Samoa Observer in Apia