E aoga telefoni pe ā fa’aaoga tatau

Tusia Vatapuia Maiava ma Ilia L. Likou ,

128 Hits

Suavine Ta’ape.

Suavine Ta’ape.

“O le  saosaoa o  le tekonolosi o lo’o ua i ai nei o se itu e ao ona  silasila toto’a ai matua mo se vaifofō.” Suavine Ta’ape, 55 le matua o le soifua o Faleula.

I le fa’atalatalanoaga ai ma le Fofoga o Samoa i le aso ananafi, na ia fa’aalia ai o le tele o nei mau suiga ua tele ai nisi o fa’alavelave olo’o ua alia’e mai i totonu o le atunu’u. “I a te a’u lava ia e lelei tekonolosi fou lea ua i totonu o le atunu’u ae pei e ave lava la’u ia   tilotilo i le itu tau telefoni feavea’i. “E lelei telefoni pe a fa’aaoga tatau. “E pei ona silafia ai, ua amata atu lava i le tamaititi laititi o u’u le telefoni, ua le lelei ai ni feau e fai a aiga.

“Ua feala le telefoni , momoe i telefoni ae ua leai se taimi e fa’alogo ai se fa’atonuga.

“Na o le malamala ane lava le taeao , ia fafaga le telefoni ia o le saofa’iga mai lava lena i le telefoni i le aso atoa a le e’e atu ai se fe’au e le mafai ona fa’alogo ma alu e fai. “Afai fo’i ae o  e fai fe’au, e le alu ese lava telefoni ma lima.

Na ia fa’ailoa o le tulaga o lo’o ua i ai nei i telefoni ua  tele lava fa’afitauli ua tutupu mai ai.

“E pei ona silafia ai e le tau fa’ailoaina aua ua silafia uma e tagata, o telefoni ua tele na i’u ai nisi o fanau i le pule o le ola.

“Aua fo’i e mafua ua ave ai matua le fa’atagana, ia na alu lava lea o le matua ae leiloa po o a ni feau tusitusia o fai i totonu o le telefoni e fanau.

“O se itu fa’anoanoa tele lea o lo’o ua i ai nei suiga.

Na saunoa Suavine o le mafua’aga lava o matua.

“Ia o le mea lea e i ai ua augatata lava matua e fai lo latou tiute, ma e le’o matua uma o lo’o o latou fa’atino lea tulaga.

“Aua fo’i a augata loa le tamā ma le tinā e fa’atonu fanau, ona alu lava lea o le tamaititi i lona lalolagi ua pule lava ia.

“Ua leai se tulaga fo’i lea se’i alu ma tau tu mai, ae ua alu fa’asoloatoa  le olaga o le tamaiti ia i le mea e mana’o ai.

“Ua leai se’i va’ava’ai lelei e matua. “O nisi o va’aiga ia na o le ola ane lava le tamaititi tu’u ai ipads e matamata ai le aso atoa, na moe lava lea o le tamaititi i luga , toe ala ane ia toe matamata.

“O lona uiga a matutua ane, ia o lea lava , na o le u’u lava o le telefoni ae ua leai se o e fai ni fe’au tatau e fesoasoani ai i aiga.

© Samoa Observer 2016

Developed by Samoa Observer in Apia